Luku 16
16
Ana꞉ lao hone wotu wiki hali
1Yesuma꞉ ipika꞉ hoki nane telimiki haliweki pa꞉ta꞉ dupa leekeme. Amba꞉ a꞉nda꞉ hamoko hali ma꞉nda꞉ ipika꞉ ala꞉ta꞉ ala꞉ta꞉ handeteke haena꞉ta꞉ hali ma꞉nda꞉ mea haena꞉ leekeme. Kutupa koto mieke halima꞉ mo ipika꞉ teke halina꞉ mani mea bepolaasa꞉me laa hali ma꞉nda꞉ma꞉ mo teke hali pa꞉ta꞉ la haleekeme. 2Koto leeke mo teke halima꞉ mo ipika꞉ e pokao hayeke hali wi la꞉mea alota꞉ Do nakana꞉ma꞉ pitelema꞉ aleme ekita꞉ ota꞉ alemepe laata꞉ Nakana꞉ma꞉ naka꞉ handeteke hawale alemanu paeyao sikita꞉ wapena꞉ mu wia yaka kikina꞉ u neae. Pa ekipeke. Ameta꞉ nakana꞉ma꞉ yaka ala꞉ta꞉ ala꞉ta꞉ handeteke hawapeke na ya꞉leke loa꞉me leekeme.
3Koto leeke ekina꞉ mo halima꞉ hone witolota꞉ Yaka tiekema꞉ta꞉ I̱ta꞉ do paeyaaluekema꞉ pita꞉la꞉ma꞉ I̱ta꞉ eki pulua꞉pe laata꞉ I̱ta꞉ mo hombomanu awapeke make honkopu na halome. Kutupa make honke lapeketa꞉ yaala꞉ pa꞉la꞉me. 4Koto ekina꞉ta꞉ ameta꞉ I̱ma꞉ pulu polo ekita꞉ hone witolome. Kutu pulu pua꞉ka꞉na꞉ta꞉ kota꞉ yaka e paelia꞉ dina꞉ta꞉ ika꞉ da pa꞉ta꞉manu ipupe lena꞉yeke yaka yankeke tonu halueke leekeme. 5Koto ekina꞉ta꞉ ipikana꞉ma꞉ mo ipika꞉ teke hali teke pa꞉ta꞉ tondiki wimiki wanda꞉hali paeyaota꞉ wi la꞉ mepi piekeme. Kutupa mo titina꞉ hali pa꞉ta꞉ alota꞉ Nakana꞉ma꞉ yaka teke hali pa꞉ta꞉ta꞉ tondiki ekipu melepe laa lota꞉ piekeme. 6I̱ma꞉ tondiki molo tupa꞉ta꞉ honku kanake 100 molome laa leekeme. Koto leeketa꞉ mo e handeteke hayeke halima꞉ alota꞉ Naka꞉ tondiki meleke wape pea ula꞉ tameiya꞉ta꞉ doma꞉ pao honia pa 50 homeke wape lao wie leekeme. 7Kutupa hali ma꞉nda꞉ pa꞉ta꞉ alota꞉ Naka꞉ tondikita꞉ ekipu melepe leeke handa mo halima꞉ alota꞉ Palaowa nu 100 molome laa leekeme. Koto leeke handa mo hande e handeteke hayeke halima꞉ alota꞉ Naka꞉ tondiki meleke wape pea ula꞉ tameiya꞉ta꞉ doma꞉ pao honia pa 80 homeke wape lao wie leekeme.
8Kutu pieke handa wetepena꞉ mo hande you hali tiekema꞉ mo hande e handeteke hayeke halima꞉ta꞉ hone wotu wiki halina꞉ hau tupa꞉ pieke ekina꞉ta꞉ ipika꞉ biki anekema꞉ mina꞉liaeyekeme. Pa ekipeke. Do kenkena꞉ hau pu haleme wanda꞉halita꞉ ika꞉ e pokuluekema꞉ta꞉ hone wotu wia pokolo hata꞉ta꞉ mo pa̱a̱ piki hau pu haleme wanda꞉halita꞉ lu ankulao halememe leekeme.
9Kutupa Yesuma꞉ la꞉tia pulu hata꞉ alota꞉ I̱ma꞉ iki pa꞉ta꞉ alome. Do kenkena꞉ hamoko ale manuma꞉ta꞉ mandane wanda꞉hali naka꞉ yankeke halena꞉ lena꞉ lapeke. Kutu pika꞉na꞉ta꞉ mo hande hamoko alemanu paelia꞉ dina꞉ta꞉ neketa꞉ pa hao hala꞉ da nane handa꞉ milieke.
10Kutupa hali epima꞉ hosiki e sunu epeke tupa꞉ tikitikina꞉ handeteke haya꞉ka꞉na꞉ta꞉ kota꞉ aneke emanu make epeke tupa꞉ tikitikina꞉ handeteke halieke. Kutupa make hali epima꞉ hosiki e sunu a꞉mba a꞉mba pea poko pu hoeyaeya꞉ka꞉na꞉ta꞉ kota꞉ aneke e make a꞉mba a꞉mba pea poko pu hoeyaalieke. 11Koto ekina꞉ta꞉ nakana꞉ma꞉ do kenkena꞉ ula꞉ hamoko alemanu a꞉nda꞉ tikitikina꞉ na handeteke haeka꞉na꞉ta꞉ kota꞉ epima꞉ Neketa꞉ mo deto hala꞉ ekina꞉ hamoko alemanu epeke tupa꞉ handeteke hapeke laa hone tulao kilia꞉pe. 12Kutupa nakana꞉ma꞉ ma꞉nda꞉na꞉ alemanu a꞉nda꞉ epeke tupa꞉ tikitikina꞉ na handeteke hawaeka꞉na꞉ta꞉ kota꞉ Naka꞉ ekie la꞉la꞉ ale manuta꞉ epima꞉ kilia꞉pe.
13E pokaasa꞉ halima꞉ta꞉ you hali yaapona꞉ e pokaasa꞉ hali hapeke na ya꞉la꞉me. Puluekema꞉ taapo haya꞉ka꞉na꞉ta꞉ hali ma꞉nda꞉ta꞉ puki halolo hata꞉ta꞉ hali ma꞉nda꞉ta꞉ honditi pilieke o hali ma꞉nda꞉ pa꞉ta꞉ homu wopu pitolo hata꞉ta꞉ hali ma꞉nda꞉ta꞉ kiaalieke. Kutupa make ikana꞉ma꞉ Koda꞉ pita꞉ mani yaapo ika꞉ you hali yaapo haena꞉ laa ipilika꞉ e yaapota꞉ homeke dina꞉ pokaapeke ana꞉ na pelememe leekeme.
Yesuna꞉ mandane pimanu leekeeki
(Ma꞉tiu 11꞉12-13, 5꞉31-32, Maka 10꞉11-12)
14Mo hande Pa꞉tisi haliwekima꞉ Yesuma꞉ leekeeki opuaata꞉ ipiki kitaemekeme. Pa ekipeke ikita꞉ mani pa꞉ta꞉ta꞉ puki wotu wimikima꞉ pimikime. 15Koto ekina꞉ Yesuma꞉ iki pa꞉ta꞉ alo hata꞉ alota꞉ Ikita꞉ kenke wanda꞉halina꞉ leke popelekena꞉ ota꞉ epeke tupa꞉ haleme tapakema꞉ handolo pelemepate Koda꞉ma꞉ta꞉ ika꞉ puki hone paeyaota꞉ hone ula꞉me. Do kenke wanda꞉halima꞉ Ota꞉ hau tieke ale manue laa hone witeleme ale manuta꞉ Koda꞉na꞉ leke popelekena꞉ta꞉ pa pa alee hone ula꞉me leekeme.
16Mo Lo Pi wieke ekimanu make mo hande potopede haliwekima꞉ wape pimiki ekimanu make la꞉tia a꞉pa hande bapitaisi peao hayeke hali Dionima꞉ walo paeyaeyekeme. Koto natena꞉ kini pu mea a꞉pa ame do natena꞉ kone Koda꞉na꞉ Kilu Tombuao Hala꞉ ekina꞉ Pi Seliapota꞉ wala꞉tia pu haleketa꞉ kota꞉ mo wanda꞉hali aneke hapuma꞉ koto pa꞉ta꞉ ipuluekema꞉ honkopu wotu halememe leekeme.
17Kutupa oli ya do kenke yaapo alupea꞉peke ekita꞉ tanda tieke ya꞉la꞉pate pa mo Lo Pi ula꞉ ekina꞉ wape pa꞉la꞉ tombo hosiki siki kone alupea꞉peke ekita꞉ ota꞉ tanda tieke pa꞉la꞉me.
18Hali ma꞉nda꞉ epima꞉ ipika꞉ wanda꞉ kiao wanda꞉ ma꞉nda꞉ mia꞉ka꞉na꞉ta꞉ kota꞉ koto halima꞉ta꞉ tooli ka꞉taasa꞉ hau pita꞉la꞉me. Kutupa mo kiala꞉ wanda꞉ mina꞉la꞉ halima꞉ make hali ma꞉nda꞉na꞉ wanda꞉na꞉ hakopu tunku la꞉la꞉me leekeme.
Hamoko hali pita꞉ La꞉satesi yaapo
19Amba꞉ hamoko hali ma꞉nda꞉ma꞉ yenki tiekema꞉ hambeeke dau seliapo pikieki pambatiki peata꞉ nate paeyao epeke epeke nemanu na꞉tiki pu hayekeme. 20Kutupa mo hamoko halina꞉ pota꞉ kake pa꞉ta꞉ mandane haliwekima꞉ta꞉ mo natehali hayeke hali homeke La꞉satesi mea pua wia꞉tiki pu haemekeme. Mo halita꞉ tete tete pambeekeme. 21Ipikita꞉ hande hamoko halina꞉ ne u hayeke teipolo tokele pa꞉ta꞉ lopa꞉tiki pia꞉ka꞉na꞉ batiki pilimi ne popusunu nolueke hone u hayekeme. Kutu piekepate ipika꞉ tete manuta꞉ kika titima꞉ a꞉pa pende pende na꞉tiki pu haemekeme.
22Kutu pea꞉tiki pu hao mo hande natehalita꞉ homeekeme. Kutupa mo hande enisolo manuma꞉ ipikita꞉ Eipoloha꞉ma꞉ yaapo lopulao pitina꞉ mea pemekeme. Kutupa mo hande hamoko hali make homeeketa꞉ ipika꞉ toko mea hoimikime. 23Hande hamoko halita꞉ oni ti to hala꞉ ale pa꞉ta꞉ puaata꞉ tanda tieke minolo hata꞉ handa꞉liaeyekepate Eipoloha꞉ma꞉ La꞉satesi yaapo lopula alu pea pitipikieki papate haepekeeki handeekeme. 24Koto ekina꞉ ipikana꞉ma꞉ anekema꞉ wi alo hata꞉ alota꞉ Apa꞉ Eipoloha꞉ma꞉o. I̱ pa꞉ta꞉ a꞉ta꞉ma꞉ homa꞉e. Do ti to hala꞉ ekima꞉ I̱ tanda tieke peaasa꞉ ekina꞉ La꞉satesima꞉ ipika꞉ kiki ma̱lekema꞉ ikali pa꞉ta꞉ tenke lao yaka kekeke kosa꞉ pina꞉yeke wataena꞉ tapae laa leekeme.
25Koto leekepate Eipoloha꞉ma꞉ma꞉ alota꞉ Ya wekio. Hone niminae. Neketa꞉ hande kenkena꞉ hae natena꞉ta꞉ kota꞉ epeke alemanu wotu wia haepate La꞉satesita꞉ ota꞉ hoke alemanu homeke mia꞉me. Kutu piekepate ameta꞉ ipikita꞉ ta꞉na꞉ma꞉ homo haena꞉ta꞉ neketa꞉ tanda naleme. 26Kotoeki manuta꞉ koto ya꞉la꞉pate ma꞉nda꞉ta꞉ nika꞉ haloma꞉eki tukiki pa꞉ta꞉ hombo tieke ula꞉ ekima꞉ do diki halopa꞉ nane haloma꞉ wanda꞉hali ma꞉nda꞉ta꞉ ta neke hale nane ipuluekema꞉ taapelemepate a꞉pa꞉peke na ya꞉lieke. Kutupa neke hale nane haleme wanda꞉hali ma꞉nda꞉ta꞉ doane ipuluekema꞉ taapea꞉ka꞉na꞉ta꞉ a꞉pa꞉peke na ya꞉lieke leekeme. 27Koto leeke mo hamoko halima꞉ alota꞉ Apa꞉o. Kota꞉ I̱ma꞉ neke honke aloma꞉ yaka apa꞉na꞉ da nane La꞉satesi pena꞉ tapae. 28Koto pa꞉ta꞉ta꞉ yaka kame tonu yunki hata꞉ halemema꞉ iki make do tanda pu hala꞉ alena꞉ a꞉paama꞉na꞉yeke La꞉satesima꞉ kinki pulu pena꞉yeke loa꞉me leekeme.
29Koto leeke handa Eipoloha꞉ma꞉ma꞉ alota꞉ Naka꞉ kame tonuna꞉ kinki pita꞉la꞉ pi manuta꞉ Mosesima꞉ make potopede haliwekima꞉ amba꞉ lao ula꞉me. Naka꞉ kame tonuma꞉ mo haliwekina꞉ pi opina꞉e laa leekeme. 30Hande hamoko halima꞉ ipika꞉ pi hombo peaaso alota꞉ A꞉pa Eipoloha꞉ma꞉o. Kotota꞉ ana꞉ dia꞉me. Pate amba꞉ homeeke hali ma꞉nda꞉ma꞉ paa tiao lolo pea꞉ka꞉na꞉ta꞉ kota꞉ mo haliwekima꞉ ika꞉ hoke hau peleme ekimanu hoki walimikie laa leekeme. 31Koto leekepate Eipoloha꞉ma꞉ma꞉ alota꞉ Hande Mosesima꞉ make potopede haliwekima꞉ amba꞉ lao ula꞉ ekimanu na opimika꞉na꞉ta꞉ kota꞉ mo homa꞉la꞉ hali ma꞉nda꞉ paa tiao epea꞉ka꞉na꞉ make hone ma꞉nda꞉ la꞉ka꞉la na wilimikie leekeme.
اکنون انتخاب شده:
Luku 16: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
