Kini Pieke 41
41
Diosepema꞉ mo kini halina꞉ upa manuna꞉ teke la haleekeeki
1Koto hao pea bapi yaapo paeyeketa꞉ mo Idiepi kini ipika꞉ upama꞉ta꞉ ipikita꞉ mo Naili ikali tea꞉na꞉ hayekeeki handeekeme. 2Kutupa mo ikali pa꞉ta꞉ yama꞉ta꞉ loke panka wiki yonkeleke homu piki wataake hata꞉ kaomanu opa꞉liaota꞉ mo ambumanu nalo haemekeme. 3Kutupata꞉ pa mandane wataake hata꞉ kaomanu make opa꞉liaememe. Koto kao manuta꞉ loke dia꞉ya make pa꞉ta꞉liki holiki yapeekeme. Ikita꞉ mo titina꞉ kaomanu haemeke alena꞉ mo ikali tea꞉na꞉ mandakena꞉ pua haemekeme. 4Kutupa mo loke dia꞉yeke kao manuma꞉ta꞉ mo loke panka wiki kaomanu na꞉ta꞉ paemekeme. Kotoeki handolo hata꞉ mo kinita꞉ paa tiaeyekeme. 5Kutupa ipiki paa polu hola꞉pa upa ma꞉nda꞉ dupa piekeme. Kunima꞉ handeke ale widi opeekeeki liki homekena꞉ta꞉ napeke paeyao wataake hata꞉ wiekeme. Mo napeke manuta꞉ panka wia napea wiekeme. 6Kutupa pa wataake hata꞉ widi napekemanu homeke ekina꞉ ombu opa꞉liaeyekepate mo napeketa꞉ na pankeekeme. Kota꞉ mo hapupa pa꞉la꞉ alena꞉ yama꞉ epeeke titipu piki poma꞉ta꞉ mo napeke pou taeyekeme. 7Kutupa mo na pankeke widi napeke manuma꞉ta꞉ mo panka wiki napekemanu mea na꞉ta꞉ paemekeme. Kota꞉ mo kini tiaota꞉ upama꞉ pua꞉ka꞉ta꞉me laa handa꞉ wiekeme. 8Da ka꞉la꞉paasota꞉ mo kinima꞉ta꞉ hone ka꞉nda꞉ma꞉ homolo hata꞉ mo Idiepi kenke pa꞉ta꞉ haemeke ti̱o̱ haliweki make mo hone u lenkene pimiki tapake make wi la꞉ mipi piekeme. Kutupa koto haliweki paeyao pa꞉ta꞉ta꞉ ipika꞉ upa yaapo kelepeekepate homeke a꞉nda꞉ma꞉ teke ota꞉ la hala꞉peke na yekeme.
9Koto ekina꞉ mo waini ikali handeteke hayeke you somema꞉ mo kini pa꞉ta꞉ alota꞉ I̱ma꞉ta꞉ hoke hau poloma꞉ ame neke pa꞉ta꞉ keleponoe. 10Nakana꞉ma꞉ta꞉ mo amba꞉ palaowa yanko haya꞉ some diki pa꞉ta꞉ mineke pankolo hata꞉ mo dipula handeteke hala꞉ somena꞉ da pa꞉ta꞉ dipula mea lopaeme. 11Kota꞉ timba ma꞉nda꞉na꞉ diki telipuna꞉ma꞉ teke ta꞉ta꞉ wiki upa pu alu pupa꞉me. 12Koto pa꞉ta꞉ta꞉ diki ame̱le̱ mo Hibulu weki ma꞉nda꞉ haya꞉me. Ipikita꞉ mo naka꞉ da handeteke haena꞉ lele amina꞉ you somena꞉ pa hameke e pokaasa꞉ weki yekeme. Dikana꞉ma꞉ta꞉ ipiki pa꞉ta꞉ dika꞉ upa kelepopeke handaata꞉ mo upa yaapona꞉ teketa꞉ ipikana꞉ma꞉ diki la kia꞉me. 13Koto mo somema꞉ lea꞉ tupa꞉ koneta꞉ nakana꞉ma꞉ I̱ta꞉ yaka e paa kipate mo betedi yanko haya꞉ you someta꞉ lu endiaeme laa la haleekeme.
14Koto leeke ekina꞉ mo kinima꞉ Diosepe handa꞉ mealo pupa꞉ leeke handaa koto kone mo dipula da pa꞉ta꞉ handa꞉ mea epeekeme. Mo weki ipika꞉ yankake itiki mea aka꞉ topo pea paeyeketa꞉ mo kinina꞉ leke popelekena꞉ epeekeme. 15Kutupa mo kinima꞉ ipiki pa꞉ta꞉ alota꞉ I̱ma꞉ta꞉ upa pua꞉pate ma꞉nda꞉ma꞉ koto upana꞉ teke la kia꞉peke na ya꞉la꞉me. Ma꞉nda꞉ma꞉ I̱ pa꞉ta꞉ alota꞉ Nakana꞉ma꞉ta꞉ mo upa tekemanu lapeke ya꞉la꞉me laa lea꞉me leekeme.
