MARK 9
9
Taang a meel kihendangna
1Huin ama’n a kawmvah, Chihtahzetin ka hung hilh ahi, Hi muna dingte khenkhat chu Pathian gam silbawltheihna toh hung tung a muh masiah uh sihna chiam lou diing a um uh, a chi a. 2Huleh ni guup nungin Jesu’n Peter toh, Jakob toh, John a pui a, a tuam in taang saang tung khat ah amahuh chauh a puitou a; huleh a ma vah a meel ahung kihengdangta hi. 3Huchi'n a puansilh chu leitung a puansawp koimah in huchibanga a sawp ngou theih louh diing khopin, vuuh bang mai in a ngou in a ngou a, 4Huleh Elijah leh Mosi a kawmah ahung kilang va; Jesu toh a kihou khawm uh. 5Huin Peter in a houpih a, a kawmah, Houtupa, ei uh diingin hitaha um a hoih hi; buuh thum i bawl diing a; khat nang a diingin, khat Mosi a diingin, huleh khat Elijah a diingin, a chi a. 6Ajiahchu, a lau mahmah jiahun a soi diing pen zong a he sih hi. 7Huin meilum lom khat in amahuh ahung liah a; huleh meilum laha kipanin aw ahung ging a, Hichu ka Tapa deihtah ahi; a thu ngai un, a chi a. 8Huleh kintah a, a kiimvel uh a etpah uleh, Jesu chih louh a kawmvah midang koimah a muta sih uhi. 9Huleh taang apat ahung kumsuh laiun, mihing Tapa misi laha kipan a thohkiit masiah a sil muhte uh koimah hilh lou diingin a khap chat hi. 10Huleh hu thu chu a lungsim vah a vom zing va, Misi lah apat a thohkiit chih pen bang chihna hi diing a diai? chi'n a kidong uh. 11Huleh amahun, Bang diinga lehkhagialtute’n Elijah hung masa diing ahi chi ahi viai, chi'n amah a dong va. 12Huleh ama’n a dawng a a kawmvah, Elijah chu hung masa a, sil zousiah a bawl hoih diing mawng ahi; ahihleh mihing Tapa in sil tampi a thuaah diing a, huleh deih louhin a um ngei diing ahi, chia a tanchin bangchidana kigial a diai? 13Hizongleh ka hung hilh ahi, Hu Elijah chu a hung zouta a, huleh a tanchin a gelh bang ngei un a tungah a utut uh a bawlta uhi, a chi a.
Pasal naupang dawimat haamthei lou suhdamna
14Huleh amah a nungjuite kawma ahung tunin, a kiim va mipi nasatah leh lehkhagialtute’n amahuh ana nial uh a mu a; 15Huleh mipi zousiah in amah a muh tahun limdang a sa mahmah va, a kawma tai in chibai a va buuh uh. 16Huin ama’n lehkhagialtute kawmah, Amah u’toh bang kinial na hi viai? chi'n a dong a. 17Huin mipi laha khat in a dawng a a kawmah, Houtupa, ka tapa haam thei lou dawi paai na kawmah ka hung pui hi; 18A matna mun phot ah a heeh puuh jel a; huchi'n a chilphuan bua in, a ha bang a gawi a, a gawng deuhdeuh hi; huchi'n na nungjuite kawma hung nohdohsah un ka chih leh a bawl thei sih uh, a chi a. 19Huin ama’n amah a dawng a, Aw ginna nei lou khang thahte, na kawm va bangtan ahiai ka um diing? bangtan ahiai ka hung thuaahtheih diing? amah chu ka kawmah hung pui un, a chi a. 20Huleh amah chu a kawmah ahung pui va; huleh dawi in amah chu a muh tahin naupang chu nasatahin a soisapah a; huchi'n tualah a puuh a, chilphuan bo zengzungin a kitaal lehleh hi. 21Huleh ama’n a pa kawmah, Hichibang ahung hihna bangtan ahitai? chi'n a dong a. Huin ama’n, A naupan laia kipanin ahita. 22Huchi'n amah hihlum diingin khatvei chiangin mei laiah leh tui lahah a sawn luut veu a; hizongleh nangin bang aha na bawl theih leh hung hehpih inla, hung panpih in, a chi a. 23Jesu’n a kawmah, Na gintaat theih phot leh a gingtate diingin sil zousiah ahithei hi, a chi a. 24Huin naupangpa pa chu a kikoupah a; huleh mithi luang pum in, Lalpa, ka gingta hi, ka ginlahna hung panpih in, a chi a. 25Huin Jesu’n mipi hung taikhawm a muh tahin dawiniin chu a tai a, a kawmah, Nang haamtheih louhna leh bilngonna dawi, thu ka hung pia hi, a sung apat hung pawt inla, luut kiit nawn sin, a chi a. 26Huin dawi chu a kikou a, nasatahin a soisa a, hu zohin ahung pawtta a; huleh naupang chu mi tampite’n, A si ahi, a chih diing khop un ahung umta hi. 27Hizongleh Jesu’n amah chu a khut in a tu a, a phong a, huleh ahung thouta hi. 28Huleh inn sunga ahung luut in a nungjuite’n, Bang diinga kei un nohdoh thei lou ka hi viai? chi'n a guuhdot va. 29Huleh ama’n a kawmvah, Hitobangte hi haamteina leh angawl na loungal in a pawt thei sih hi, a chi hi.
A sih diing leh thohkiit diing soilawhna nihveina
30Huleh hu a kipanin a chiahdoh va, Galili gam a tawnpeh va; huleh koimah heet diing a ut sih hi. 31Ajiahchu a nungjuite thu a hilh a, a kawmvah, Mihing Tapa chu mite khut ah a kipedohta, huchi'n a that diing va, huleh a sih nung ni thum ni in a thou kiit diing, a chi a. 32Hizongleh amahun a thusoi chu a hesiam sih va, dong laha dong ngam sih uhi.
Mi lianpen hih diing thu a kinialna
33Huleh amah chu Kapernaum khua ahung tung a, inn sunga a um laiin a kawmvah, Lampi a hu na kinialna uh bang ahiai? chi'n a dong a. 34Hizongleh amahuh chu a sipkeei uh; ajiahchu lampi ah koi ahiai lianpen diing, chi'n ahung kinial zouta uhi. 35Huin amah chu a tou a, sawmlenihte a kou a, a kawmvah, Mi koipouh a masapen hih ut chu a nunungpen ahi diing a, huleh mi zousiah natong in a um diing ahi, a chi a. 36Huin ama’n naupang neutakhat a kai a, a lailung vah a dingsah a; huleh a pom zohin a kawmvah, 37Mi koipouh ka mina hitobang naupang neutakhat sang chu kei hung sang ahi; huleh mi koipouh kei hung sang chu, kei hung sang hilouin ahung sawlpa sang ahi zaw hi, a chi hi.
Jesu’n kituambawlna a taina
38Huleh John in, Houtupa, mi khat na min a dawite nohdoh ka mu va, kei uh ahung zui sih a; huleh keiuh ahung zuih louh jiahin ka khapta uhi, chi'n amah a dawng a. 39Hizongleh Jesu’n, Khap sih un; ajiahchu ka min a sil loupi bawl ngal a, kei hung soise meimei thei mi a um sih hi, 40Ajiahchu koi hitaleh ei hung dou lou chu ei lam a pang ahi. 41Mi koipouh ka min a hih jiah va, ka min a tuisih nou khat dawn diing a hung pia inchu, chihtahzetin ka hung hilh ahi, a kipaahman muh diing a taan hial sih diing hi.
Jesu’n gawtmun lauhuaizia a hilhna
42Huleh koipouh kei hung gingta hi naupang neutatate laha khat zong supuuh chu, a ngawngah sumheeh suang lianpi ki-ohsah henla, tui khang lian ah kipaailuut leh amah diingin a hoihzaw diing hi. 43Huleh na khut in ahung suhpuuh leh tankhia in; khut nih nei a gawtmun mei mit thei lou a na chiah sangin, khut beia hinna a luut nang a diingin a hoihzaw hi. 44A than uh a sih louhna leh, mei kuang a mit louhna ah. 45Huleh na keeng in ahung suhpuuh leh tankhia in; keeng nih nei a gawtmun mei mit thei loua chiah sangin, keengbaai a hinna a luut nanga diingin a hoihzaw hi; 46A than uh a sih louhna leh, mei kuang a mit louhna ah. 47Huleh na mit in ahung suhpuuh leh khei khia in; mit lang nih nei a gawtmun mei kuang a paih a na um sangin mit langkhat nei a Pathian gam a luut nang a diingin a hoihzaw hi. 48A than uh a sih louhna leh, mei kuang a mit louhna ah. 49Ajiahchu michin mei kuang a soh-al in a um diing a, kithoihna chinteng chia soh-al in a um diing hi. 50Chi chu a hoih a; hizongleh chi in a alna mangsah taleh bangchi'n na alsah kiitta diviai? Nanguh ngeiah chi kineih unla, huleh khat leh khat kilem in um un, a chi hi.
اکنون انتخاب شده:
MARK 9: SIMTBSI
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
