Апостол Петрэ апэрэ тхылъэу ытхыгъэр 3
3
ЯЩЭНЭРЭШЪХЬ
ЛӀыхэмрэ шъузхэмрэ зэрэзэфыщытынхэ фаер
1Шъо, шъузхэм, шъосэӀо, шъуилӀыхэм шъуафэӀорышӀ. Ар шъушӀэмэ, ахэмэ ащыщхэр Тхьэм игущыӀэхэм ямыдэӀухэми, шъо, шъузхэм, зи шъумыӀоу, шъуизекӀуакӀэкӀэ шӀошъхъуныгъэ яӀэ хъущт, 2гукъэбзагъэ шъуиӀэу Тхьэм шъушӀолӀыкӀэу шъузэрэпсэурэр залъэгъукӀэ. 3Дахэ шъузышӀырэр шъуитеплъэу щэрэмыт, шъхьац блэнри, дышъэкӀэ зыжъугъэдэхэнри, щыгъын дахэхэри арэу орэмыхъу, 4ау цӀыфхэм амылъэгъоу, шъугухэм арылъэу, гушъэбагъэмрэ гупсэфымрэ къарыкӀырэ дэхагъэу мыкӀодыжьыщтыр арэу орэхъу дахэ шъузышӀырэр. ТхьэмкӀэ ащ осэшхо иӀ. 5Сыда пӀомэ, джары пасэм бзылъфыгъэ лъапӀэхэу Тхьэм щыгугъыщтыгъэхэм зызэрагъэдахэщтыгъэр, ялӀыхэми афэӀорышӀэщтыгъэх. 6Аущтэу Сарэ#3:6 Сарэ – еплъ Пегъымбар Мусэ апэрэ тхылъэу ытхыгъэм (УблапӀэм) 18:12. тхьэматэкӀэ еджэу, Ибрахьимэ едэӀущтыгъ. ШӀу шъушӀэу, зыми шъущымыщынэмэ, шъори Сарэ шъурибын.
7Шъо, лӀыхэм, шъосэӀо, гурыӀоныгъэкӀэ шъуишъузхэм шъуадэзекӀу. Сыда пӀомэ, ахэмэ акӀуачӀэ шъо шъукӀуачӀэ нахьи нахь макӀэшъ ары. Лъытэныгъи афэшъушӀ, сыда пӀомэ, шъо шъуигъусэу Тхьэм ынэшӀу щыфэныгъэкӀэ ахэми ӀахьышӀоу щыӀэныгъэ къаретышъ ары. Аущтэу шъушӀэмэ, шъуитхьэлъэӀухэм зи къапэуцужьыщтэп.
ШӀу зэрашӀэрэм пае, ХристоскӀэ шӀошъхъуныгъэ зиӀэхэм къин ащэчы
8Аужыпкъэм шъо пстэуми зыгу-зыпсэу шъущыт. Зыр зым фэгумэкӀэу, шъузэкъошэу шъузэрэхъугъэм пае, шӀу шъузэрэлъэгъоу, гукӀэгъу шъуиӀэу, пэгагъэ шъугухэм арымылъэу шъузекӀу. 9Бзэджагъэм бзэджагъэкӀэ шъупэмыгъокӀыжь, хъуанэрэми шъуемыхъоныжь. Ащ ычӀыпӀэкӀэ, «Тхьэм ынэшӀу къышъущерэф» яшъуӀу; сыда пӀомэ, ибынхэм ащыщ шъухъунэу Тхьэр къызфышъоджагъэр ынэшӀу къызэрэшъущифэрэр ӀахьышӀоу къышъулъыӀэсыныр ары. 10Сыда пӀомэ,
«ЩыӀэныгъэр шӀу зылъэгъоу,
мэфэшӀухэр зылъэгъу зышӀоигъо цӀыфым,
бзэджэ Ӏоным ыбзэгу щерэухъум,
ыӀупэхэри тхьагъэпцӀыгъэм щерэухъумэх.
11Бзэджагъэм зыщерэдзыий, шӀу ерэшӀ.
Зэзэгъыныгъэм игъогу лъыхъоу ыуж ерэт.
12Сыда пӀомэ, Зиусхьаным ынаӀэ
шъыпкъагъэ зиӀэ цӀыфхэм атырегъэты.
ЫтхьакӀумэхэри ахэмэ ятхьэлъэӀухэм ядэӀух.
Ау бзэджашӀэхэм Зиусхьаным ыкӀыб афегъазэ,
(дунаим тыригъэкӀодыкӀынхэм пае)». #3:10-12 Яплъ Орэд ЛъапӀэхэм 33:13-17.
