Kini Pieke 48
48
Dieikopema꞉ Ipoteimi pita꞉ Ma꞉na꞉sa꞉ yaapo epeayekeeki
1Hao hao pa nate ma꞉nda꞉na꞉ta꞉ Diosepe pa꞉ta꞉ta꞉ ateke yeni hapa ula꞉me laa lemekeeki opu haota꞉ ipika꞉ weki yaapo Ma꞉na꞉sa꞉ pita꞉ Ipoteimi yaapo hatuku Dieikope handolo peekeme. 2Kutupa Dieikope pa꞉ta꞉ naka꞉ weki Diosepeta꞉ neke handolo a꞉pa꞉la꞉me lemeke opu haota꞉ ipikita꞉ honkopu hao tia liao pitiekeme. 3Dieikopema꞉ Diosepe pa꞉ta꞉ alota꞉ Mo Aneke Wele wopupiki Koda꞉ma꞉ta꞉ oli Keinani ula꞉ Lusu kenke pa꞉ta꞉ opolo a꞉pa I̱ epeaeya꞉me. 4I̱ pa꞉ta꞉ dupa lea꞉me. Naka꞉ monduma꞉ monduma꞉ pilipi wekiwandikina꞉ wekiwandikita꞉ tutu paeyao siki haena꞉ yeke handa wekiwandiki wopu kulueke lea꞉me. Kutupa do kenketa꞉ ika꞉eki u tia pu haena꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki halueke lea꞉me leekeme.
5Dieikopema꞉ ombu alota꞉ Diosepeo. Mo I̱ a̱i̱ na epeke hano do Idiepi mendiala꞉ naka꞉ weki yaapota꞉ yaka ekie. Ipoteimi pita꞉ Ma꞉na꞉sa꞉ yaapota꞉ pa mo yaka weki Lubeni pita꞉ Simiono yaapo konema꞉ handa꞉la꞉me. 6Pate mo naka꞉ wetepena꞉ mendilipi weki tonuta꞉ kota꞉ yaka weki dia꞉ ya꞉lieke. Koto weki tonuma꞉ta꞉ mo Ipoteimi pita꞉ Ma꞉na꞉sa꞉ yaapo pa꞉ta꞉ yama꞉ ipilia꞉ alemanu milimikie. 7I̱ma꞉ dupitolo ekita꞉ mo naka꞉ ama꞉ Leisolona꞉ yeke pitolome. I̱ mo Mesopoteimia hao epoa꞉ dina꞉ta꞉ mo Keinani kenke pa꞉ta꞉ Epa꞉ta꞉ teke pa꞉ta꞉ I̱ a꞉ta꞉ tieke peao homea꞉me. I̱ma꞉ mo wanda꞉ta꞉ Epa꞉ta꞉ pula꞉ pota꞉ tea꞉na꞉ hoiyua꞉me leekeme. Koto Epa꞉ta꞉ta꞉ ameta꞉ Beteleha꞉ma꞉ lelememe.
8Dieikopema꞉ mo Diosepena꞉ weki yaapo hando hao alota꞉ Do weki yaapota꞉ epi yaapo ya꞉ka꞉ta꞉pe leekeme.
9Diosepema꞉ hombo peaaso alota꞉ Do weki yaapota꞉ mo hande Koda꞉ma꞉ do Idiepi kenke pa꞉ta꞉ hano ka꞉la꞉ weki yaapoe leekeme.
Koto leeke Dieikopema꞉ alota꞉ I̱ma꞉ ipiliki epealuekema꞉ dopate hatuku epoe leekeme. 10Dieikopeta꞉ bapi tieke lieke ekiyalo hata꞉ ipika꞉ leke anku pieke ekima꞉ wopu handa꞉peke na yekeme. Kutupa Diosepema꞉ mo weki yaapo ipiki pa꞉ta꞉ hatuku a꞉pa haena꞉ laa mo weki yaapo hopula nunu piekeme. 11Dieikopema꞉ Diosepe pa꞉ta꞉ alota꞉ I̱ma꞉ta꞉ neke paa handulueke hone na ua꞉pate ameta꞉ Koda꞉ma꞉ naka꞉ weki yaapo kone pa handono la꞉la꞉me. 12Kutupa Diosepema꞉ mo weki yaapo Dieikopena꞉ palekena꞉ pitipi alena꞉ mea Dieikope pitia꞉ alena꞉ panda꞉ puniaeyekeme.
13Diosepema꞉ta꞉ Ipoteimita꞉ Dieikopena꞉ hoeya꞉ nanema꞉ pitao Ma꞉na꞉sa꞉ta꞉ popeke nanema꞉ pitaeyekeme. 14Pate Dieikopema꞉ta꞉ ipika꞉ kiki yaapo pala꞉sa꞉ pu alu pea mo Ipoteimita꞉ wetepe weki kone ipika꞉ popeke nane kikita꞉ mo wekina꞉ ambokena꞉ wia kutupa mo ipika꞉ hoeya꞉ nane kikita꞉ mo mupeke wekina꞉ youna꞉ wiekeme. 15Kutupa Diosepe epeaaso dupa leekeme.
Mo hande yaka apa꞉mei yaapo Eipoloha꞉ma꞉ pita꞉ Aisa꞉ke yaapoma꞉ yeni pu haepeke Koda꞉ma꞉ do weki yaapo epeaena꞉e.
Ame do di sikina꞉ kone I̱ hatuku a꞉pa꞉la꞉ Koda꞉ma꞉ ipiliki epeaena꞉e.
16Mo hande tanda eleke eleke epea꞉ ale pa꞉ta꞉ I̱ pa꞉ta꞉la꞉ mea꞉tiki pia enisoloma꞉ ipiliki epeaena꞉e.
Yaka biki make mo yaka apa꞉mei yaapo Eipoloha꞉ma꞉ pita꞉ Aisa꞉ke yaapona꞉ biki make do weki yaapo pa꞉ta꞉ yama꞉ pa u tia pu haena꞉e.
Ipilikana꞉ma꞉ wekiwandiki wopu make mendia ipilika꞉ wekiwandikina꞉ wekiwandiki wopu haena꞉e laa leekeme.
17Diosepema꞉ta꞉ atekema꞉ ipika꞉ popeke nane kikita꞉ mo Ipoteimina꞉ youna꞉ wia꞉eki hando haota꞉ puki tandama꞉ homolo hata꞉ pao mea mo Ma꞉na꞉sa꞉na꞉ youna꞉ wina꞉yeke atekena꞉ kiki pao miekeme. 18Ipikana꞉ma꞉ ateke pa꞉ta꞉ alota꞉ Apa꞉o. Kutupa dia꞉me. Dota꞉ mupeke weki ya꞉la꞉ma꞉ mo naka꞉ popeke nane kikita꞉ ipika꞉ ambokena꞉ wie laa leekeme.
19Koto leekepate atekema꞉ ipika꞉ pi na opitolo hata꞉ alota꞉ Yaka wekio. I̱ma꞉ hone ulume. Ma꞉na꞉sa꞉na꞉ monduma꞉ monduma꞉ pilia꞉ wekiwandikina꞉ wekiwandiki make tapake tieke halo pa꞉la꞉pate pa ipika꞉ wetepe nane hamekema꞉ta꞉ ota꞉ ankulaota꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tiekemanu halieke.
20Koto ekina꞉ koto natena꞉ta꞉ Dieikopema꞉ mo weki yaapo epeaaso hata꞉ alota꞉ Mo Isulai tapakema꞉ta꞉ Ipilika꞉ biki alo hata꞉ta꞉ epeaasa꞉ pi dupa lelimikie. Koda꞉ma꞉ neketa꞉ Ipoteimi pita꞉ Ma꞉na꞉sa꞉ yaapoma꞉ handaena꞉e laa lelimikie leekeme. Kutu pieke ekima꞉ Dieikopema꞉ta꞉ Ipoteimita꞉ Ma꞉na꞉sa꞉na꞉ puki pa꞉ta꞉ haena꞉ leekeme.
21Kutupa Dieikopema꞉ Diosepe pa꞉ta꞉ alota꞉ I̱ homolo poloeki teke pa꞉ta꞉ ya꞉la꞉ ekita꞉ do handelepate Koda꞉ta꞉ neke yaapo hata꞉ neketa꞉ naka꞉ apa꞉meina꞉ kenke nane paa hatuku pelieke. 22Mo I̱ma꞉ yaka bainasi pita꞉ a꞉ndeli yaapoma꞉ mua꞉ hande Amo tapakena꞉ Sekeme kenke epeketa꞉ naka꞉ kametonu pa꞉ta꞉ dia꞉ya꞉la꞉pate pa I̱ma꞉ neke kitolome leekeme.
اکنون انتخاب شده:
Kini Pieke 48: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید