MATTHAI 20
20
Grep huan a natongte tehkhinthu
1Ajiahchu vaan lalgam hi inn neitu a grep huan a natong dinga mi chial dinga jingkal a pawt bang ahi. 2Huleh ama’n natongtute toh ni khat a makhai khat loh diing a, a kilem tahun, a grep huan ah a sawlta a. 3Huleh amah chu daah thumna velin a pawtdoh a, midang dawlmun a ding meimeite a mu a, 4Huleh a kawmvah, Nanguh zong grep huan ah va kuan un, a kilawmhun ka hung pe ding, a chi a. Huin amahuh chu a chiahta va. 5Huleh daah guupna leh daah kuaahna vel dingin a va pawt kiit a, huchi bangmahin a bawl kiit a. 6Huleh daah sawm leh daah sawmlekhatna velin a va pawt kiit a, a kawmvah, Bang diinga ding meimei na hi viai? a chi a. 7Amahun a kawmah, Koima'n ahung goih louh jiahin, a chi va. Ama’n a kawmvah, Nanguh zong grep huan ah va kuan un; a kilawm bangjel na mu diing uh, a chi a. 8Huin nitaahlam ahung hihin, grep huan neitu’n a sumkolpa kawmah, Natongtute kou inla, a nunungpen apatin a masapen tanin a loh uh pia in, a chi a. 9Huin daah sawmna leh daah sawmlekhatna vela a goihte a hung uleh, makhai khat chiat a muta va. 10Huin a masate a hung un muh tamdeuh a kinem va; hizongleh amahun zong makhai khat chiat mah a muta va. 11Huleh hichu a kilaahzoh un inn neitu tungah a phunta va, 12Hi a nunungte’n daah khat sung chauh a tong va, keiuh nisa hahlai thuaah a tonggimte toh kibangin na bawlta, chi'n. 13Hizongleh ama’n chu a lahva khat a dawng a, Lawm, na tungah bangmah ka sukhial sih hi; makhai khat loh diing a kihoutuaah hilou i'maw? 14Nang a chu kilaah inla chiahta in; hi a nunungpen kawmah zong nang ka hung piah zaatmah ka pe ut hi. 15Ka neihsa ka utut a ka bawltheih hilou amaw? Ka hoih jiahin na thangsia ahi maw? a chi a. 16Hutobangin a nunung chu a masa diing a, huleh a masa chu a nunung diing hi; ajiahchu tampi kouh ahi a, hizongleh tawmtakhat teel ahi; a chi hi.
Jesu’n a sih diing a soilawh thumveina
17Huleh Jesu Jerusalem khua a, a chiahtouh laiin nungjui sawmlehnihte lampi ah a puituam a, a kawmvah, 18Ngai un, Jerusalem zu an in i chiah tou uh ahi; mihing Tapa chu siampu lalte leh lehkhagialtute khutah matsah in a um diing a, huleh amahun si diingin siamlouh a tangsah diing uhi, 19Huleh amah chu chiamnuih bawlna diing leh, jep diing leh, kros a khetbeh diingin Jentelte khut ah a pedoh diing uhi; huleh ni thum ni in a thou kiit diing, a chi hi.
Khovel loupina ngetna
20Huin Zebedi tate nu chu, a tapate toh hung in amah ahung bia va, bang sil aha a ngen a. 21Huin ama’n a kawmah, Bang ahiai na deih? a chi a. Amahnu’n a kawmah, Na lalgam a hi ka tapate geel khat na jiat a, khat na vei a, a tou theihna diing uh thu pia in, a chi a. 22Hizongleh Jesu’n a dawng a, Na nget uh na he sih uhi. Nangun ka nou dawn diing na dawn thei viai? huleh ka baptisma tan diing na tang thei diing viai? a chi a. Amahun a kawmah, Thei e, a chi va. 23Huin ama’n a kawmvah, Ka dawn diing nou chu na dawn ngei diing va, ka baptisma tan diing zong na tang ngei diing uhi; hizongleh ka jiatlam leh ka veilam a tousah diing thu chu keimah piah diing ahi sih hi, ka Pa’n a bawlsahte kawmah piah ahi diing, a chi a. 24Huleh sawmte’n hichu ana jah un, unau nihte tungah a lungthahta uhi.
Loupina dihtah
25Hizongleh Jesu'n amahuh chu a kawmah a kou a, Jentelte vaihawmte chu a tungvah a lal mahmah va, huleh milian milalte'n a tungvah thu a nei mahmah uhi chih na he uhi. 26Hizongleh nanguh lahah chu huchi ahi sih diing; koi hitaleh na lahva let uh chu na natong un a um diing ahi. 27Huleh na lahva houtupen a pan ut chu na suaah un a pang diing ahi; 28Mihing Tapa hilhial zong natohsaha um dinga a hung louha, natong diing leh mi tampi tatna diing a a hinna pe diing a a hung zawh mah bangin, a chi hi.
Mittaw nih in mit vaahna a muh thu
29Huleh Jeriko khua apat a pawt un, mipi nasatah in amah a jui va. 30Huleh ngai in mittaw nih lam geia toute’n, Jesu lampi ah a chiah hi chih a jah tahun Aw Lalpa, David Tapa, ka tungvah zahngai in, chi'n a kikou va. 31Huleh mipite’n a daihna diingun a tai va; hizongleh amahuh chu, Aw Lalpa, David Tapa, ka tungvah zahngai in, chi’n a kikou semsem uhi. 32Huin Jesu a ding a, amahuh a kou a, Na tungvah bang bawlleng na ut viai? a chi a. 33Amahun a kawmah, Lalpa mit vaah ka ut uh, a chi va. 34Huin Jesu’n a hehpih mahmah a, a mit uh a khoih a; huchi'n a mutheipah ngal va, huleh amah a juita uhi.
اکنون انتخاب شده:
MATTHAI 20: SIMTBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