13Шъуишъыпкъэу шӀушӀэным ыуж шъуитмэ, хэт зиягъэ къышъозгъэкӀын зылъэкӀыщтыр? 14Ау шъыпкъагъэм пае къин шъущэчми, гъогу мафэ шъутеуцуагъ. Арышъ, цӀыфхэм зяшъумыгъэгъащт, зыми зешъумыгъэгъэгумэкӀ. 15Зиусхьанэу Тхьэр шъугухэмкӀэ жъугъэлъапӀэ. ГугъапӀэу шъуиӀэмкӀэ хэт къышъоупчӀыми, гушъэбагъэ шъуиӀэу Тхьэм шъушӀолӀыкӀэу пэгъокӀ ешъутыжьынэу сыдигъуи хьазырэу шъущыт. 16Мыхъун зи зыдэшъумышӀэжьэу шъугухэр къабзэу щыжъугъэтых, Христос зыгу илъхэм яфэшъуашэу шъуизекӀокӀэ дэгъу ехъоныхэрэр аӀуагъэхэмкӀэ укӀытэжьынхэм пае. 17Тхьэр аущтэу фаемэ, шӀу зэрэшъушӀэрэм пае, къин шъущэчыныр нахьышӀу, бзэджэшӀэным пае къин шъущэчыным нахьи. 18Сыда пӀомэ, Христос Тхьэм пэгъунэгъу тигъэхъуным пае, типсэкӀодхэм апае зэ къин ыщэчыгъ, джыри зэ ахэмэ къин афимыщэчыжьынэу. Ежь шъыпкъагъэ иӀэу, шъыпкъагъэ зимыӀэхэм апае къин ыщэчыгъ. ЦӀыфхэм загъалӀэм, лӀэн фэе цӀыфыгъ. Тхьэм ар лӀагъэхэм къызахегъэтэджыкӀыжьым, мылӀэн псагъ. 19Ы Псэ илъэкӀыкӀэ чӀыпӀэ шӀункӀым#3:19 чӀыпӀэ шӀункӀыр – лӀагъэхэм ядунай ары. хэс псэхэм адэжь кӀуи, Тхьэм икъэбар#3:19 Тхьэм икъэбар – е къэбарэу ТхьэмкӀэ шӀошъхъуныгъэ зиӀэхэр мыкӀодхэу къызэрэнэжьыщтхэр ары, е къэбарэу Тхьэм цӀыфхэм ябзэджагъэ зэраригъэпщыныжьыщтыр ары. аригъэӀугъ. 20Ахэр арыгъэх Нухьэ#3:20 Нухьэ – еплъ Пегъымбар Мусэ апэрэ тхылъэу ытхыгъэм (УблапӀэм) 6:1-7:24. къухьэр ышӀынэу зыпылъыгъэ мафэхэм Тхьэр щэӀэгъэшхокӀэ къапаплъэщтыгъэми, ежь емыдэӀугъэхэр#3:20 ежь емыдэӀугъэхэр – пегъымбар Нухь изэман щыпсэурэ цӀыфхэу Тхьэм емыдэӀухэу, Нухьэ къухьэр зешӀым, ар зэришӀырэр зымыдагъэхэр ары.. Къухьэм исхэу нэбгырэ заулэ нахь нафэу къапӀомэ, нэбгырий#3:20 нэбгырий – пегъымбар Нухьэрэ ащ ишъхьэгъусэрэ, Нухьэ ыкъохэмрэ ахэмэ яшъхьэгъусэхэмрэ ары. хъухэу, псым хэмыкӀуадэхэу къэнэжьыгъэх. 21Ащ фэдэу, зызэряжъугъэумэхъырэмкӀэ Исус Христос лӀагъэхэм къызэрахэтэджыкӀыжьыгъэм пае, шъумыкӀодэу Тхьэм джы шъукъегъэнэжьы. Зяжъугъэумэхъыныр зыфасӀорэр шъупкъыхэм шӀоир атешъуукъэбзыкӀыныр арэп, шъугухэмкӀэ мыхъун зи зыдэшъумышӀэжьэу, Тхьэм шъуфэшъыпкъэнэу гущыӀэ ешъутыныр ары нахь. 22Исус Христос уашъом дэкӀоягъэу джы мэлэӀичхэри, тетыгъорэ лъэкӀрэ зиӀэхэри ежь фэӀорышӀэхэу Тхьэм иджабгъукӀэ гос.
اکنون انتخاب شده:
Апостол Петрэ апэрэ тхылъэу ытхыгъэр 3: AdgNT14
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 1991, 1992, 2014. Стокгольм