Kini Pieke 9
9
Koda꞉ma꞉ Noa yaapo pi la꞉ wiekeeki
1Koda꞉ma꞉ Noa a꞉tala꞉ a꞉tala꞉ pa꞉ta꞉ epeaasa꞉ pima꞉ alota꞉ Ika꞉ monduma꞉ monduma꞉ pilimi wekiwandikita꞉ do kenke honiki paeyao pa꞉ta꞉ haena꞉ma꞉ wekiwandiki wopu mendia꞉pa꞉peke. 2laata꞉ mo hotekemanu paeyao make bamanu paeyao make ta꞉peli paeyao make ika꞉ honkopu oto pa꞉ta꞉ haleme ekina꞉ iki paala꞉ halimikie. 3Kutupa ameta꞉ mo tanimanu no haleme tupa꞉ do hotekemanu paeyao make lia nomena꞉ yeke kitolopate 4pa mo we pa pitiki hoteke homeke na napa꞉peke. Pa ekipeke mo da꞉ta꞉la꞉ ekita꞉ koto we pa꞉ta꞉ pileke loa꞉me. 5Kutupa ma꞉nda꞉ epima꞉ hali ma꞉nda꞉na꞉ da꞉ta꞉la꞉eki mia꞉ka꞉na꞉ta꞉ kota꞉ ipikita꞉ hoke yenki halueke. Kutupa hoteke ma꞉nda꞉ma꞉ hali ma꞉nda꞉na꞉ da꞉ta꞉la꞉eki mia꞉ka꞉na꞉ta꞉ I̱ma꞉ta꞉ ipika꞉ hoke yenkita꞉ homa꞉la꞉eki halueke. 6Halita꞉ Koda꞉ leke wepieke ekina꞉ta꞉ ma꞉nda꞉ma꞉ hali ma꞉nda꞉ homena꞉ lia꞉ka꞉na꞉ta꞉ kota꞉ koto someta꞉ hali tonuma꞉ kone lilimikie.
7Ika꞉ monduma꞉ monduma꞉ pilimi wekiwandikina꞉ wekiwandikita꞉ do kenke honiki paeyao pa꞉ta꞉ haena꞉ma꞉ wekiwandiki wopu mendia꞉pa꞉peke leekeme. 8Koda꞉ma꞉ Noa a꞉tala꞉ a꞉tala꞉ pa꞉ta꞉ alota꞉ 9Iki make ika꞉ monduma꞉ monduma꞉ pilimi wekiwandikina꞉ wekiwandiki pa꞉ta꞉ tonka꞉na꞉ I̱ma꞉ dupiki pi la꞉ witolome. 10Koto pita꞉ mo hande sisima pa꞉ta꞉ iki ame̱le̱ epemeke pa pitiki alemanu paeyaota꞉ mo bamanu make hotekemanu make iki paeyao pa꞉ta꞉ loa꞉me. 11Dupiki pi manuma꞉ta꞉ iki ame̱le̱ pi la꞉ witolome. Mo kenkena꞉ pa pitiki alemanu paeyaota꞉ mo ikali tieke tiekema꞉ ota꞉ paa na hoeyaena꞉ laata꞉ mo ikali tieke tiekema꞉ do kenke paeyao paa na hoeyaena꞉e laa I̱ma꞉ la꞉ witolome. 12Kutupa do iki ame̱le̱ make mo pa pitiki alemanu ame̱le̱ make do ota꞉ na paeyeke pa u halo pa꞉la꞉ la꞉ witolo patehau witolo ekita꞉ 13oli koana꞉ yaka ka꞉la꞉da꞉peiya witolo ekita꞉ I̱ma꞉ do kenke yaapo pi la꞉ ulu ekina꞉ patehau ulueki yelieke. 14I̱ma꞉ oli yata꞉ koa manuma꞉ a꞉mbatiki pitolo hata꞉ mo ka꞉la꞉da꞉peiya a꞉pa꞉tiki pia꞉ka꞉na꞉ta꞉ 15kota꞉ I̱ma꞉ mo hande iki ame̱le̱ make mo hotekemanu ame̱le̱ make ikali tieke tiekema꞉ mo pa pitiki alemanu paeyao paa na hoeyaalueke laa pi la꞉ ua꞉eki niminaalueke. 16Mo ka꞉la꞉da꞉peiya oli koa manuna꞉ peneme yatiki pia꞉ka꞉na꞉ta꞉ kota꞉ I̱ma꞉ do kenkena꞉ haleme pa pitiki alemanu nika꞉ mo na paeya꞉peke pi la꞉ uma꞉eki paa niminatiki pulueke. 17Mo ka꞉la꞉da꞉peiyata꞉ I̱ma꞉ mo pa pitiki alemanu paeyao pa꞉ta꞉ pi la꞉ witolo ekina꞉ patehaue leekeme.
Noa a꞉tala꞉ a꞉tala꞉
18Mo sisima pa꞉ta꞉ pita pemeke Noana꞉ eiyeke tonuta꞉ Seme make Ha꞉me make Dieipedi makee. Ha꞉meta꞉ Keinanina꞉ atekee 19Mo Noana꞉ eiyeke tepota꞉ do kenke wanda꞉hali paeyaona꞉ apa꞉meie. 20Noata꞉ e hali yalo ipikita꞉ titina꞉ waini pu noko peeke halie. 21Ipikana꞉ma꞉ mo waini ikali naa keaaso hata꞉ta꞉ ipika꞉ aka꞉manu holo bao pa tu mea hata꞉ ipika꞉ palai da pa꞉ta꞉ pumbuniao wiekeme.
22Kutupa mo Keinanina꞉ ateke Ha꞉mema꞉ ipika꞉ ateke pa tia peliekeeki hando haota꞉ hameke yaapo lolo hama꞉ nane peekeme. 23Kutu pieke handaa Seme pita꞉ Dieipedi yaapoma꞉ta꞉ ateke pa tia peliekeeki handa꞉peke yeketa꞉ dau homeke ipilika꞉ peiyokona꞉ pulumbao tia hoki la꞉ka꞉la oni palai da pa꞉ta꞉ pua pa ale handa hata꞉ atekena꞉ loke manda lopamoneao a꞉mbaepekeme. 24Kutupa Noa ipika꞉ hone paa epeeketa꞉ mo ipika꞉ wetepe wekima꞉ ipiki pa꞉ta꞉ piekeeki handa꞉ u hao 25Noama꞉ alota꞉
Keinani pa꞉ta꞉ esihou pi witoloma꞉ ipikita꞉ ipika꞉ kame yaapona꞉ pa hameke e pokaasa꞉ hali halieke.
26Mo Semena꞉ Tekehali Koda꞉na꞉ biki mina꞉liape. Keinanita꞉ Semena꞉ pa hameke e pokaasa꞉ hali halieke.
27Mo Koda꞉ma꞉ta꞉ Dieipedina꞉ tapake daetolota꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ mo Semena꞉ wanda꞉hali ame̱le̱ haena꞉e.
Keinanita꞉ Dieipedina꞉ pa hameke e pokaasa꞉ hali halieke laa leekeme.
28Mo ikali tieke tieke a꞉pa hoki nane Noata꞉ 350 bapi pa ha pelia hayekeme. 29Kutupa 950 bapi mieketa꞉ homeekeme.
اکنون انتخاب شده:
Kini Pieke 9: SEMB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید