Kini Pieke 27
27
Aisa꞉kema꞉ Dieikope epeayekeeki
1Aisa꞉keta꞉ ameta꞉ koke yaa leke holu piekeme. Ipikana꞉ma꞉ ipika꞉ mupeke weki Iso wi la꞉ mea alota꞉ Yaka wekio leekeme. Mo wekima꞉ hombo peaaso alota꞉ Wae leekeme. 2Koto leeke Aisa꞉kema꞉ alota꞉ Ameta꞉ I̱ koke ya homolo poloeki teke pa꞉ta꞉ ya꞉la꞉ ekita꞉ do handele handa꞉e. 3Koto ekina꞉ naka꞉ semoko a꞉ndeli mea oni hapekena꞉ pua hoteke ma꞉nda꞉ lia a꞉pa꞉peke. 4Kutupa mo yaka hone pa꞉la꞉ tendepiki ne yankao I̱ pa꞉ta꞉ mea a꞉pa꞉peke. Kutupa naa pita꞉ta꞉ mo I̱ homuluekema꞉ pita꞉ yaka paeyaaso epeaasa꞉eki neke kuluekema꞉ loa꞉me leekeme.
5Kutupa Aisa꞉kema꞉ Iso pa꞉ta꞉ pi la haleeketa꞉ Lepekama꞉ opu hayekeme. 6Kutupa ipikana꞉ma꞉ Dieikope pa꞉ta꞉ alota꞉ Naka꞉ apa꞉ma꞉ Iso pa꞉ta꞉ lea꞉eki I̱ma꞉ dupa opolome. 7Hoteke ma꞉nda꞉ mea a꞉pa yaka hone pa꞉la꞉ tendepiki ne yankapeke. Kutupa naa pita꞉ta꞉ I̱ homuluekema꞉ pita꞉ Tekehalina꞉ leke popelekena꞉ neke pa꞉ta꞉ yaka epeaasa꞉eki kuluekema꞉ loa꞉me lea꞉me leekeme. 8Kutupa Lepekama꞉ ombu alota꞉ Yaka wekio. Ameta꞉ I̱ma꞉ alo pi opua pie. 9Oni ma꞉na꞉manu hala꞉ pa꞉ta꞉ pua panka wiki nanikosi ikiki yaapo mea epoe. Koto ekima꞉ta꞉ mo naka꞉ apa꞉na꞉ ta꞉na꞉ma꞉ homo hala꞉ ne yankaluekema꞉ loa꞉me. 10Kutupa ipikana꞉ma꞉ nena꞉ nakana꞉ma꞉ mea pekena꞉ta꞉ kota꞉ ipiki homuluekema꞉ pita꞉ ipika꞉ epeaasa꞉ ekita꞉ neke kina꞉ loa꞉me leekeme.
11Pate Dieikopema꞉ ipika꞉ ama꞉ pa꞉ta꞉ alota꞉ Isota꞉ itiki pelipa pa꞉la꞉pate yaka loketa꞉ homu pa꞉la꞉me laa hone wilime. 12Ma꞉nda꞉ta꞉ yaka apa꞉ma꞉ I̱ watao I̱ma꞉ ipiki makeaasoma꞉ laa I̱ handa꞉ wiaapa꞉na꞉e. Dupua꞉ka꞉na꞉ta꞉ kota꞉ mo epeaasa꞉eki mina꞉la꞉ tupa꞉ paa yaka kone I̱ pa꞉ta꞉ esihou pi mea epena꞉ lapeke yeke loa꞉me leekeme.
13Koto leeke ipika꞉ ama꞉ma꞉ hombo peaaso alota꞉ Yaka wekio. Koto ipilia꞉ esihou pi manuta꞉ I̱ pa꞉ta꞉ epena꞉ma꞉ pa mo I̱ma꞉ aloeki pua pie. Mo nanikosi yaapo pua meawae leekeme. 14Koto leeke Dieikopema꞉ mo nanikosi yaapo mulu pua inkiki pa꞉ta꞉ mea epeekeme. Kutupa mo wanda꞉ma꞉ta꞉ mo wekina꞉ atekema꞉ ta꞉na꞉ma꞉ homeeke nema꞉ handekeeki yankaeyekeme. 15Kutupa mo wanda꞉ma꞉ oni da pa꞉ta꞉ Isona꞉ amu pea wiayeke dau manuta꞉ mea Dieikopena꞉ pambawaeyekeme. 16Mo nanikosi yaapona꞉ yonkeleke manuta꞉ mo wekina꞉ kiki yaapona꞉ pambawaeyeke make kutupa ipika꞉ itiki na pelieke alena꞉ tonka꞉na꞉ pambawaeyekeme. 17Mo wanda꞉ma꞉ta꞉ mo weki pa꞉ta꞉ mo tendepiki ne make mo yankeeke betedi make haleekeme.
18Kutupa Dieikope ipika꞉ apa꞉ pa꞉ta꞉ pua alota꞉ Apa꞉o leekeme. Atekema꞉ hombo peaaso alota꞉ Wae. Neketa꞉ weki epi yaka꞉ta꞉pe leekeme.
19Dieikopema꞉ hombo peaaso alota꞉ I̱ta꞉ naka꞉ mupeke weki Isoe. I̱ma꞉ta꞉ naka꞉ hande pea꞉pekee le hau pealome. Koto ekina꞉ mo epeaasa꞉ ekimanu I̱ pa꞉ta꞉ kuelena꞉ma꞉ pilisi tiao pita꞉ mo I̱ma꞉ mea a꞉palo hoteke nae leekeme.
20Koto leeke Aisa꞉kema꞉ alota꞉ Yaka wekio. Ekipa a̱i̱ handa꞉ wia pelepe leekeme. Dieikopema꞉ hombo peaaso alota꞉ Mo Tekehali naka꞉ Koda꞉ma꞉ handa꞉ wiono I̱ tamba꞉ mia꞉me leekeme.
21Aisa꞉kema꞉ Dieikope pa꞉ta꞉ alota꞉ Pilisio. I̱ma꞉ neke wataalo polo tupa꞉ teke pa꞉ta꞉ epoe. Neketa꞉ ota꞉ Iso ka꞉ta꞉pe leekeme. 22Dieikopeta꞉ ipika꞉ apa꞉ pitia꞉ alena꞉ paa teke pa꞉ta꞉ pua pitiekeme. Kutu pieke atekema꞉ watao alota꞉ Naka꞉ pi ho̱la̱꞉maketa꞉ Dieikopena꞉ ekima꞉ handa꞉la꞉pate pa naka꞉ kikita꞉ Isona꞉ kiki wataake nono pa꞉la꞉me leekeme. 23Ipikana꞉ma꞉ Dieikopee laa na handa꞉ wieke ekita꞉ mo ipika꞉ kiki manuta꞉ Isona꞉ ekima꞉ handa itiki pelipa peeke ekima꞉ piekeme. Ipikana꞉ma꞉ ipika꞉ epeaasa꞉ ekimanu teke pa꞉ta꞉ haluekema꞉ pitiekepate kone 24paa lota꞉ pitolo alota꞉ Neketa꞉ ota꞉ Iso ka꞉ta꞉pe leekeme. Mo wekima꞉ hombo peaaso alota꞉ Aowe I̱e leekeme.
25Kota꞉ Aisa꞉kema꞉ alota꞉ Mo mandane hoteke mea a꞉pae. Naa pita꞉ta꞉ yaka epeaasa꞉eki neke pa꞉ta꞉ kulueke leekeme. Koto leeke Dieikopema꞉ta꞉ ne mea a꞉pao make nolo pieke waini ikali make mea a꞉paeyekeme. 26Kutupa mo weki pa꞉ta꞉ ipika꞉ apa꞉ma꞉ alota꞉ Yaka wekio. I̱ teke pa꞉ta꞉ a꞉pa I̱ nunu pie leekeme. 27Ipikana꞉ma꞉ ateke nunu pulueke alo hata꞉ teke pa꞉ta꞉ epea꞉ dina꞉ta꞉ Aisa꞉kema꞉ mo yameeke aka꞉manu totopo mu hao ipika꞉ epeaasa꞉ ekimanu haleekeme. Ipikana꞉ma꞉ alota꞉
Do yaka wekina꞉ totopo epeke pita꞉la꞉ ekita꞉ mo hande Tekehalima꞉ epeala꞉ hama꞉na꞉ totopoma꞉ handa꞉la꞉me.
28Koda꞉ma꞉ oli ya nanema꞉ ekepipida꞉ kitolo naka꞉ hama꞉manu ne tieke wina꞉e. Kutupa widi make waini ikali make wopu kina꞉e.
29Tutu manuta꞉ naka꞉ e pokaasa꞉ tapake haena꞉e. Kutupa wanda꞉hali neke pa꞉ta꞉ panda꞉puniaena꞉e. Naka꞉ tapake paeyao handeteke halena꞉e. Naka꞉ ama꞉na꞉ monduma꞉ monduma꞉ pa꞉la꞉ wekiwandikina꞉ wekiwandikima꞉ neke pa꞉ta꞉ panda꞉puniaena꞉e.
Mo neke pa꞉ta꞉ esihou tunkilimi tapaketa꞉ esihou pa꞉ta꞉ haena꞉e. Kutupa neke epealimi wanda꞉halita꞉ iki make epeaasa꞉eki mina꞉e laa leekeme.
Isoma꞉ Aisa꞉kena꞉ epeaasa꞉eki honke leekeeki
30Aisa꞉kema꞉ ipika꞉ epeaasa꞉eki halaa Dieikope pulu haena꞉ta꞉ ipika꞉ hameke eiya꞉na꞉ hao honda꞉ pambolo epeekeme. 31Ipikana꞉ma꞉ make tendepiki ne yankao ateke pa꞉ta꞉ mea pua alota꞉ Pilisi apa꞉o. Mo naka꞉ epeaasa꞉eki I̱ pa꞉ta꞉ kuelena꞉yeke I̱ma꞉ do mea a꞉palo hoteke ma꞉nda꞉ noelena꞉ tiao pitie leekeme.
32Aisa꞉kema꞉ hombo peaaso alota꞉ Neketa꞉ epi ya꞉ka꞉ta꞉pe leekeme. Ipikana꞉ma꞉ hombo peaaso alota꞉ Naka꞉ mupeke weki Isoe leekeme.
33Aisa꞉keta꞉ tola꞉tia pominolo hata꞉ pututu liaaso alota꞉ Mo hoteke lia I̱ pa꞉ta꞉ mea epea꞉ta꞉ epi ya꞉ka꞉ta꞉pe. Neke amba꞉ do honda꞉ pambolo ipuluekema꞉ halena꞉ kone noa꞉me. Yaka paeyaaso epeaaso ekita꞉ ipiki pa꞉ta꞉ haloa꞉ma꞉ ameta꞉ ota꞉ ipika꞉eki homeke u halieke leekeme.
34Isoma꞉ doeki opu haota꞉ ka꞉pa꞉puki yoka anekema꞉ e̱ wi tieke alo hata꞉ alota꞉ Apa꞉o. I̱ make naka꞉ epeaasa꞉eki kie laa honke leekeme.
35Aisa꞉kema꞉ hombo peaaso alota꞉ Naka꞉ kamema꞉ I̱ a꞉pa makeaaso naka꞉ epeaasa꞉eki mea pu moneala꞉me leekeme.
36Isoma꞉ alota꞉ Dota꞉ ipika꞉ hoto yaapo peao I̱ makeala꞉me. Koto ekina꞉ ipika꞉ biki Dieikopeta꞉ ota꞉ ana꞉piki tupa꞉ laa pimika꞉ta꞉me. Ipikana꞉ma꞉ta꞉ yaka mupeke wekina꞉ anke teke mulu poloeki make mea ameta꞉ yaka epeaasa꞉eki make mea pua pika꞉ta꞉me. Koto ekina꞉ I̱ta꞉ epeaasa꞉eki ma꞉nda꞉ na panka꞉ wialepe leekeme.
37Aisa꞉kema꞉ hombo peaaso alota꞉ I̱ma꞉ta꞉ ipikana꞉ma꞉ neke ankulao you haena꞉ laa ipika꞉ tapakemanu maketa꞉ ipika꞉ pa hameke e pokaasa꞉ tapake haena꞉ loa꞉me. I̱ma꞉ta꞉ widi make waini ikali make haloa꞉me. Ota꞉ yaka wekio. Neke pa꞉ta꞉ pulu polo ekita꞉ ma꞉nda꞉ dia꞉me leekeme.
38Koto leekepate kone Isoma꞉ta꞉ ateke pa꞉ta꞉ honke ombu alo hata꞉ alota꞉ Apa꞉o. Mo epeaasa꞉eki homeke siki make ota꞉ ma꞉nda꞉ na wilipe. Apa꞉o. I̱ make epeae alo hata꞉ e̱ leekeme.
39Kota꞉ Aisa꞉kema꞉ ipiki pa꞉ta꞉ alota꞉
Oli ya nanema꞉ ekepipida꞉ neke ma꞉nda꞉ na kina꞉e. Kenke epeke wiki hama꞉ ma꞉nda꞉ dia꞉me. 40Neketa꞉ naka꞉ bainasi yaapo hao pelipikie. Pate neketa꞉ naka꞉ kamena꞉ pa hameke e pokaasa꞉ hali halipikie.
Kutu pulu pa꞉la꞉pate wetepena꞉ a꞉nda꞉ liata꞉ mo ipika꞉ handeteke halia꞉eki pendulu bao pelipikie leekeme.
41Atekema꞉ mo hande epeaasa꞉eki hameke pa꞉ta꞉ haleeke handaa Isoma꞉ta꞉ Dieikope honditi piekeme. Ipika꞉ honema꞉ alota꞉ Yaka apa꞉ta꞉ teke pa꞉ta꞉ homolo pa꞉la꞉ ekina꞉ ipika꞉ homa꞉ da pitulu polo ekita꞉ teke pa꞉ta꞉ ya꞉la꞉ma꞉ Dieikope homena꞉ lulueke hone wiekeme.
42Pate Lepekama꞉ Isona꞉ pulueke leeke ekimanu amba꞉ opu hao Dieikope epoa꞉ la alota꞉ Opie. Naka꞉ kame Isoma꞉ta꞉ hombo peaaso hata꞉ neke lu homalueke ala꞉me. 43Koto ala꞉ma꞉ yaka wekio. I̱ma꞉ pie aloeki pia꞉peke. Mo yaka ana꞉ Leibeni hala꞉ alena꞉ Hatani nane ame do kone pue. 44Kutupa ipiki yaapo hosiki haota꞉ mo naka꞉ kamena꞉ mineke panka꞉la꞉eki uniao 45ipiki pa꞉ta꞉ peleeki hone yonka꞉laena꞉ loa꞉me. Kutupa neke handa꞉ mulu epena꞉ta꞉ ma꞉nda꞉ tapaalueke. I̱ma꞉ta꞉ pa ekipeke yaka weki yaapo homeke natena꞉ alupalua꞉pe leekeme.
Aisa꞉kema꞉ Dieikope Leibeni pa꞉ta꞉ tapaeyekeeki
46Lepekama꞉ Aisa꞉ke pa꞉ta꞉ alota꞉ Do Isona꞉ da ma꞉nda꞉ wanda꞉ yaapo handa꞉peketa꞉ I̱ta꞉ ota꞉ ki tieke pea soka꞉la꞉ pita꞉la꞉me. Dieikopema꞉ make do Hidi wandiki tonu ma꞉nda꞉ mia꞉ka꞉na꞉ta꞉ kota꞉ I̱ta꞉ homa꞉peke make ya꞉la꞉me leekeme.
اکنون انتخاب شده:
Kini Pieke 27: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید