Luku 14
14
Yesuma꞉ yeni homeeke hali ma꞉nda꞉ mea epeaeyekeeki
1Mo hande hoto pila꞉ nate ma꞉nda꞉na꞉ Yesuta꞉ Pa꞉tisi haliwekina꞉ you hali ma꞉nda꞉na꞉ da pa꞉ta꞉ ne noluekema꞉ peekeme. Kutupa koto pa꞉ta꞉ haemeke wanda꞉halima꞉ta꞉ Yesuta꞉ wopu handaake wimikime. 2Pa koto pa꞉ta꞉ta꞉ kiki anke pambeke hali ma꞉nda꞉ta꞉ Yesu pa꞉ta꞉ epeekeme.
3Kutu pieke Yesuma꞉ mo hande Lo Pi walo haemeke haliweki make mo mandane Pa꞉tisi haliweki pa꞉ta꞉ make lota꞉ pitolo hata꞉ alota꞉ Nika꞉ hande Lo Pi ula꞉eki manuma꞉ta꞉ hoto pila꞉ nate nina꞉ wanda꞉hali mea epeamonota꞉ waleke ku hala꞉pe o dia꞉ ya꞉la꞉pe leekeme. 4Koto leekepate mo haliwekima꞉ta꞉ pi siki ma꞉nda꞉ make ota꞉ na hondomu lemekeme. Kota꞉ Yesuma꞉ta꞉ mo hande yeni hayeke hali mea epeao tapaeyekeme. 5Kutupa Yesuma꞉ iki pa꞉ta꞉ alota꞉ Iki ma꞉nda꞉ hondo ika꞉ weki o ma꞉na꞉ ma꞉nda꞉ oni naku pa꞉ta꞉ mo hoto pila꞉ natena꞉ kone lopa wia꞉ka꞉na꞉ta꞉ kota꞉ ikana꞉ma꞉ta꞉ Mo hoto pila꞉ natena꞉e laa a̱i̱ na kiki yola꞉ milimikipe leekeme. 6Koto leekepate mo haliwekima꞉ta꞉ Yesuna꞉ pi hombo peapeketa꞉ ana꞉ na piekeme.
Ika꞉ kone homu pea hasa꞉eki
7Mo hande wi leeke epemeke haliwekima꞉ a꞉pa꞉la꞉ da panda꞉ handaa mu tia pomimikieki hando hao Yesuma꞉ dupiki onkoluma꞉ pi la haleekeme. 8Ma꞉nda꞉ epima꞉ wanda꞉ panake mea ne pambolo hata꞉ neke pa꞉ta꞉ epoe pi a꞉nda꞉ lea꞉ka꞉na꞉ta꞉ kota꞉ pua mo hande hamoko haliweki pitu hala꞉ epeke alena꞉ amba꞉la na pua pita꞉peke. Ma꞉nda꞉ta꞉ neke lu ankulao hala꞉ hamoko hali ma꞉nda꞉ make Epoe alo pa꞉la꞉me laa loa꞉me. 9Kutupa mo hande iki ipupa꞉ lea꞉ halima꞉ mo hali tieke epea꞉ka꞉na꞉ta꞉ Do hali pitina꞉ koto da panda꞉ mina꞉pa꞉lao pue laa neke pa꞉ta꞉ a꞉pa lelieke. Koto lea꞉ka꞉na꞉ta꞉ neketa꞉ yaala꞉ tieke minolo hata꞉ hoki nane pitulu pelipiki yeke loa꞉me. 10Koto hau na pikita꞉ ma꞉nda꞉ma꞉ neke pa꞉ta꞉ Ne nolo epoe pi a꞉nda꞉ lea꞉ka꞉na꞉ta꞉ kota꞉ hoki nanema꞉ a꞉pa pita꞉peke. Kutu pika꞉na꞉ta꞉ mo hande neke wi lea꞉ somema꞉ neke pa꞉ta꞉ a꞉pa alota꞉ Yaka yankekeo. Do epeke alena꞉ a꞉pa pitie lelieke. Kutu piki hau pilia꞉ ekima꞉ta꞉ wanda꞉hali paeyaona꞉ leke popelekena꞉ta꞉ neketa꞉ mina꞉lialieke leekeme. 11Ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mininialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme.
12Kutupa Yesuma꞉ ipiki wi lea꞉ hali pa꞉ta꞉ alota꞉ Nakana꞉ma꞉ natena꞉ o timba ne nolo epena꞉ yeke wi leka꞉na꞉ta꞉ naka꞉ yankeke sunu o naka꞉ kame tonu o naka꞉ tapake make naka꞉ hamoko yankeke tonu wi na lapeke. Ekipeke. Wetepe nina꞉ make koto tupa꞉ kone neke wi lelimi ekima꞉ta꞉ naka꞉ yenkita꞉ paa koto ana꞉na꞉ kone milipikie. 13Kutu pulu pelepate nakana꞉ma꞉ ne ma꞉nda꞉ pambeka꞉na꞉ta꞉ natehali wanda꞉hali sunu pa꞉ta꞉ make dola꞉pake piki kiki anke hoela꞉ wanda꞉hali make leke holu piki wanda꞉hali sunu paeyao pa꞉ta꞉ ipupe lapeke. 14Kutu pika꞉na꞉ta꞉ Koda꞉ma꞉ kone neke yenki kilieke. Ekipeke. Kutupiki wanda꞉halima꞉ta꞉ naka꞉ yenki kia꞉peke na ya꞉la꞉ ekina꞉ Koda꞉ma꞉ta꞉ mo ipika꞉ pi opua pea꞉tiki pimi wanda꞉hali homa tialimi natena꞉ta꞉ naka꞉ yenki kilieke leekeme.
Ne tieke pambeeke ekina꞉ onkoluma꞉ laa leekeeki
(Ma꞉tiu 22꞉1-10)
15Mo ne no pitimiki haliweki ame̱le̱ pitieke hali homekema꞉ta꞉ koto pi opua Yesu pa꞉ta꞉ alota꞉ Koda꞉na꞉ Kilu Tombuao Hala꞉ ekina꞉ ne pambilia꞉ pa꞉ta꞉ pua pitulu pa꞉la꞉ halima꞉ta꞉ ta꞉na꞉ma꞉ homilieke laa leekepate 16Yesuma꞉ ipiki pa꞉ta꞉ alota꞉ Hali ma꞉nda꞉ma꞉ ne tieke pambolo hata꞉ wanda꞉hali wopu epena꞉ wi la꞉ mepi piekeme. 17Kutupa mo ne nolo pimiki nate teke pa꞉ta꞉ yeeke handaata꞉ mo hande wi la꞉ mepi pieke wanda꞉hali pa꞉ta꞉ e pokaeyeke hali homekema꞉ lolo pena꞉ tapaaso hata꞉ alota꞉ Ala꞉ta꞉ ala꞉ta꞉ paeyao amba꞉ ana꞉ lao uluma꞉ma꞉ ipupe laa lolo pue leekeme. 18Mo halima꞉ lolo peekepate haliweki paeyaoma꞉ homeke homeke lo kiaemeke ekina꞉ tekemanu weitolo hata꞉ta꞉ dupa lemekeme. Titina꞉ halima꞉ hande e pokaeyeke hali pa꞉ta꞉ alota꞉ I̱ta꞉ yaka hambolo kenke handolo polueke. Koto ekina꞉ pilisi I̱ta꞉ a꞉pa꞉peke na ya꞉la꞉me laa lawaapeke leekeme. 19Hali ma꞉nda꞉ma꞉ hande e pokaeyeke hali pa꞉ta꞉ alota꞉ I̱ta꞉ e poka꞉la꞉ kao kiki yaapo hambolo ekima꞉ ika꞉ hau handuluekema꞉ yeke puluekema꞉ pilisi I̱ta꞉ a꞉pa꞉peke na ya꞉la꞉me laa lawaapeke leekeme. 20Kutupa hali ma꞉nda꞉ma꞉ make alota꞉ I̱ta꞉ ame do siki wanda꞉ panake molo ekima꞉ a꞉pa꞉peke na ya꞉la꞉me laa lawaapeke leekeme.
21Koto ekina꞉ mo hande e pokaeyeke halima꞉ paa la꞉ka꞉la pua hande haliwekima꞉ lemeke pi paeyao ipika꞉ teke hali pa꞉ta꞉ la haleekeme. Koto leeke opuaata꞉ mo teke halima꞉ mineke tieke pankolo hata꞉ ipika꞉ e pokaeyeke hali pa꞉ta꞉ alota꞉ A̱i̱ya puaata꞉ mo daonina꞉ pota꞉ tieke pa꞉ta꞉manu make hosiki pota꞉ pa꞉ta꞉manu make mo natehali wanda꞉hali make kiki anke hoeke dola꞉pake wanda꞉hali make leke holu piki wanda꞉hali make ankema꞉ pomua꞉peke na yeke wanda꞉hali make koto wanda꞉hali paeyaosiki hatuku mea a꞉pa꞉peke leekeme. 22Kutupa mo e pokao hayeke halima꞉ kotoeki pea a꞉pa alota꞉ Tekehalio. Naka꞉ hande le ekita꞉ pua꞉pate naka꞉ da tukiki pa꞉ta꞉ta꞉ waleke pa ula꞉me leekeme.
23Koto ekina꞉ mo teke halima꞉ hande e pokao hayeke hali pa꞉ta꞉ alota꞉ Papate pa꞉la꞉ pota꞉ pa꞉ta꞉manu puaata꞉ yaka da tumbina꞉ yeke loa꞉ma꞉ wanda꞉hali paeyao handa꞉ mea a꞉pawapeke. 24Pa ekipeke. Amba꞉ hande titina꞉ wi loa꞉ haliweki homeke a꞉nda꞉ma꞉ yaka ne a꞉pa napena꞉ yeke handa loa꞉me leekeme laa leekeme.
Yesuna꞉ disaipolo hali haluekema꞉ pita꞉la꞉ ekita꞉ yopu hau dia꞉me
(Ma꞉tiu 10꞉37-38)
25Nate ma꞉nda꞉na꞉ wanda꞉hali wopuma꞉ Yesu ame̱le̱ pulu haena꞉ Yesuma꞉ la꞉ka꞉la꞉ moneaso hata꞉ iki pa꞉ta꞉ dupa leekeme. 26I̱ telia꞉ mea ipuluekema꞉ ipilimi wanda꞉hali ma꞉nda꞉ hondoma꞉ I̱ ame̱le̱ pominolota꞉ ana꞉ na pa꞉la꞉me. Pate ipikana꞉ma꞉ I̱ pa꞉ta꞉ puki kuluekema꞉ta꞉ ipika꞉ apa꞉ ama꞉ make ipika꞉ wanda꞉ make wekiwandiki make ipika꞉ kame ana꞉ tonu make ipiki tonka꞉na꞉ kiaota꞉ I̱ pa꞉ta꞉ puki tiekema꞉ homea꞉ka꞉na꞉ta꞉ kota꞉ kutu pilia꞉ someta꞉ ana꞉ pa꞉la꞉me leekeme. 27Ma꞉nda꞉ epima꞉ ipika꞉ a꞉ka꞉tei wape piki ti ipika꞉ kone na mea tia yaka hoki nane na telia꞉ mea ipu haya꞉ka꞉na꞉ta꞉ kota꞉ ipikita꞉ yaka disaipolo hali hapeke na ya꞉la꞉me.
28Ma꞉nda꞉ epima꞉ oli ya nane a꞉eyo a꞉meiyake hokulu pa꞉la꞉ da tieke a꞉eyo paeyaaluekema꞉ ipikana꞉ma꞉ta꞉ titina꞉ honema꞉ amba꞉lata꞉ tumao toopi dupa baalueke o toopi ana꞉ na pa꞉la꞉pe laa yata꞉pilieke. 29Ipikana꞉ma꞉ kotoeki na piki pa amba꞉la a꞉eya꞉ka꞉na꞉ta꞉ kota꞉ mo data꞉ a̱i̱ na paeyaake pa ka꞉ta꞉manu homeke nokopa꞉ wia pa kapa꞉lalieke. Kutu pia꞉ka꞉na꞉ta꞉ wanda꞉halima꞉ moeki handolota꞉ mo some kitaaso hata꞉ alota꞉ 30Do halita꞉ ipika꞉ da a꞉eya꞉pate paeyaapeke ana꞉ na pea pia꞉ka꞉ta꞉me lelimikie.
31Kini hali ma꞉nda꞉ma꞉ ipika꞉ 10 daoseni haliweki a꞉nda꞉ mea kini hali ma꞉nda꞉ ame̱le̱ a꞉nda꞉ puluekema꞉ polo pa꞉la꞉pate pa mo kini hali ma꞉nda꞉na꞉ haliwekita꞉ 20 daoseni haliweki ya꞉ka꞉na꞉ta꞉ kota꞉ mo titina꞉ kinima꞉ta꞉ titina꞉ amba꞉la pita꞉ ipika꞉ honema꞉ tumaaso hata꞉ta꞉ Mo kini yaapota꞉ a꞉nda꞉ puluekema꞉ta꞉ I̱ta꞉ ana꞉ polopema꞉ hone wilieke. 32Ipika꞉ honema꞉ ipikita꞉ ana꞉ na polome hone wia꞉ka꞉na꞉ta꞉ kota꞉ mo hande kini halita꞉ papate haena꞉ kone ipika꞉ kinki haliweki tapaaso hata꞉ alota꞉ A꞉nda꞉ pao polupana꞉ pi minalu pupana꞉e laa pi tapaalieke.
33Yesuma꞉ a꞉mbolo hata꞉ alota꞉ Koto tupa꞉ kone iki ma꞉nda꞉ epima꞉ yaka hoki nane telia꞉ mea ipulueke hone wia꞉ka꞉na꞉ta꞉ kota꞉ ipika꞉ hone pa꞉la꞉ ale paeyao mina꞉pa꞉lao I̱ telia꞉ mea ipilieke leekeme.
Hoela꞉ epi
(Ma꞉tiu 5꞉13, Maka 9꞉50)
34Epita꞉ epeke tendepiki ale ya꞉la꞉pate ipika꞉ tende pa꞉la꞉eki a꞉nda꞉ alu pia꞉ka꞉na꞉ta꞉ kota꞉ ikana꞉ma꞉ mo epina꞉ tende paa mea peapeke pota꞉ta꞉ ma꞉nda꞉ na wilieke. 35Kutupa koto hoela꞉ epima꞉ta꞉ mo e nina꞉ o mini ambuku bao haleme alena꞉ make na epeaalieke. Koto ekina꞉ta꞉ pa bao bao pu halememe. Katake lomba꞉la꞉ somema꞉ta꞉ do pimanu opina꞉e leekeme.
اکنون انتخاب شده:
Luku 14: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
