Maka 8
8
Yesuma꞉ wanda꞉hali 4 daoseni pa꞉ta꞉ ne haleekeeki
(Ma꞉tiu 15꞉32-39)
1Koto pita꞉ta꞉ wanda꞉hali wopu tayaemeketa꞉ kutupa napeke ne dia꞉yekeme. Yesuma꞉ ipika꞉ disaipolo haliweki ipiki pa꞉ta꞉ epena꞉ wi la꞉ lemipi pea iki pa꞉ta꞉ alota꞉ 2Do wanda꞉hali pa꞉ta꞉ ya pukima꞉ e̱ ala꞉me leekeme. Hoto tepo I̱ ame̱le̱ haememe. Kutupa ameta꞉ napeke ne dia꞉me. 3I̱ma꞉ta꞉ ika꞉ da tea꞉ma꞉ homa꞉ paleke tapa tapa pua꞉ka꞉na꞉ta꞉ kota꞉ pota꞉ hopikina꞉ tea꞉ma꞉ homilimikie. Mandane wanda꞉halita꞉ papatena꞉ hao a꞉pa pelememe leekeme.
4Ipika꞉ disaipolo haliwekima꞉ ipiki pa꞉ta꞉ alota꞉ Do hapu hayeke alena꞉ hata꞉ta꞉ koto wanda꞉hali pa꞉ta꞉ neta꞉ handopate mea halomana꞉pe lemekeme. 5Yesuma꞉ iki pa꞉ta꞉ dupa lota꞉ pitolo alota꞉ Palaowa siki ekipu wia halemepe laa lota꞉ piekeme. Mo haliwekima꞉ alota꞉ Watake hata꞉e lemekeme.
6Yesuma꞉ mo wanda꞉hali wopu pa꞉ta꞉ alota꞉ Kenkena꞉ pita꞉pe leekeme. Kutupa mo palaowa siki watake hata꞉ meaata꞉ Koda꞉ pa꞉ta꞉ keiyae pi laa pindi pindi peaata꞉ ipika꞉ disaipolo haliwekima꞉ wanda꞉hali pa꞉ta꞉ hale hale pina꞉ haleekeme. Kutupa mo disaipolo haliwekima꞉ mo wanda꞉hali pa꞉ta꞉ mea hale hale pimikime. 7Ta꞉peli tepo a꞉nda꞉ make wia haemeke handaa Yesuma꞉ Koda꞉ pa꞉ta꞉ keiyae pi laata꞉ ipika꞉ disaipolo haliweki pa꞉ta꞉ alota꞉ Do ta꞉pelimanu make mea hale hale pipe leekeme. 8-9Kutupa paeyaoma꞉ naa weleke haemekeme. Mo wanda꞉halima꞉ naa putu piliki wieke ekita꞉ meaata꞉ ala꞉ta tieke watake hata꞉ tumbaemekeme. Wanda꞉halita꞉ 4 daoseni tupa꞉ wanda꞉hali haemekeme. 10Yesuma꞉ iki paeyao tapa tapa peaata꞉ koto kone ipika꞉ disaipolo haliweki ame̱le̱ kawaso pa꞉ta꞉ pita Da꞉la꞉ma꞉nuta da nane pemekeme.
Wele pita꞉la꞉eki ma꞉nda꞉ handomono pie lemekeeki
(Ma꞉tiu 16꞉1-4)
11Pa꞉tisi haliwekima꞉ Yesu pa꞉ta꞉ a꞉pa mineke pi laa ipika꞉ anke yololo alota꞉ Hepeni nane wele pita꞉la꞉eki ma꞉nda꞉ handomono pie lemekeme. 12Yesuma꞉ ipika꞉ pukima꞉ pomo tieke wotu homolo hata꞉ alota꞉ Ame do haleme wanda꞉halima꞉ ekipeke wele pita꞉la꞉eki ma꞉nda꞉ weitelemepe leekeme. Iki pa꞉ta꞉ ota꞉ pi alome. Ame do haleme wanda꞉halima꞉ wele pita꞉la꞉eki ma꞉nda꞉ na handilimikie leekeme. 13Kutupa mo haliweki mina꞉pa꞉laota꞉ kawasona꞉ pua pita mone tea꞉na꞉ peekeme.
14Yesuna꞉ disaipolo haliwekima꞉ palaowa hone yonka꞉lao na mea pemekeme. Koto ekina꞉ kawasona꞉ palaowa homekesiki wiekeme. 15Yesuma꞉ mana꞉ alo hata꞉ iki pa꞉ta꞉ alota꞉ Wotu hapa꞉peke. Pa꞉tisi haliwekina꞉ palaowa pombei yaasa꞉eki make Hetodina꞉ palaowa pombei yaasa꞉eki make wotu handa꞉pa꞉peke leekeme.
16Ika꞉ ika꞉ kone hone wia pipi lemekeme dupa. Nikita꞉ palaowa dia꞉ya꞉ka꞉ta꞉me lemekeme. 17Kutupa Yesuma꞉ ika꞉ hone wimikieki handaa iki pa꞉ta꞉ alota꞉ Ne dia꞉ ya꞉leketa꞉ pa ekipeke pipi alemepe. Ika꞉ hone na wiki a̱i̱ na handelemepe. Ika꞉ honemanu taka꞉laalemepe leekeme. 18Ika꞉ leke hala꞉pate na hando halemepe. Ika꞉ katake hala꞉pate na opu halemepe. Na niminaasemepe. 19Mo hande palaowa siki yunki hata꞉ 5 daoseni haliwekina꞉ pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta tieke ekipu tumba mimipe leekeme. Ikana꞉ma꞉ ipiki pa꞉ta꞉ alota꞉ 12 lemekeme.
20Kutupa Yesuma꞉ alota꞉ Mo hande palaowa siki watake hata꞉ mo 4 daoseni wanda꞉halina꞉ pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta tieke ekipu tumba mimipe leekeme. Ikana꞉ma꞉ ipiki pa꞉ta꞉ alota꞉ Watake hata꞉e lemekeme. 21Kutupa ipikana꞉ma꞉ iki pa꞉ta꞉ alota꞉ A̱i̱ na handelemepe leekeme.
Yesuma꞉ leke holupiki hali ma꞉nda꞉na꞉ leke epeaeyekeeki
22Ikana꞉ma꞉ Betesaida da opolo pemekeme. Mandane wanda꞉halima꞉ leke holupiki hali ma꞉nda꞉ Yesu pa꞉ta꞉ hatuku a꞉paata꞉ koto hali wataena꞉yeke Yesu pa꞉ta꞉ honke lemekeme. 23Yesuma꞉ mo hande leke holupiki halina꞉ kiki minaata꞉ da mina꞉pa꞉lao mo pate leke hatuku peekeme. Hatuku pua ipika꞉ leke pa꞉ta꞉ dopi taata꞉ ipika꞉ kiki yaapoma꞉ mo halina꞉ lokena꞉ kiki tapopao lota꞉ pitolo hata꞉ alota꞉ Ala꞉ta꞉ ma꞉nda꞉ handelepe leekeme.
24Mo halima꞉ handa꞉liao alota꞉ Haliweki handolopate pa ti leke ale pominelememe leekeme. 25Kutupa Yesuma꞉ ipika꞉ kiki yaapoma꞉ mo halina꞉ leke yaapo paa wataeyeke mo halima꞉ wotu handaata꞉ ipika꞉ leke telipina꞉ pa epeekeme. Kutupa ala꞉ta꞉ ala꞉ta꞉ paeyao epeke tupa꞉ handeekeme. 26Yesuma꞉ mo hali ipika꞉ da tapaaso hata꞉ alota꞉ Da teke nane a̱i̱ na pua꞉peke leekeme.
Pidama꞉ Yesuta꞉ Ketisoe leekeeki
(Ma꞉tiu 16꞉13-20, Luku 9꞉18-21)
27Kutupa Yesuma꞉ ipika꞉ disaipolo haliweki ame̱le̱ mo Sesatia Pilipai nane damanu pa꞉ta꞉ pemekeme. Pota꞉na꞉ pulu hata꞉ ipika꞉ disaipolo haliweki pa꞉ta꞉ lota꞉ piekeme dupa. I̱ta꞉ epiya꞉ka꞉ta꞉pe. Wanda꞉halima꞉ eki lo halemepe laa leekeme. 28Kutupa ikana꞉ma꞉ ipiki pa꞉ta꞉ alota꞉ Bapitaisi peao hayeke hali Dionie. Mandane wanda꞉halima꞉ta꞉ Neketa꞉ Elaidiae. Mandane wanda꞉halima꞉ta꞉ Neketa꞉ potopede hali ma꞉nda꞉e lo halememe lemekeme. 29Kutupa iki pa꞉ta꞉ paa lota꞉ piekeme dupa. Koto lo halemepate ikana꞉ma꞉ta꞉ I̱ta꞉ epi lo halemepe leekeme. Pidama꞉ ipika꞉ pi hombo peaaso alota꞉ Neketa꞉ Ketisoe leekeme. 30Yesuma꞉ iki pa꞉ta꞉ hando alo hata꞉ alota꞉ I̱ pa꞉ta꞉ koto aleme pita꞉ wanda꞉hali ma꞉nda꞉ pa꞉ta꞉ na lapa꞉peke leekeme.
Yesuma꞉ alota꞉ Tanda meata꞉ homolueke leekeeki
(Ma꞉tiu 16꞉21-28, Luku 9꞉22-27)
31Yesuma꞉ panake pi ma꞉nda꞉ ipika꞉ disaipolo haliweki pa꞉ta꞉ walolo hata꞉ alota꞉ Wanda꞉halina꞉ Eiyeketa꞉ tanda tanda tieke wotu milieke leekeme. Mo tondiki haliwekima꞉ make yeni peao haleme you haliwekima꞉ make wape pea wala꞉tiki pu haleme haliwekima꞉ make ipiki kiao limika꞉na꞉ta꞉ homilieke leekeme. Kutu pimika꞉na꞉ta꞉ hoto tepo wia paa tiaalieke leekeme. 32Koto leeke ekita꞉ ota꞉ peneme waleekeme. Kutupa Pidama꞉ Yesu hosiki mopate leke hatuku mea pua ipiki pa꞉ta꞉ alota꞉ Kutupiki pi na lapeke leekepate 33Yesuma꞉ la꞉ka꞉la ipika꞉ disaipolo haliweki handaata꞉ Pida hando alo hata꞉ alota꞉ Sadani neke pue. I̱ teke pa꞉ta꞉ na hapeke leekeme. Neketa꞉ Koda꞉ma꞉ ula꞉ hone tupa꞉ na wiki pa wanda꞉halima꞉ witeleme hone leke wilimee leekeme.
34Yesuma꞉ pota꞉na꞉ titi yola pemeke wanda꞉hali make ipika꞉ disaipolo haliweki make ipiki pa꞉ta꞉ epena꞉yeke wi lemipi peaata꞉ iki pa꞉ta꞉ alota꞉ Ya hoki nane toluekema꞉ hone pa꞉la꞉ halima꞉ ipiki pa꞉ta꞉ kone hone ula꞉ ekimanu tunkulaata꞉ ipika꞉ a꞉ka꞉tei wapepiki ti mea tia ya hoki nane telina꞉e leekeme. 35Kutu pa꞉la꞉ ekima꞉ hali epima꞉ ipika꞉ hao hala꞉eki miniki hao haluekema꞉ hone wia꞉ka꞉na꞉ta꞉ kota꞉ ipika꞉ hao hala꞉eki kone alupilieke leekeme. Kutu piliepate I̱ pa꞉ta꞉ make do handa꞉ Pi Seliapo pa꞉ta꞉ make hone witolo hata꞉ ipika꞉ hao hala꞉eki alupaasa꞉ halima꞉ ota꞉ da꞉taa halieke leekeme. 36Hali epima꞉ do kenke ala꞉ta꞉ ala꞉ta꞉ paeyao ipika꞉eki wina꞉ laa alo hata꞉ ipika꞉ hao hala꞉eki alupia꞉ka꞉na꞉ta꞉ kota꞉ epeke ekita꞉ ekipa miliepe leekeme. 37Koto somema꞉ ipika꞉ hao hala꞉eki paa muluekema꞉ alekema꞉ topo peaalia꞉pe. 38Do hande Koda꞉ pa꞉ta꞉ hone na wiki ti teke yoko haleme wanda꞉hali ame̱le̱ hala꞉ hali ma꞉nda꞉ epima꞉ I̱ pa꞉ta꞉ tonka꞉na꞉ yaka pi alemanu pa꞉ta꞉ tonka꞉na꞉ hunkupuma꞉ homea꞉ka꞉na꞉ta꞉ kota꞉ koto hali pa꞉ta꞉ mo Wanda꞉halina꞉ Eiyekema꞉ hunkupuma꞉ homilieke. Ipika꞉ Atekena꞉ pa̱a̱ pa꞉la꞉eki tukiki pa꞉ta꞉ hao hande yakopiki enisolo tonu ame̱le̱ ipilia꞉ dina꞉ta꞉ kota꞉ koto hali handa꞉peketa꞉ hunkupuma꞉ homilieke.
اکنون انتخاب شده:
Maka 8: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
