Luku 4
4
Sadanima꞉ Yesu la handeeke ekimanu
(Ma꞉tiu 4꞉1-11, Maka 1꞉12-13)
1Yesuta꞉ mo Diodani ikali mina꞉pa꞉lao paa epeeke pita꞉ma꞉ta꞉ mo Holi Sipitidima꞉ ipiki pa꞉ta꞉ ota꞉ tumbiekeme. Koto dina꞉ta꞉ mo hande Holi Sipitidima꞉ Yesuta꞉ hapupapeke alena꞉ hatuku peekeme. 2Koto pa꞉ta꞉ta꞉ nate hali tieke yaapo pa꞉ta꞉ Sadanima꞉ Yesu a꞉pa la handa꞉tiki piekeme. Koto hali tieke yaapo nate manuna꞉ta꞉ Yesuma꞉ ala꞉ta꞉ ma꞉nda꞉ siki make ota꞉ na neeke ekima꞉ tea꞉ma꞉ homeekeme.
3Kutupa Sadanima꞉ Yesu pa꞉ta꞉ alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ kota꞉ do toopi kone palaowa au lapeke leekeme. 4Yesuma꞉ mo Sadanina꞉ pi litolo hata꞉ alota꞉ Mo Baiboloma꞉ alota꞉ Halima꞉ palaowa homeke naa na hapeke ya꞉la꞉me laa la꞉la꞉me leekeme.
5Kutupa mo Sadanima꞉ Yesu oli manda hatuku pua mo kenkena꞉ kilu tombuao hala꞉ ekimanu paeyao siki ti tekele pea ipiki pa꞉ta꞉ waleekeme. 6Kutu pitolo hata꞉ mo Sadanima꞉ Yesu pa꞉ta꞉ alota꞉ Mo alemanu paeyaota꞉ I̱ pa꞉ta꞉ ka꞉la꞉pate yaka honema꞉ta꞉ hali ma꞉nda꞉ pa꞉ta꞉ haloa꞉ka꞉na꞉ta꞉ ota꞉ ana꞉ pilieke. Koto ekina꞉ta꞉ mo kilu tombuao hala꞉ ekimanu paeyao pita꞉ ika꞉ hamoko alemanu paeyao telipina꞉ nakana꞉ma꞉ handeteke halena꞉ neke kuluekema꞉ 7neketa꞉ ya biki laaluekema꞉ panda꞉ puniaeka꞉na꞉ta꞉ do alemanu paeyaota꞉ naka꞉eki yelieke leekeme. 8Koto leeke Yesuma꞉ alota꞉ Mo Baiboloma꞉ dupa la꞉la꞉me. Tekehali naka꞉ Koda꞉ ipiki pa꞉ta꞉ homeke yeni pu hata꞉ e poko hapeke laa la꞉la꞉me leekeme. 9Pa mo Sadanima꞉ Yesu mo Diutuseleme nane yeni pu haemeke da tiekena꞉ holu manda hatuku pua haena꞉ leekeme. Kutupa Sadanima꞉ Yesu pa꞉ta꞉ alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ do alena꞉ hao oni kenkena꞉ naka꞉ kone lopa꞉niae. 10Kutu pikina꞉ta꞉ mo Baiboloma꞉ la꞉la꞉ tupa꞉ Koda꞉ma꞉ ipika꞉ enisolo tonuma꞉ neke epeke tupa꞉ handeteke haena꞉ laa pi lelieke la꞉la꞉me. 11Kutupa mo Baiboloma꞉ paa la꞉la꞉ tupa꞉ Koto enisolo tonuma꞉ toopi ponekema꞉ naka꞉ anke awaama꞉na꞉yeke ika꞉ kiki manuma꞉ neke miniliao handeteke halimikie laa la꞉la꞉me leekeme. 12Koto leekepate Yesuma꞉ ipika꞉ pi litolo hata꞉ alota꞉ Baibolo pima꞉ta꞉ do la꞉la꞉me. Tekehali naka꞉ Koda꞉ta꞉ na la handa꞉peke laa la꞉la꞉me leekeme. 13Mo Sadanima꞉ Yesu pa꞉ta꞉ hoke la handa꞉la꞉ ekimanu ane mone eki paeyao siki peaata꞉ pa hosiki mina꞉pa꞉lao peekeme.
Yesuma꞉ ipika꞉ emanu kini piekeeki
(Ma꞉tiu 4꞉12-17, Maka 1꞉14-15)
14Mo Holi Sipitidina꞉ honkopuma꞉ Yesu handeteke haena꞉ laa Yesu mo Ka꞉lili nane paa peekeme. Kutupa koto da yu paeyao pa꞉ta꞉ haemeke wanda꞉halima꞉ Yesuna꞉ biki kende tupa꞉ wina꞉ lemekeme. 15Ipikana꞉ma꞉ Koda꞉na꞉ pi hotu haemeke damanu pa꞉ta꞉ pua꞉tiki pea wanda꞉hali pa꞉ta꞉ pi wala꞉tiki pomieke handaata꞉ mo wanda꞉hali paeyaoma꞉ ipika꞉ biki mea miniliatiki pimikime.
Na꞉sa꞉tete da wanda꞉halima꞉ Yesu kiaemekeeki
(Ma꞉tiu 13꞉53-58, Maka 6꞉1-6)
16Kutupa Yesu ipika꞉ daeyeke da Na꞉sa꞉tete da pa꞉ta꞉ pua ipika꞉ pu hayeke tupa꞉ Diu wanda꞉halina꞉ hoto pitu haemeke natena꞉ Koda꞉na꞉ pi hotu haemeke da pa꞉ta꞉ peekeme. Kutupa ipikana꞉ma꞉ mo Baibolo buka yata꞉puluekema꞉ yeke tiao hayekeme. 17Hali ma꞉nda꞉ma꞉ mo Koda꞉na꞉ potopede hali Aisayama꞉ wape pu wieke buka Yesu pa꞉ta꞉ haleekeme. Kota꞉ Yesuma꞉ mo buka lombaata꞉ handa꞉tiki pua pi ma꞉nda꞉ dupa laeyekeeki handa꞉ witolo hata꞉ yata꞉peekeme.
18I̱ma꞉ natehali wanda꞉hali pa꞉ta꞉manu mo Pi Seliapomanu laanoyeke mo I̱ mea haena꞉ la꞉la꞉ Tekehalima꞉ ipika꞉ Sipitidi I̱ yaapo hala꞉me.
Ipikana꞉ma꞉ I̱ tapaala꞉ ekita꞉ mo dipula pila꞉ wanda꞉hali ikita꞉ ka꞉la꞉pa꞉ tapao halememe lono make mo leke holupiki wanda꞉hali ikita꞉ ika꞉ leke manuma꞉ paa handilimikie laa lonoyeke tapaala꞉me.
Kutupa make mo ika꞉ ka꞉nda꞉ manuma꞉ kone tekepa꞉ta꞉ hoeyaapeke ya꞉la꞉ wanda꞉hali ka꞉la꞉pa꞉ tapawano make 19wanda꞉hali wotu pa꞉ta꞉ta꞉ Tekehalima꞉ ipika꞉ wanda꞉hali tamba꞉ mulu pa꞉la꞉ nate a꞉pa hala꞉me laa lono yeke I̱ tapaala꞉me laa leekeeki yata꞉peekeme.
20Yesuma꞉ mo buka yata꞉paata꞉ amba꞉ bukamanu handeteke hayeke hali pa꞉ta꞉ paa hala꞉ moneao pitiniaeyekeme. Kota꞉ mo Koda꞉na꞉ pi hotu haemeke da pa꞉ta꞉ pitimiki wanda꞉hali paeyao sikima꞉ Yesu handolo hata꞉ yola꞉ pambemekeme. 21Kota꞉ Yesuma꞉ iki pa꞉ta꞉ pi alo hata꞉ alota꞉ Do yata꞉pa kua꞉ hande Baibolo pita꞉ ikana꞉ma꞉ opitolo hamena꞉ kone ota꞉ ame do kone yaya꞉me leekeme. 22Ipika꞉ leeke pi manuma꞉ tende pieke handaa iki paeyao siki leke opa penkiliputia pominolo hata꞉ make haleke lomba mo ikana꞉ma꞉ ipikina꞉ do pi lemekeme. Ipikita꞉ Diosepena꞉ eiyeke dia꞉yekea laa ika꞉ ika꞉ kone lota꞉ pu alu alu pimikime.
