MATTHAI 8
8
Phaah suhdamna
1Huleh taang a kipata ahung paisuh in mipi nasatah in amah a jui va. 2Huleh ngai in, miphaah khat a kawmah a hung a, amah chibai a buuha, Lalpa, na ut in chu na hung susiangthou thei hi, a chi a. 3Huin Jesu’n a khut aha a, a khoih a, Ka ut hi, siangthouta in, a chi a. Huin a phaah chu a siangthoupah ngal hi. 4Huleh Jesu’n a kawmah, Koimah na hilh louh diing ahi; hizongleh chiah inla siampu va kimusah in, huleh amahuh heetsahna diing a Mosi’n thu a piah sillat ding chu va pia in, a chi hi.
Sepaih zahoutu suaahpa suhdamna
5Huleh Jesu Kepernaum a, a luut in, a kawm ah sepaih zahoutu khat a hung a, amah ahung ngen a, 6Lalpa, ka suaahpa chu zeng in inn ah a lum a, nasataha suhnat in a um hi, a chi a. 7Huin Jesu’n a kawmah, Ka hung diing a ka sudam diing, a chi a. 8Sepaih zahoutu’n a dawng a, Lalpa, ka inn sunga na hung luutnataah ka hi sih hi; thu chauh soi in, huchi'n ka suaahpa chu a dam mei diing. 9Ajiahchu kei zong thuneihna nuaia um ka hi a, ka nuaiah sepaihte a um va; huleh khat kawmah, Chiah in, ka chihleh a chiah a, huleh a dang kawmah, Hung in, ka chihleh a hung a; huleh ka suaahpa kawmah, hi bawl in, ka chihleh a bawl jel hi, a chi a. 10Jesu’n hi thu a jah tahin, limdang a sa a, amah juite kawmah, Chihtahzetin ka hung hilh ahi, Israelte laha zong hichilawm a ginna lian ka mukha sih. 11Huleh ka hung hilh ahi, Suahlam leh tumlam apatin mi tampi a hung diing va, vaan gam ah Abraham toh, Isaak toh, Jakob toh a toukhawm diing uhi. 12Hizongleh lalgam tate chu polam mial ah paihdoh in a um diing uh; huah chu kah leh hagawi a um diing hi, a chi a. 13Huin Jesu’n sepaih zahoutu kawmah, Chiahta in; na gintaat bangin na tungah hung tungta heh, a chi a. Huleh a suaahpa chu hu daah mahin a damta hi.
Simon ji nu leh midang tampi suhdamna
14Huleh Jesu chu Peter inn sungah a luut a, a ji nu khosih a lum a mu a. 15Huin ama’n amahnu khut a khoih a, a khosih a phata hi; huin amahnu chu ahung thou a, a nna uh a tohsahta hi. 16Huleh nitaahlam ahung hihin a kawmah dawimatte tampi ahung pui va; ama’n a thu in dawite a nohdoh a, damlou zousiah a sudamta hi; 17Zawlnei Isaiah in, Amah ngei in i hatlouhnate a la a, i natnate a pua hi, chia a soi chu a taangtun theihna diingin.
Nungjui diingte etkhiahna
18Chi’n Jesu in a kiimvela mipi nasatah a muh in, gaal lehlama chiah diing thu a pia a. 19Huleh lehkhagialtute khat a hung a, a kawmah, Houtupa, na chiahna photah ka hung jui diing, a chi a. 20Jesu’n a kawmah, Si-aalte’n kua a nei va, tungleeng vate’n bu a nei uh; hizongleh mihing Tapa’n a lu ngahna diing mun a nei sih, a chi a. 21Huleh a nungjuite laha midang khat in a kawmah, Lalpa, va chiah a ka pa vui phot diingin hung phalsah in, a chi a. 22Hizongleh Jesu’n a kawmah, Hung jui in, misi in a misi uh kivui u’heh, a chi hi.
Huihpi daihsahna
23Huleh kuang a a tuan in nungjuite’n a jui va. 24Huleh, ngai in, tuipi ah huihpi nasatahin a nung a, hu tuikinawh in kuang chu ahung tuum a, hizongleh amah chu a ihmu a. 25Huin a nungjuite chu a kawm a hung in amah a phawng va, Lalpa, hung hundam in, beimang diing hitalou ka hi u'maw, a chi va. 26Huin ama’n a kawmvah, Gin tawmte haw, bang diinga lau na hi viai? a chi a. Huzohin a thou a, huihpi leh tuipi chu a vau a; ahung daai keeita hi. 27Huin mite’n chu limdang a sa mahmah va, Hipa hi bangchibang mi ahiai le, huih leh tuipi nasanin a thu a man uh! a chi uhi.
Gadarami dawimatte suhdamna
28Huleh gaal lehlam Gadara mite gam a tunin, dawimat mi nih, haan apata hungin amah ahung tuaah va, a lauhuai mahmah va, hulam chu koima'n a tawn thei sih uh. 29Huleh, ngai in, amahun, Jesu, nang Pathian Tapa, keiuh leh nang bang ahiai kimatna i neih? hunchiam tunma a keiuh gawt diing a hitaha hung na hi maw? chi’n a kikou va. 30Huleh a umna apat va gamla simah vohhon tampi a taa va. 31Huleh dawite’n a kawma ngen in, Na hung nohdoh leh, hu a vohhon sungah hung luutsah in, a chi va. 32Huin ama’n a kawmvah, Chiah un, a chi a. Huleh amahuh chu a hungdoh va, vohhon sungah a luut va; huleh ngai in, hu vohhon chu kawl ah a taikhesuh va, tuipi ah a tailuut va, hu tui ah a sigamta uhi. 33Huin a chingtute a tai va, khopi ah a chiah va, sil zousiah leh dawimatte tung a sil hung tungte bang a hilhta uh. 34Huleh, ngai in, a khopumpi un Jesu tuaah diingin ahung pawt va; huleh, amah a muh un, a gam vapat pawt diingin nasatahin a ngen uhi.
اکنون انتخاب شده:
MATTHAI 8: SIMTBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