16Koto leeke Diosepema꞉ hombo peaaso alota꞉ Aneke halio. I̱ma꞉ta꞉ pea꞉peke na ya꞉la꞉pate pa Koda꞉ma꞉ homeke epeke tupa꞉ teke la kilieke leekeme.
17Mo kinima꞉ alota꞉ Yaka upama꞉ta꞉ I̱ta꞉ mo Naili ikali tea꞉na꞉ hata꞉ puekeme. 18Kutupa mo ikali pa꞉ta꞉ yama꞉ta꞉ loke panka wiki yonkeleke homu piki wataake hata꞉ kaomanu opa꞉liaota꞉ mo ambumanu nalo haememe. 19Kutupata꞉ pa wataake hata꞉ kaomanu opa꞉liaememe. Mo koto kao manuta꞉ loke dia꞉ya pa꞉ta꞉liki holiki yapeekeme. Koto kao manuta꞉ do Idiepi kenke pa꞉ta꞉manu I̱ ota꞉ ma꞉nda꞉ na hando alo ota꞉ hoke kaomanu yekeme. 20Mo loke na pankeke kao manuma꞉ta꞉ mo loke panka wiki kaomanu na꞉ta꞉ paememe. 21Kutu pimipate mo kaomanu nemekeeki ma꞉nda꞉ma꞉ handa꞉ wia꞉peke na ya꞉me. Pa ekipeke mo kao manuta꞉ mo hande amba꞉ haeme tupa꞉ kone paa haemekeme. Kutupata꞉ I̱ tiaowa꞉me. 22Koto timba kone pa upa ma꞉nda꞉ pua꞉ ekita꞉ mo kunima꞉ handeke ale widi opeekeeki homeke likina꞉ta꞉ napeke paeyao wataake hata꞉ wiekeme. Mo napeke manuta꞉ panka wia napea wiekeme. 23Kutupa pa wataake hata꞉ widi napekemanu homeke ekina꞉ ombu opa꞉liaeyekepate mo napeketa꞉ na pankeekeme. Kota꞉ mo hapupa pa꞉la꞉ alena꞉ yama꞉ epeeke titipu piki poma꞉ta꞉ mo napekemanu pou taeyekeme. 24Kutupa mo na pankeke widi napeke manuma꞉ta꞉ mo panka wiki napekemanu na꞉ta꞉ paememe. I̱ma꞉ta꞉ do upa yaapota꞉ mo ti̱o̱ haliweki pa꞉ta꞉ kelepoa꞉pate pa homeke a꞉nda꞉ma꞉ teke ota꞉ la kia꞉peke na ya꞉me laa leekeme.
25Diosepema꞉ mo kini pa꞉ta꞉ alota꞉ Mo upa yaapona꞉ teketa꞉ homeke konee. Koda꞉ma꞉ta꞉ mo ipikana꞉ma꞉ pulu pa꞉la꞉eki neke pa꞉ta꞉ la ka꞉la꞉me. 26Mo panka wiki wataake hata꞉ kao manuta꞉ wataake hata꞉ bapi manue. Kutupa mo panka ula꞉ wataake hata꞉ kunima꞉ handeke widi napeke make homeke tupa꞉ wataake hata꞉ bapi manue. Mo upa yaapona꞉ teketa꞉ homeke konee. 27Kutupa mo wetepena꞉ opa꞉liaeyeke loke na pankeke wataake hata꞉ kaomanu pita꞉ mo na pankeke kunima꞉ handeke widi napeke mo hapupa pa꞉la꞉ alena꞉ yama꞉ epeeke titipu piki poma꞉ pou taeya꞉ ekina꞉ teketa꞉ bapi wataake hata꞉na꞉ tea꞉ ki tieke epolo pa꞉la꞉ekie. 28Kotota꞉ mo amba꞉ hande la kua꞉ tupa꞉e. Koda꞉ma꞉ta꞉ mo ipikana꞉ma꞉ pulu pa꞉la꞉eki neke pa꞉ta꞉ wala꞉la꞉me. 29Kota꞉ mo bapi wataake hata꞉na꞉ta꞉ do Idiepi kenke paeyao pa꞉ta꞉ta꞉ ne wotu tande pilieke. 30Kotoeki hoki naneta꞉ bapi wataake hata꞉na꞉ tea꞉ ki ipilieke. Koto hoke tea꞉ ki ipulu do kenke hoeyaeya꞉ka꞉na꞉ta꞉ kota꞉ ikana꞉ma꞉ mo hande epeke bapi manuta꞉ hone yonka꞉lalimikie. 31Mo ne tande pea꞉ bapi manuta꞉ ota꞉ hone yonka꞉lalimikie. Pa ekipeke mo ipilia꞉ tea꞉ kita꞉ ota꞉ teto pikieki ipilieke. 32Mo hoto yaapo peao pele upana꞉ teketa꞉ mo Koda꞉ma꞉ ota꞉ pulueke laa wia kutupa teke pa꞉ta꞉ kone pina꞉ lelieke.
33Koto ekina꞉ nakana꞉ma꞉ mo hone u lenkene pa꞉la꞉ hali ma꞉nda꞉ma꞉ do kenke handeteke haena꞉ ma̱leke luelena꞉e. 34Kutupa make mandane handeteke halo pimiki you halimanu meata꞉ mo ne wopu wita꞉la꞉ bapi wataake hata꞉na꞉ta꞉ koto haliwekima꞉ta꞉ mo wanda꞉hali paeyaona꞉ amu pimi ne manuta꞉ yunki hata꞉ lo wina꞉ laata꞉ homeke lo meata꞉ mu mombelena꞉ lapeke. 35Mo tapakema꞉ta꞉ mo ipula꞉ epeke bapimanu pa꞉ta꞉ta꞉ koto ne paeyaomanu mu mombelena꞉ laata꞉ Kutupa oni daoni pa꞉ta꞉manu koto kunima꞉ handeke widi kilikimanu wia꞉peke damanu a꞉ena꞉ biki halaata꞉ handeteke haena꞉ lena꞉ lapekee. 36Mo koto Idiepi kenke pa꞉ta꞉ epolo pa꞉la꞉ tea꞉ kita꞉ mo amu pea wilimi nema꞉ do Idiepi wanda꞉hali paeyao epealieke. Do hau pika꞉na꞉ta꞉ wanda꞉hali paeyao tea꞉ma꞉ na homilimikie leekeme.
Diosepeta꞉ Idiepina꞉ you hali haena꞉ leekeeki
37Mo kini hali pita꞉ ipika꞉ you haliwekima꞉ make do Diosepema꞉ leeke pina꞉ a꞉pa꞉la꞉me laa 38mo kini halima꞉ ipika꞉ haliweki pa꞉ta꞉ alota꞉ Nikana꞉ma꞉ta꞉ mo Diosepe ankulake Koda꞉na꞉ Sipitidi pila꞉ hali ma꞉nda꞉ ota꞉ na handa꞉ ulumeke leekeme. 39Kutupa mo kinima꞉ Diosepe pa꞉ta꞉ alota꞉ Koda꞉ma꞉ do hau paeyao neke pa꞉ta꞉ wala꞉la꞉ma꞉ mo nakana꞉ma꞉ aneke tupa꞉ hone u lenkene pitele ekita꞉ paeyao ota꞉ ankulaleeki handoloma꞉me. 40I̱ma꞉ neketa꞉ yaka kenke paeyao handeteke halena꞉ laata꞉ mo yaka wanda꞉hali paeyaoma꞉ta꞉ nakana꞉ma꞉ pipa꞉ lelipieki opua pina꞉ lolueke. Naka꞉ handeteke hale ekita꞉ ya handeteke halo ekina꞉ yaapo peao wina꞉e. 41Koto ekina꞉ I̱ma꞉ neketa꞉ do Idiepi kenke paeyaona꞉ kapomanina꞉ handeteke hala꞉ you hali pituelena꞉ ame ma̱leke litolome leekeme. 42Mo kinima꞉ta꞉ mo kapomanina꞉ handeteke pila꞉ ekina꞉ pi tonkao u hala꞉ linita꞉ ipika꞉ kikina꞉ hola꞉ mea Diosepena꞉ kikina꞉ pitaeyekeme. Kutupa ipika꞉ lokena꞉ mo epeke dau seliapo ma꞉nda꞉ pambawaota꞉ koloma꞉ wepiki senipu ipika꞉ make pa꞉ta꞉ mokaeyekeme. 43Kutupa pomu lopena꞉ta꞉ mo kinima꞉ ipika꞉ yaapo peao hosima꞉ yola pula꞉ ale mo Diosepe pa꞉ta꞉ halaata꞉ mo ipika꞉ handeteke haemeke haliwekita꞉ Diosepe titina꞉ amba꞉la pulu hata꞉ e̱ wi la꞉ moneaaso alota꞉ Pota꞉ pilae. Pota꞉ pilae laa lena꞉ leekeme. Koto ekina꞉ta꞉ Diosepeta꞉ Idiepi kenke paeyao pa꞉ta꞉ kapomanina꞉ handeteke hala꞉ hali pitiekeme. 44Mo kinima꞉ ipiki pa꞉ta꞉ alota꞉ I̱ta꞉ kini ya꞉la꞉ ekina꞉ do Idiepi kenke paeyao pa꞉ta꞉ hala꞉ some homeke ma꞉nda꞉ sikima꞉ nakana꞉ma꞉ a꞉pa꞉la꞉ma꞉ aleeki na miki hata꞉ta꞉ kiki anke kone na mea mina꞉liaena꞉e leekeme. 45-46Kutupa Diosepeta꞉ mo Idiepi biki ma꞉nda꞉ Sa꞉pena꞉de Pania halaata꞉ mo Heliopolisi daoni pa꞉ta꞉ hayeke yeni peao hayeke hali Podipitana꞉ waneke A꞉sena꞉de mina꞉ haleekeme.
