Kini Pieke 20
20
Eipoloha꞉ma꞉ pita꞉ Abimeleke yaapo
1Eipoloha꞉ma꞉ma꞉ta꞉ Ma꞉mote mina꞉pa꞉lao Keinanina꞉ ka꞉wa꞉ nanema꞉ tilao mo Keidese make Sia꞉e kenke yaapo tukikina꞉ pua pitiekeme. 2Kutupa ipikana꞉ma꞉ Kita kenke pa꞉ta꞉ pua hata꞉ Setata꞉ ipika꞉ beliki leekeme. Koto leeke handa mo Kita kenkena꞉ kini Abimelekema꞉ Setata꞉ hatuku ipiki pa꞉ta꞉ epena꞉ leekeme. 3Timba ma꞉nda꞉ta꞉ mo some pa꞉ta꞉ Koda꞉ma꞉ upama꞉ a꞉pa alota꞉ Nakana꞉ma꞉ do amba꞉ ma꞉nda꞉ma꞉ ma꞉la꞉ wanda꞉ mele ekina꞉ neke homilipikie leekeme.
4Pate Abimeleketa꞉ mo wanda꞉ teke pa꞉ta꞉ na epeeke ekina꞉ alota꞉ Tekehalio. I̱ta꞉ hokeeki ma꞉nda꞉ na poloma꞉ I̱ make yaka wanda꞉hali make hoeyalipikipe. 5Eipoloha꞉ma꞉ma꞉ta꞉ ipika꞉ ana꞉e leeke handa mo wanda꞉ma꞉ make homeke pi kone lea꞉me. Koto ekina꞉ I̱ma꞉ do hauta꞉ yaka honema꞉ tikitiki pieke handa dupiki hau pua꞉me. Kutupa I̱ma꞉ta꞉ hoke hau ma꞉nda꞉ na polome leekeme.
6Koda꞉ma꞉ upama꞉ hombo peaaso alota꞉ Ota꞉e. Nakana꞉ma꞉ tikitiki pieke handaa pi ekina꞉ nakana꞉ma꞉ I̱ pa꞉ta꞉ hoke hau pilipiki yeke nakana꞉ma꞉ mo wanda꞉ na wataalena꞉ loa꞉me. 7Koto ekina꞉ ameta꞉ mo wanda꞉ ipika꞉ haliki pa꞉ta꞉ paa hala꞉peke. Mo halita꞉ potopede hali halekena꞉ ipikana꞉ma꞉ nekena꞉ yeni peaya꞉ka꞉na꞉ta꞉ kota꞉ neke na homilipikie. Pate mo wanda꞉ pa na haleka꞉na꞉ta꞉ kota꞉ neke kinki pitoloma꞉ laa neke make naka꞉ wanda꞉hali make homilimikie leekeme.
8Da kelepeeketa꞉ Abimeleke ipika꞉ you haliweki wi la꞉ mepi pea mo piekeeki la haleeke handaa mo haliwekita꞉ paala꞉ma꞉ homemekeme. 9Kutupa Abimelekema꞉ Eipoloha꞉ma꞉ wi la꞉ mea alota꞉ Nakana꞉ma꞉ niki pa꞉ta꞉ dota꞉ ekipiki hau pea pelepe. Nakana꞉ma꞉ I̱ pa꞉ta꞉ make yaka kilu tombuao halo pa꞉ta꞉ do hoeyaapekeeki epena꞉ leke hauta꞉ I̱ma꞉ neke pa꞉ta꞉ ekipiki ata꞉ka꞉ poleke pelepe. Nakana꞉ma꞉ do I̱ pa꞉ta꞉ pele ekita꞉ ota꞉ ma꞉nda꞉ma꞉ na pea꞉peke hau peleme. 10Koto ekina꞉ ekipeke do hau pea pelepe leekeme.
11Eipoloha꞉ma꞉ma꞉ hombo peaaso alota꞉ Yaka honema꞉ta꞉ do pate Koda꞉ paala꞉piki some ma꞉nda꞉ na halieke hone wia yaka wanda꞉ muluekema꞉ I̱ limikie hone ua꞉me. 12Pate mo wanda꞉ta꞉ ota꞉ yaka ana꞉e. Ipikita꞉ yaka apa꞉na꞉ waneke ya꞉la꞉pate ama꞉ homeke ta꞉ta꞉e. Kota꞉ I̱ma꞉ mea polome. 13Koto ekina꞉ Koda꞉ma꞉ I̱ yaka apa꞉na꞉ da mina꞉pa꞉lao ma꞉nda꞉na꞉ kenke pa꞉ta꞉ pu leeke puluta꞉ I̱ma꞉ mo wanda꞉ pa꞉ta꞉ alota꞉ Nakana꞉ma꞉ I̱ oto pa꞉ta꞉ haleeki walolo hata꞉ paeyao pa꞉ta꞉ I̱ta꞉ naka꞉ ana꞉e lapeke laa loa꞉me leekeme.
14Kutupa Abimelekema꞉ Setata꞉ Eipoloha꞉ma꞉ paa halolo hata꞉ make homeke dina꞉ koneta꞉ sipisipimanu make kaomanu make pa hameke e pokaasa꞉ wanda꞉hali make apa꞉tao haleekeme. 15Ipikana꞉ma꞉ Eipoloha꞉ma꞉ pa꞉ta꞉ alota꞉ Dota꞉ yaka kenkema꞉ naka꞉ hone pa꞉la꞉ alena꞉ hae leekeme. 16Kutupa Seta pa꞉ta꞉ alota꞉ Mo neke ame̱le̱ haleme wanda꞉halima꞉ neketa꞉ hokeeki na ula꞉me laa waloelena꞉ make hokeeki ma꞉nda꞉ na peleme hone wina꞉ I̱ma꞉ naka꞉ ana꞉ pa꞉ta꞉ mo silipa manimanu 1 daoseni do halolo handa꞉e leekeme.
17-18Kutupa mo Eipoloha꞉ma꞉na꞉ weteke Seta pa꞉ta꞉ pieke ekina꞉ Tekehalima꞉ta꞉ mo Abimelekena꞉ kini da pa꞉ta꞉ haemeke wanda꞉manu paeyaota꞉ weki mendia꞉la꞉ hauta꞉ sa꞉sa꞉ piekeme. Koto ekina꞉ Eipoloha꞉ma꞉ma꞉ Koda꞉ pa꞉ta꞉ Abimelekena꞉ yeni peayeke handa epeayekeme. Kutupa make mo ipika꞉ wanda꞉ make mo ipika꞉ pa hameke e pokaemeke wandiki titi make weki mendina꞉ yeke epeayekeme.
اکنون انتخاب شده:
Kini Pieke 20: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید