MATTHAI 25
25
Nungaah siangthou sawmte tehkhinthu
1Hu hun chiangin vaan lalgam chu nungaah siangthou sawm, a thaumei uh keng a, mouneitu dawn diing a pawtkhete toh teh ahi diing. 2Huleh a lahvah mi ngaa a pil va, ngaa a ngol uhi. 3Hu a ngolte’n chu a thaumei uh a keng va, thautui a kengtel sih uhi; 4Hizongleh a pilte’n chu a thaumei u’toh a uum ah a tui zong a kengtel uhi. 5Mouneitu chu ahung vaigeih jiahin a bawnun a lusu va ana ihmu vehta uhi. 6Huleh jan khang laiin, Ngai in, mouneitu a hung hi, a dawn diingin pawtdoh un; chia kikou ging a umta a. 7Hu tahin hu nungaahte chu a thou veh va, a thaumei uh a deta va. 8Huleh a ngolte’n a pilte kawmah, Na thautui uh hung hawm un; ka thaumeite uh mit diing ahita hi, a chi va. 9Hizongleh a pilte’n a dawng va, Keiuh leh nanguh diing a kidaih sih diing hi; a zuahte kawmah va chiah unla va kilei un, a chi va. 10Huleh amahuh a lei diing a a va chiah kal un mouneitu chu a hungta a; huleh kigingsa a na umte chu amah toh moulopna inn ah a luut khawmta va; huin kot chu a kikhaahta hi. 11Hu nungin hu nungaah dangte zong a hung va, Lalpa, Lalpa, kot hung hon in, a chi va. 12Hizongleh ama’n a dawng a, Chihtahzetin ka hung hilh ahi, nanguh ka hung thei sih, a chi a. 13Hujiahin kiging un, ajiahchu mihing Tapa hung diing ni leh a hun na he ngal sih uhi.
Talent tehkhinthu
14Vaangam chu mi khat in a suaahte koukhawm a, a thuampuate a khut va kemsah a, khual gamlataha jinmang bang ahi. 15Huleh ama’n a suaah khat kawmah talent ngaa, a suaah dang khat kawmah talent nih, huleh a suaah dang khat kawmah talent khat a pia a; amahun ahihtheih hun diing chiat un a pia a, amah chu a jinta hi. 16Huin talent ngaa tangpa chu kuanin a va sumdawng a, talent ngaa dang a muhbeh a. 17Huleh huchimah bangin talent nih tangpa’n zong talent nih dang a muhbeh a. 18Hizongleh talent khat tangpa chu a chiah a, lei a tou a, a pu dangka chu a phuumta hi. 19Hun sawttah nungin hu suaahte pu chu ahung tungta a, amahuh toh sum a sutuaahta a. 20Huchi'n talent ngaa tangpa a hung a, talent ngaa dang ahung tawi beh a, Pu, nang talent ngaa na hung kemsah a; en in talent ngaa dang ka muhbeh hi, a chi a. 21A pu in a kawmah, Suaah hoih leh ginum, na bawl hoih hi; sil tawmtakhat tungah na ginum a, sil tampi tungah thuneitu in ka hung koih diing hi; na pu kipaahna ah luut in, a chi a. 22Talent nih tangpa zong a hung a; Pu, nang talent nih na hung kemsah a; en in, talent nih dang ka muhbeh hi, a chi a. 23A pu in a kawmah, Suaah hoih leh ginum, na bawl hoih hi, sil tawmtakhat tungah na ginum a, sil tampi tungah thuneitu in ka hung koih diing hi; na pu kipaahna ah luut in, a chi a. 24Huin talent khat tangpa chu a hung a, Pu, mi kheltah na hi a, na tuh louhna ah na aat a, na theh louhna ah zong na khawm jel chih ka hung he hi; 25Hujiahin ka hung lau a, va chiah in na talent chu lei nuaiah ka va phuum a; en in, hi-ah nang a mah na kimuh kiitta hi, a chi a. 26A pu in a dawng a, a kawmah, Nang suaah gilou leh zawmthopa, ka tuh louhna ah ka aat a, ka theh louhna ah ka lakhawm veu hi chih na he maw? 27Huchi a hihnung, ka dangka chu sumdawngte kawma na va koih diing a, huchia ka hung chianga ka sum chu a pung toh ka muh kiit diing ahi. 28Hujiahin a talent chu laahsah unla, talent sawm neitu kawmah pia un. 29Ajiahchu koipouh a nei chu piah beh ahi diing a, tampi ahung nei diing; hizongleh koipouh a nei lou chu a neih sun zong laahsah ahi diing hi. 30Huleh suaah phatuamlou chu polam mial ah paaikhia un; huah chu kah leh hagawi a um diing hi, a chi hi.
Vaihawmna ni
31Mihing Tapa chu angel siangthou zousiah toh a loupina a, a hung chiangin amah chu a loupina laltouphah tungah a tou diing hi; 32Huleh a ma ah nam zousiah a khawm diing a, huleh ama’n amahuh haw chu belaampu in keel lah apata belaamte a khenkhiah bangin a khen diing. 33Belaamte chu a jiatlamah a koih diing a, keelte chu a veilamah a koih diing. 34Huchiangin Kumpipa in chu a jiatlamate kawmah, Nanguh ka Pa deihsahte, hung unla, khovel siam chiil apata nanguh diing a kibawl gam chu luah un; 35Bang jiahin ahiai i chih leh ka gil a kialin an na hung pia va; ka dang a taahin dawn diing na hung pia va; mikhual ka hihin na hung zintun va; 36Saguah a ka um in puan na hung silhsah va; damlou a ka um in na hung veh va; suangkul a ka taan in ka kawmah na hung uh, a chi diing. 37Huchiangin midihtatte’n, Lalpa, bangchihin aha gilkiala ka hung muh va, an ka hung piah uh? dangtaah a ka hung muh va, tui ka hung piah uh. 38Bangchihin ahiai mikhual a ka hung muh va ka hung na zintun uh? Saguah a ka hung na muh va puan ka hung silhsah uh? 39Bangchihin ahiai china aha, ahihlouhleh suangkul a na taan aha ka hung muh va, na kawma ka hung uh? chi'n a dong diing uhi. 40Huleh Kumpipa in chu a dawng diing a, a kawmvah, Chihtahzetin ka hung hilh ahi, Hi ka unaute laha neupen khat tunga na bawl uh chu ka tunga bawl na hi uh, a chi diing. 41Huzohchiangin a veilama umte kawmah, Nanguh haamsethuaahte, ka kawm apat chiahmang unla, kumtuang mei, diabol leh a sawllehte diing a a bawl vah luutta un; 42Ajiahchu ka gilkial in an na hung pe sih va; ka dangtaahin dawn diing na hung pe sih va; 43Mikhual ka hih in na hung zintun sih va; saguah ka hih in puan na hung silhsah sih va; ka chinat leh suangkul a ka taan in na hung veh sih uhi, a chi diing. 44Huchiangleh amahun zong a dawng diing va, Lalpa kei un bangchihin ahiai gilkial aha, dangtaah aha, mikhual aha, saguah aha, damlou aha, suangkul taang aha a ka hung muh va, na nna ka hung tohsah louh uh, a chi diing uh. 45Huchiangin ama’n a dawng diing a, Chihtahzetin ka hung hilh ahi, Hite laha neupen khat tunga na bawl louh uh chu, ka tunga bawl lou na hi uhi, a chi diing. 46Huleh hute chu kumtuang gawtmun ah a chiahta diing va; hizongleh midihtatte chu kumtuang hinna ah a chiahta diing uh, a chi hi.
اکنون انتخاب شده:
MATTHAI 25: SIMTBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