23Koto lemeke handaa Yesuma꞉ mo wanda꞉hali pa꞉ta꞉ alota꞉ Ota꞉ loa꞉me laa Ikana꞉ma꞉ I̱ pa꞉ta꞉ make mo wanda꞉halima꞉ amba꞉ loma꞉ loma꞉ pa꞉la꞉me pi siki ma꞉nda꞉ dupa lelimikie. Dokeda halio. Naka꞉ yenita꞉ naka꞉ kone mea epeapeke lelimikie. Kutupa pi ma꞉nda꞉ make I̱ pa꞉ta꞉ dupa lelimikie. Hau ma꞉nda꞉ ma꞉nda꞉ mo Kapeneami teke da nane hata꞉ pi hande hau manuta꞉ nikana꞉ma꞉ amba꞉ opuma꞉me. Kota꞉ do naka꞉ ota꞉ teke da pa꞉ta꞉ make kutupiki homeke haumanu kone pie laa lelimikie laata꞉ 24Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ alome. Koda꞉na꞉ pi wala꞉la꞉ potopede hali ipika꞉ teke wanda꞉halima꞉ ipiki hone wotu na wilimikie. 25Opua꞉pe. I̱ma꞉ iki pa꞉ta꞉ ota꞉ pi alome. Mo Elaidia hayeke dina꞉ta꞉ kineke wanda꞉ sunuta꞉ wotu aneke hapu mo Isulai da yu pa꞉ta꞉ haemekeme. Koto natena꞉ bapi tepona꞉ sumba꞉ yunki mindiki hata꞉ lako ota꞉ na a꞉paata꞉ da yu paeyao pa꞉ta꞉ tea꞉ma꞉ homa꞉la꞉eki wotu aneke hapu epeekeme. 26Kutu piekepate Koda꞉ma꞉ Elaidiata꞉ Isulai da yu pa꞉ta꞉ hayeke wanda꞉hali ma꞉nda꞉ pa꞉ta꞉ na tapaeyekepate ipikita꞉ mo Saidoni da yu tukiki pa꞉ta꞉ hayeke teke da Sa꞉tepa꞉di hayeke kineke wanda꞉ homeke pa꞉ta꞉ tapaeyekeme. 27Kutupa make Koda꞉na꞉ pi la꞉ mea halo hayeke hali Elaisa hayeke dina꞉ta꞉ kindi yeni homo haemeke wanda꞉hali wotu anekema꞉ mo Isulai da yu pa꞉ta꞉ haemekepate Koda꞉ma꞉ koto wanda꞉halita꞉ ota꞉ ma꞉nda꞉ hondo na mea epeaeyekepate pa Sitia da yu pa꞉ta꞉ hayeke hali Neimana꞉ homeke mea epeaeyekeme leekeme.
28Mo Koda꞉na꞉ pi hotu haemeke da pa꞉ta꞉ pitimiki wanda꞉halima꞉ koto pi leekeeki opua ikana꞉ma꞉ mineke tieke wotu pankemekeme. 29Kutupa ikana꞉ma꞉ tiao Yesu minaa ika꞉ teke da mina꞉pa꞉lao hama nane yolaa pemekeme. Mo ika꞉ teke data꞉ pote elina꞉ hayekeeki yaalo Yesu mo pote elina꞉ hatuku pua oni paeleke alena꞉ poneke wato lopaaluekema꞉ hatuku pemekeme. 30Kutu pimikipate Yesuta꞉ mo wanda꞉hali anka꞉lopuna꞉ pa꞉ta꞉ kone pa pa꞉nka꞉pa peekeme.
Yesuma꞉ hoke temoko baena꞉ leekeeki
(Maka 1꞉21-28)
31Kutupa Yesuta꞉ mo Ka꞉lili da yu pa꞉ta꞉ hayeke teke da Kapeneami nane peekeme. Puaata꞉ mo hoto pitu haemeke natena꞉ wanda꞉hali pa꞉ta꞉ pi waleekeme. 32Mo wanda꞉halima꞉ta꞉ Yesuma꞉ waleekeeki opuaata꞉ leke opo handake wimikime. Pa ekipeke. Ipikana꞉ma꞉ biki ula꞉ halima꞉ wala꞉la꞉ tupa꞉ waleeke handaa pimikime. 33Mo pi hotu haemeke da pa꞉ta꞉ta꞉ hoke temoko pitieke hali ma꞉nda꞉ hayekeme. Koto halima꞉ Yesu handaata꞉ ipiki pa꞉ta꞉ wi aneke hapu la alota꞉ 34Ae. Yesu Na꞉sa꞉tete da halio. Nakana꞉ma꞉ta꞉ niki ame̱le̱ eki puluekema꞉ a꞉pa pipa꞉ laata꞉ Neke epele ekita꞉ niki paeyao mea hoeyaaluekema꞉ a꞉pa pipe. Neketa꞉ I̱ma꞉ hone witolome. Neketa꞉ Koda꞉ma꞉ tapaeya꞉ yako piki hali ya꞉ka꞉ta꞉me leekeme. 35Koto ekina꞉ Yesuma꞉ mo hoke temoko pa꞉ta꞉ tandapiki pi alo hata꞉ alota꞉ Neketa꞉ koto hali ota꞉ mina꞉pa꞉lao naka꞉ pi na leke a̱i̱ hosiki ya꞉la꞉na꞉ kone yopue leekeme. Koto pi leekeeki opua mo hoke temokoma꞉ mo wanda꞉halina꞉ leke taapuna꞉ mo hali mea wato lopao yopusiki hama nane opolu baeyekepate mo halina꞉ loke ma꞉nda꞉ na mea hoeyaeyekeme. 36Koto eki handaata꞉ wanda꞉hali paeyao sikima꞉ penkilipa꞉tia pomua ika꞉ ika꞉ kone pi la alu alu pitolo hata꞉ alota꞉ Dota꞉ ekipiki pimanu ala꞉pe laata꞉ Do halita꞉ you hali ma꞉nda꞉ma꞉ leke nono pita꞉la꞉ tupa꞉ mo hoke temokomanu pa꞉ta꞉ dupi dupi aleke handaa hama ipulimime lemekeme. 37Koto ekina꞉ta꞉ wanda꞉hali manuma꞉ Yesuma꞉ pieke ekimanu handaata꞉ da yu ma꞉nda꞉ ma꞉nda꞉ pa꞉ta꞉manu kendetia pomimikime.
Wanda꞉hali wopu Yesuma꞉ epeaeyekeeki
(Ma꞉tiu 8꞉14-17, Maka 1꞉29-34)
38Yesu mo Koda꞉na꞉ pi hotu haemeke da mina꞉pa꞉laota꞉ Saimonona꞉ da pa꞉ta꞉ peekeme. Saimonona꞉ meiyeke wanda꞉ta꞉ titipu yeni tiekema꞉ homa꞉pa wieke handaa ikana꞉ma꞉ Yesu pa꞉ta꞉ mo wanda꞉na꞉ yeni hayeke tupa꞉ la halemekeme. 39Kota꞉ ipiki pua mo wanda꞉ homa꞉pa wieke alena꞉ pa꞉ta꞉liki nane pua tiao hata꞉ mo hande titipu yeni hayeke ekima꞉ mo wanda꞉ mina꞉pa꞉laena꞉ tanda piki pi leekeme. Kutupiki pi leeke handaata꞉ mo yenima꞉ mo wanda꞉ mina꞉pa꞉lao tandela꞉pa yapeeke handaata꞉ koto kone mo wanda꞉ma꞉ tiao hata꞉ mo tapakena꞉ ne wamo peayekeme.
40Nate amba꞉ pambeeke hoki naneta꞉ wanda꞉halima꞉ ika꞉ yankeke sunu ane mone yeni manuma꞉ homa꞉pa wia꞉tiki pimiki yeke handaa Yesu teke pa꞉ta꞉ mea epemeke handaa ipikana꞉ma꞉ ipika꞉ kiki iki manda wia꞉tiki pieke handaa paeyao mea epeatiki piekeme. 41Kutupata꞉ mo hoke temoko manuma꞉ wanda꞉hali aneke tukiki pa꞉ta꞉ pita e̱ la꞉tiki yopulu hata꞉ alota꞉ Neketa꞉ Koda꞉na꞉ eiyekee lemekeme. Yesuma꞉ mo hoke temoko manuma꞉ pi ma꞉nda꞉ laama꞉na꞉ pi taka꞉lake leekeme. Pa ekipeke. Ika꞉ hone wimikipate ipikita꞉ hande Mesaya yeke handaa pimikime.
Hotu haemeke damanu pa꞉ta꞉ pi waleekeeki
(Maka 1꞉35-39)
42Da panake kelepolo haena꞉ Yesu ipikita꞉ koto teke da mina꞉pa꞉lao wanda꞉hali na hala꞉ da yu ma꞉nda꞉ pa꞉ta꞉ ipika꞉ honumake siki peekeme. Kota꞉ mo wanda꞉halima꞉ Yesu ipiki pu moneaekeeki weitia pomu hao ipiki hayeke pa꞉ta꞉ pua handa꞉ witolota꞉ ika꞉ ta꞉na꞉ piki ekita꞉ Yesuma꞉ iki na kiao pena꞉ hone wia sa꞉sa꞉ puluekema꞉ taapemekeme. 43Koto hau pimikipate Yesuma꞉ iki pa꞉ta꞉ alota꞉ Koda꞉ma꞉ I̱ tapaala꞉ ekita꞉ ipika꞉ Kilu Tombuao Hala꞉ ekina꞉ Pi Seliapo mandane teke da ma꞉nda꞉ ma꞉nda꞉ pa꞉ta꞉ haleme wanda꞉halimanu pa꞉ta꞉ make walono yeke I̱ tapaeya꞉me leekeme. 44Koto ekina꞉ta꞉ mo da yu paeyao pa꞉ta꞉ ika꞉ pi hotu haemeke da pa꞉ta꞉manu pomu lopa꞉tia pominolo hata꞉ Koda꞉na꞉ pimanu walao hayekeme.
اکنون انتخاب شده:
Luku 4: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