Diosepeta꞉ 30 bapina꞉ mo Idiepina꞉ kinina꞉ e kini pea pokaeyekeme. Ipikita꞉ mo kinina꞉ da mina꞉pa꞉lao mo Idiepi kenke honiki paeyao pa꞉ta꞉ pomu lopeekeme. 47Mo ne tandepeeke bapi wataake hata꞉ pa꞉ta꞉ta꞉ ota꞉ ne tieke opeeketa꞉ 48Diosepema꞉ meata꞉ mo daoni pa꞉ta꞉manu da a꞉eya mu mombeleekeme. Daoni homeke homeke pa꞉ta꞉ta꞉ koto daoni tea꞉na꞉ hao yapeeke e pa꞉ta꞉manu ne meata꞉ da a꞉eya mu momba꞉la wia꞉tiki piekeme. 49Kunima꞉ handeke widita꞉ ota꞉ tieke wieke ekiyalo Diosepema꞉ta꞉ tombo mieke ekita꞉ mina꞉pa꞉laeyekeme. Mo widita꞉ dawalana꞉ houma꞉ handeekeme.
50Mo tea꞉ ki epolo pia꞉ bapimanu a̱i̱ na epeke haena꞉ta꞉ A꞉sena꞉dema꞉ Diosepena꞉ weki yaapo mendiaeyekeme. 51Diosepema꞉ alota꞉ Mo Tekehalima꞉ta꞉ mo I̱ma꞉ mua꞉ ka꞉nda꞉manu make yaka tapake make hone yonka꞉lano la꞉la꞉me laata꞉ Mo mupeke wekina꞉ bikita꞉ Ma꞉na꞉sa꞉ leekeme. 52Kutupa make alota꞉ Koda꞉ma꞉ta꞉ mo yaka ka꞉nda꞉ molo kenke pa꞉ta꞉ wekiwandiki ka꞉la꞉me laa mo yaapo peao mendieke wekina꞉ bikita꞉ Ipoteimi leekeme.
53Kutupa mo hande Idiepi tapakena꞉ ne tande peeke ta꞉na꞉ma꞉ homemeke wataake hata꞉ bapita꞉ paelo epeekeme. 54Kutupa mo hande Diosepema꞉ leeke tupa꞉ kone mo tea꞉ kina꞉ wataake hata꞉ bapi kini piekeme. Kenke ma꞉nda꞉ ma꞉nda꞉ pa꞉ta꞉ta꞉ tea꞉ ki tieke epeekepate Idiepi kenke pa꞉ta꞉ homeketa꞉ ne pa wiekeme. 55Mo Idiepi wanda꞉ hali tea꞉ma꞉ homolota꞉ mo kini pa꞉ta꞉ nena꞉ honke loloendi pimikime. Koto ekina꞉ mo kinima꞉ ikita꞉ Diosepe pa꞉ta꞉ pena꞉ laata꞉ mo ipikana꞉ma꞉ pipe lelia꞉eki pia꞉pa꞉peke laa leekeme. 56Mo tea꞉ kita꞉ mo Idiepi kenke paeyao pa꞉ta꞉ putupolo hata꞉ ota꞉ hoeya꞉tia peeke handa Diosepema꞉ta꞉ mo ne damanu lumba mo Idiepi wanda꞉hali pa꞉ta꞉ widimanu tapatiki piekeme. 57Mo tea꞉ kita꞉ kenke ta꞉ta꞉ ta꞉ta꞉ paeyao pa꞉ta꞉ ota꞉ hoke tupa꞉ putupieke handaa mo kenke ta꞉ta꞉ ta꞉ta꞉ pa꞉ta꞉ haemeke wanda꞉halita꞉ oni Idiepi da pa꞉ta꞉ widi hambuluekema꞉ Diosepe pa꞉ta꞉ epemekeme.
اکنون انتخاب شده:
Kini Pieke 41: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید