Luku 2
2
Yesu mendiekeeki
(Ma꞉tiu 1꞉18-25)
1Mo Sisa Okasitasima꞉ ipika꞉ kilu tombuao hayeke da wanda꞉hali paeyaona꞉ bikimanu wape pina꞉yeke momba꞉lapa꞉peke laa leekeme. 2Koto titina꞉ biki mimiki pita꞉ta꞉ mo Sitia nane handeteke hayeke kapomani tieke halita꞉ Kuliniasi hayekeme. 3Koto leeke handaa wanda꞉hali paeyao biki mina꞉yeke ika꞉ da teke pa꞉ta꞉manu pemekeme. 4Hali ma꞉nda꞉ Diosepeta꞉ mo Ka꞉lili nane hayeke da Na꞉sa꞉tete da mina꞉pa꞉laota꞉ mo Diudia nane hayeke da Beteleha꞉ma꞉ da pa꞉ta꞉ peekeme. Koto data꞉ hande kini hali Deipidi mendieke dae. Diosepeta꞉ Deipidina꞉ tapake hali hayekeeki yaalo koto da pa꞉ta꞉ peekeme. 5Kutupa ipika꞉ wanda꞉ Meti yaapo biki mina꞉yeke pepekeme. 6Metita꞉ weki loke lomba pitina꞉ pepekepate mo Beteleha꞉ma꞉ da pa꞉ta꞉ pua hata꞉ Meti weki hoki neekeme. 7Kutupa ipika꞉ mupeke weki mendiata꞉ hokulupeke dau manuma꞉ ambulata꞉ kimisu wanda꞉halima꞉ hambo haemeke da pa꞉ta꞉ pelia꞉peke da dia꞉yeke handa kao ma꞉na꞉na꞉ ne halo haemeke u̱lu̱ pa꞉ta꞉ mea pua wiekeme.
Enisolotonu pita꞉ sipisipi handeteke haemeke haliweki yaapo
8Kutupa mandane sipisipi handeteke haemeke haliwekima꞉ta꞉ koto data꞉ pa ambu hapeke nane ika꞉ sipisipi ma꞉na꞉ titi timba handeteke haemekepate 9Tekehalina꞉ enisolo homeke iki pa꞉ta꞉ opolo epeekeme. Kutupa mo Tekehali ipika꞉ pa̱a̱ pa꞉la꞉ ekima꞉ iki dupaeyekeme. Koto ekina꞉ mo haliwekima꞉ paala꞉ma꞉ wopu homemekepate 10mo enisoloma꞉ iki pa꞉ta꞉ alota꞉ Paala꞉ma꞉ na homa꞉pepee. Iki pa꞉ta꞉ epeke pi seliapo loluekema꞉ epolome. Koto ekima꞉ta꞉ wanda꞉hali paeyao ta꞉na꞉ma꞉ homaalieke. 11Ame do timbata꞉ oni hande Deipidina꞉ da teke pa꞉ta꞉ta꞉ ika꞉ da꞉taalo pa꞉la꞉ Tekehali amba꞉ mendia꞉la꞉me. Ipikita꞉ Tekehali Ketisoe. 12Iki pa꞉ta꞉ I̱ma꞉ alo ekita꞉ ota꞉ pi aloma꞉ handolo pupe. Mo wekita꞉ dauma꞉ ambula bao mo kao ma꞉na꞉ manuma꞉ ne no haleme u̱lu̱na꞉ ula꞉ma꞉ handolo pupe laa leekeme.
13Koto kone oli hepeni nane haemeke enisolo titi wopuma꞉ mo hande enisolo homeke ame̱le̱ apa꞉tao a꞉pa pambo hata꞉ Koda꞉na꞉ pi laaso hata꞉ alota꞉
14Oli ya manda hala꞉ Koda꞉na꞉ pi lapa꞉peke.
Ipikana꞉ma꞉ ta꞉na꞉ma꞉ homolo hata꞉ kenkena꞉ haleme haliwekina꞉ puki lopaala꞉me laa lemekeme.
Sipisipi handeteke haemeke haliwekima꞉ Yesu handolo pemekeeki
15Mo hande enisolo tapake pa la꞉ka꞉la ya nane pemeke hoki nane mo ma꞉na꞉ handeteke haemeke haliwekima꞉ pi hotiolo hata꞉ alota꞉ Mo Tekehalima꞉ niki pa꞉ta꞉ la kia꞉ ekita꞉ oni Beteleha꞉ma꞉ da nane pa꞉la꞉eki handomana꞉ bape lemekeme. 16Kotoeki laa a̱i̱ya puata꞉ Meti Diosepe yaapo handa꞉ wiata꞉ u̱lu̱ pa꞉ta꞉ hande weki wiekeeki handemekeme. 17Mo ma꞉na꞉ handeteke haemeke haliwekima꞉ mo weki handolo hata꞉ hande enisoloma꞉ mo wekima꞉ pulu piekeeki iki pa꞉ta꞉ la kiekeeki manuta꞉ mo wanda꞉ hali yaapo pa꞉ta꞉ la halemekeme. 18Kota꞉ koto haliwekima꞉ la halemeke ekimanu opimiki wanda꞉hali paeyaoma꞉ta꞉ penkilipa꞉tia pomimikime. 19Kutupa Metima꞉ta꞉ hande pi paeyao pa꞉ta꞉ hone witolo hone wopu u pitiekeme. 20Kutupata꞉ mo hande ma꞉na꞉ handeteke haemeke haliwekima꞉ pa la꞉ka꞉la pulu hata꞉ta꞉ mo enisoloma꞉ leeke tupa꞉ kone hande hau paeyao handaata꞉ Koda꞉na꞉ biki mina꞉liaaso hata꞉ pi laatia pemekeme.
Yesuna꞉ biki halemekeeki
21Kutupa pula homeke paeyeketa꞉ mo weki pa꞉ta꞉ sekemesaisi hau peaota꞉ ipika꞉ biki Yesu lemekeme. Mo weki a̱i̱ na pitiki haena꞉ hande enisoloma꞉ lahaleeke biki kone lemekeme.
Yesu tembolo da pa꞉ta꞉ hatuku pepekeeki
22Hande Mosesina꞉ pi ula꞉eki manuna꞉ wape pa꞉la꞉ tupa꞉ mo ankula꞉ epeaalo pieke nate epeeke handa mo wekita꞉ Tekehali pa꞉ta꞉ haluekema꞉ Diosepe Meti yaapoma꞉ ipiki hatuku Diutuseleme da pemekeme. 23Tekehalina꞉ pi ula꞉ ekimanu pa꞉ta꞉ dupa wape pea ula꞉me. Mupeke nanema꞉ mendilimi weki paeyao Tekehali pa꞉ta꞉ mea haena꞉ lapa꞉peke laa wape pa꞉la꞉me. 24Ma꞉nda꞉ make dupa wape pa꞉la꞉me. Homupiki ba yaapo o melipu panake ba yaapo lia hala꞉peke laa wape pa꞉la꞉ tupa꞉ ipilikana꞉ma꞉ mo ba yaapo Koda꞉ pa꞉ta꞉ lia haluekema꞉ pepekeme.
Simionima꞉ piekeeki
25Kutupa mo Diutuseleme da pa꞉ta꞉ta꞉ koke hali ma꞉nda꞉ Simioni hayekeme. Koto halima꞉ta꞉ Koda꞉ pa꞉ta꞉ paala꞉ma꞉ homa hata꞉ epeke hau pitolo hata꞉ make mo Isulai wanda꞉halina꞉ da꞉taalo pieke nate epena꞉ handeteke hao hayekeme. Ipikita꞉ Holi Sipitidi yaapo hayekeeki yolo hata꞉ 26mo Holi Sipitidima꞉ ipiki pa꞉ta꞉ pi la꞉ witolo alota꞉ Neketa꞉ a̱i̱ na homeke pa halena꞉ kone mo Tekehalima꞉ pi la꞉ ula꞉ hali ipilieke. Mo Ketiso kone handilipikie laa pi la꞉ wiekeme. 27Kutupata꞉ mo Holi Sipitidima꞉ Simioni hatuku mo tembolo da pa꞉ta꞉ peekeme. Kutupa mo hande pi wiekeeki puluekema꞉ Diosepe Meti yaapoma꞉ mo tembolo da pa꞉ta꞉ mo hande weki Yesu hatuku pepekepate 28Simionima꞉ mo weki meata꞉ Koda꞉ pa꞉ta꞉ keiyae pi alo hata꞉ alota꞉
29Tekehalio. Ameta꞉ naka꞉ hande pi la꞉ wili ekita꞉ ota꞉ yaaleme. Koto ekina꞉ naka꞉ e pokaaso halina꞉ puki lopao pono lae.
30Do ekina꞉ yeke loa꞉me. Naka꞉ hande wanda꞉hali da꞉taalo pa꞉la꞉ hali ame yaka lekema꞉ handolome.
31Do hauta꞉ wanda꞉hali paeyaoma꞉ handolo haena꞉ piteleme.
32Kutu pitolo hata꞉ ipikana꞉ma꞉ mo Diendaili wanda꞉hali pa꞉ta꞉ pa̱a̱ pa꞉la꞉eki haluekema꞉ make Isulai wanda꞉halina꞉ biki tieke wina꞉ loluekema꞉ make pilieke laa leekeme.
33Koto pita꞉ta꞉ mo Simionima꞉ mo weki pa꞉ta꞉ leeke pi opuaata꞉ mo ateke inkiki yaapoma꞉ penkilipa꞉tia pomipikime. 34Simionima꞉ iki epeaota꞉ mo wekina꞉ inkiki Meti pa꞉ta꞉ alota꞉
Isulai wanda꞉hali wopu mea da꞉taaluekema꞉ make hoeyaaluekema꞉ make Koda꞉ma꞉ do weki mea haena꞉ laa pa꞉la꞉me.
Ipikita꞉ Koda꞉ma꞉ tombo leke haya꞉ka꞉na꞉ta꞉ wanda꞉hali wopuma꞉ ipiki pa꞉ta꞉ pi la la pitolo hata꞉ make
35ika꞉ hone a꞉mbao wita꞉la꞉ ekimanu peneme yao lelimikie. Kutupa ka꞉nda꞉ pikieki ma꞉nda꞉ make kepete ne haake ekima꞉ leke naka꞉ puki awilieke laa leekeme.
A꞉na꞉ma꞉ piekeeki
36Mo A꞉sea tapake hali Pa꞉nuele ipika꞉ waneke A꞉na꞉ma꞉ta꞉ Koda꞉na꞉ pi la꞉mea halo hayeke wanda꞉ hayekeme. Ipika꞉ haliki yaapota꞉ bapi watake hata꞉ hao haliki homeekeme. 37Ipikita꞉ koke wanda꞉ hata꞉ ipika꞉ bapita꞉ 84 yeekeme. Kutupa ipikana꞉ma꞉ mo tembolo da na mina꞉pa꞉lake timba make natena꞉ make Koda꞉ pa꞉ta꞉ panda꞉puniao hata꞉ ne pi wia꞉tiki pea yeni pu hatiki pu hayekeme. 38Mo wanda꞉ta꞉ koto pita꞉ kone ipikana꞉ma꞉ koto pa꞉ta꞉ opolo puata꞉ mo weki handaata꞉ Koda꞉ pa꞉ta꞉ keiyae pi laata꞉ Koda꞉ma꞉ mo Diutuseleme wanda꞉hali da꞉taena꞉yeke handeteke haemeke wanda꞉hali paeyaoma꞉ opina꞉ mo wekina꞉ pi wotu leekeme.
39Mo Tekehalina꞉ pi ula꞉ ekima꞉ pea꞉pa꞉peke la꞉la꞉ hau paeyao pu paeyaepeketa꞉ mo Ka꞉lili nane ota꞉ ipilika꞉ haepeke da Na꞉sa꞉tete nane paa pepekeme. 40Kutupa mo wekita꞉ daeya hata꞉ honkopu hao hata꞉ make hone wopu u hayeketa꞉ Koda꞉ma꞉ epeatiki piekeme.
Yesuta꞉ weki hata꞉ tembolo da pa꞉ta꞉ piekeeki
41Bapi paeyaota꞉ Yesuna꞉ apa꞉ ama꞉ yaapota꞉ Diutuseleme nane mo Lombei Pupa Yapeeke nate mia꞉tiki pieke handaa pua꞉tiki pipikime. 42Yesuta꞉ bapi kiki yaapo paeya ankena꞉ yaapo mieke natena꞉ta꞉ mo ne pamba꞉la꞉ nane ika꞉ pu haemeke tupa꞉ kone pemekeme. 43Mo hande ne pamba paeyeketa꞉ ika꞉ da poluekema꞉ yeke pemekepate Yesuta꞉ Diutuseleme da pa hapelia hayekeme. Ipika꞉ apa꞉ ama꞉ yaapoma꞉ta꞉ do ekita꞉ hone na wipikime. 44Ipilika꞉ honema꞉ta꞉ Yesuta꞉ mo hande ika꞉ mandakena꞉ pemeke wanda꞉hali ame̱le̱ amba꞉ pa꞉la꞉me hone wipikime. Kutupa nate homekena꞉ pota꞉ ipu hao welealo nane ipilika꞉ tapake make ipilika꞉ yankekemanu pitimiki alena꞉ opolo a꞉pa Yesu weimea pominolo hata꞉ lota꞉ putia pomipikime. 45Kutu pipikipate Yesuta꞉ ota꞉ na handa꞉ u haota꞉ Diutuseleme nane paa la꞉ka꞉la pulu hata꞉ weiya꞉tiki pepekeme. 46Nate tepo peaota꞉ oli yeni pu haemeke da pa꞉ta꞉ Yesu pitiekeeki handa꞉ wipikime. Yesuta꞉ mo Diu wanda꞉halina꞉ pi walo hayeke haliweki ame̱le̱ pita꞉ ika꞉ pi opitolo hata꞉ make lota꞉ pita꞉la꞉ ekimanu pitolo pitimikime 47Yesuma꞉ta꞉ tandapiki hombo peatiki pieke ekina꞉ mo ipika꞉ pi opimiki wanda꞉hali paeyaota꞉ penkilipa꞉tia pomimikime. 48Ipika꞉ apa꞉ ama꞉ yaapoma꞉ta꞉ Yesu hando haota꞉ penkilipa꞉tia pomipikime. Kutupa Yesuna꞉ ama꞉ma꞉ alota꞉ Ya wekio. Ekipeke nakana꞉ma꞉ diki pa꞉ta꞉ dupiki hau pea pelepe. Neke weitolo hata꞉ naka꞉ apa꞉ dikana꞉ma꞉ pomoma꞉ wotu homopa꞉me leekeme. 49Yesuma꞉ inkikina꞉ pi hombo peaaso alota꞉ Ekipeke ipilikana꞉ma꞉ I̱ weiya꞉ mea pomua pelepepe. I̱ta꞉ yaka Apa꞉na꞉ da pa꞉ta꞉ pitoloeki ipilikana꞉ma꞉ta꞉ hone na wipipa꞉ laa loa꞉me leekeme. 50Koto leekepate ipilikana꞉ma꞉ta꞉ koto ipikana꞉ma꞉ hombo peayeke pina꞉ teketa꞉ hone na wipikime.
51Kutupata꞉ Yesuta꞉ ipika꞉ apa꞉ ama꞉ yaapona꞉ pi opua Na꞉sa꞉tete nane mandakena꞉ pemekeme. Kutupa ipika꞉ apa꞉ ama꞉ yaapona꞉ pi nate paeyao opua homu pea hayekeme. Kutu piekepate ipika꞉ ama꞉ma꞉ta꞉ mo hande lemeke pimanu paeyaota꞉ hone na yonka꞉lake hone pa wia hayekeme. 52Kutupa Yesuta꞉ epeke honema꞉ tumba꞉tia daetolo hata꞉ kenke wanda꞉halina꞉ make Koda꞉na꞉ hone pa꞉la꞉ ekina꞉ make daeyekeme.
اکنون انتخاب شده:
Luku 2: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
