MARK 2
2
Mizeng suhdamna
1Huleh ni bangzah aha nungin Kapernaum khua ah a luut kiit a, huleh inn ah a um chih thu ahung thangta a. 2Huleh kotkhaah kiim tanpha a, umna diing um lou khopin mi tampi ahung kikhawmpah va; huleh ama’n a kawmvah thu a soi hi. 3Huleh mizeng khat mi li in hung zawngin a kawmah ahung pui va. 4Huleh mitam jiaha a kawm nai a ahung theih louh tahun a umna inn tung a hong va; huleh a pheet vang zohun, mizeng chu a lupna toh a khaikhesuh uhi. 5Jesu’n a gindan uh a muh in mizeng kawmah, Tapa, na sualnate ngaihdam ahita, a chi a. 6Hizongleh lehkhagialtute khenkhat hu muna tou a um va, a lungsim un, 7Bang diinga hi pa’n Pathian soisia a hichibang thu a soi ahiai? Pathian chauh loungal koi ahiai sualnate ngaidam thei? chi'n a ngaihtuah uhi. 8Huleh Jesu’n a lungtang un huchibangin a ngaihtuah uh chih a lungsim in ana hepah a, a kawmvah, Bang diinga hi thute na lungtang va ngaihtuah na hi viai? 9Mizeng kawma, Na sualnate ngaihdam ahita, chih leh, Thou inla na lupna la inla, keengin chiahta in, chih khoi a baihlamzaw ei? 10A khoi hitaleh mihing Tapa’n leitung ah sualnate ngaihdam theihna, a nei chih na heetna diingun, (mizeng kawmah), 11Thou inla, na lupna la inla, na inn lamah chiahta in ka hung chi ahi, a chi a. 12Huleh amah chu a thoupah a, a lupna la in a bawn va mitmuh ah a chiahdohta hi; huchi'n a bawnun limdang a sa va, Hichibang mawngmawng i mu ngei sih, chi'n Pathian a paahtawi uhi.
Levi kouhna
13Huleh amah chu diil gei ah a chiahdoh kiit a; huleh mipi zousiah a kawmah a va chiah va, amahuh thu ana hilh hi. 14Huleh a chiah pum in Alphai tapa Levi, siahdonna muna toulai a mu a, a kawmah, Hung jui in, a chi a. Huin amah chu a thou a, a juita hi. 15Huleh hichi ahung hi a, Jesu’n Levi inn a ankuang a uum leh siahdongtute leh misualte tampi in zong Jesu leh a nungjuite a uumpih va; ajiahchu tampi ahi va, a nung a jui uhi. 16Huleh lehkhagialtute leh Pharisaite’n siahdongtute leh misualte toh an nekhawma amah a muh tahun, a nungjuite kawmah, Bangchidan ahiai siahdongtute leh misualte toh a neeh a, a dawn? a chi va. 17Jesu’n hichu a jah tahin, a kawmvah, Mi damte’n doctor a mamoh sih va, mi damloute’n a mamoh zaw uhi; midihtatte kou diing a hung ka hi sih a, misualte kisiihsah diing a hung ka hi zaw hi, a chi hi.
Angawl thu a dotna
18Huleh John leh Pharisaite nungjuite’n an a ngawl veu va; huleh a hung va, a kawmah, Bang diinga John nungjuite leh Pharisaite nungjuite’n an a ngawl va, nang nungjuite’n a ngawl louh uh ahiai, a chi va. 19Huleh Jesu’n a kawmvah, Moupuite kawma mouneitu a um laisiah moupuite’n an a ngawl thei ngei viai mah? Mouneitu a kawm va a um laisiah an a ngawl thei sih diing uhi. 20Hizongleh mouneitu a kawm va kipana puimang nite ahung tung diing a, hu ni chiangin chu a ngawl diing uhi. 21Mi koimah in puan lui puan thah them in a phoh ngei sih; phoh tale uh a phohna pen in a lui pen a luai keeh diing a, a susezaw sem diing hi. 22Huleh mi koimah in uain thah savun thawl lui ah a thun ngei sih uh; thun tale uh uain thah in savun thawl chu a phukeeh diing a, uain a kibo diing a, huleh savun thawl chu a seta diing hi; uain thah chu savun thawl thah a thun ngei diing ahi zaw hi, a chi hi.
Khawlni tan thua dotna
23Huleh hichi ahung hi a, khawlni in buhlei lai tawnin a chiah a; huleh a nungjuite’n a chiah kawmun buhvuite a zuut panta va. 24Huin Pharisaite’n a kawmah, En in, bang diinga amahun khawlni a bawl sianglou bawl ahi viai mah? a chi va. 25Huin ama’n a kawmvah, David leh a lawite a taahsap va, a gilkial lai va a silbawl uh na simkha ngei hial sih u'maw? 26Abiathar siampu lalpen ahihlai a, Pathian inn a, a luut a, siampute chauh loungalin neeh sianglou tanghou siah a neeh a, a lawite kawma zong a piah thu, a chi a. 27Huleh ama’n a kawmvah, Khawlni chu mihing a diing a bawl ahi a, mihing chu khawlni a diing a bawl ahi sih. 28Hujiahin mihing Tapa chu khawlni Lalpa zong ahi, a chi hi.
اکنون انتخاب شده:
MARK 2: SIMTBSI
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
