LUKE 16
16
Sumkoltu dihtatlou tehkhinthu
1Huleh ama’n a nungjuite kawmah hi thu zong a soi a, Mi hausa koiaha in sumkoltu khat a nei a; amahpa’n a sum a mawh thangjatsah chi'n a kawmah a heeh va. 2Huin amah chu a kou a a kawmah, Na tung thu ka jah hi bangchi ahiai? na sumkol hisaap hung pia in; ajiahchu tukalsiah sumkola pang nawn lou diing na hi, a chi a. 3Huin sumkoltupa’n a lungsim in, Bang chi diing kata’i? ka pu in lah ka sumkol hung tawpsah diing ahita a; lei toh lah peih lou ing a; khutdoh diing lah zum inga. 4Sumkol ahung tawpsah chianga a inn va ahung umsah theihna diingun ka bawldan diing ka he ta, a chi a. 5Huchi'n a pu sumbate chu a kou chiat a, a masapen kawmah, Ka pu a bangzah ahiai na bat? a chi a. 6Ama’n, Thau tehna zakhat, a chi a. Huin ama’n a kawmah, Na lehkha la inla, tou kin inla, sawmngaa gial in, a chi a. 7Huleh a dong khat kawmah, Nang bangzah ahiai na bat? a chi a. Ama’n, Buh tehna zakhat, a chi a. Huin ama’n, Na lehkha la inla, sawmgiat gial in, a chi a. 8Hu sumkoltu dihtatlou chu a pu in a lemtheih jiahin a phatta hi; ajiahchu vaah tate sangin hi khovel tate hi a tulai thu vah a pilzaw uhi. 9Ka hung hilh ahi, Dihtatlouhna sum in na lawm diing uh kibawl un; hu a manthai hun chianga kumtuanga umna a nanguh ahung umsah theihna diingun. 10Koipouh tawmtakhat tunga ginum chu tampi tungah zong a ginum ahi; huleh koipouh tawmtakhat tunga ginum lou chu tampi tunga zong a ginum sih hi. 11Hujiahin dihtat louhna sum tunga bawn na ginum louh uleh kua’n ahiai nanguh sum tah hung kolsah diing? 12Huleh midang a tunga bawn na ginum louh uleh, kua’n ahiai nanguh a tah hung pe diing? 13Suaah khat in houtu nih nna a tongkop thei sih; bang jiahin i chihleh khat huain khat a lungsiat diing a; ahihlouhleh khat gum in khat a musit diing hi. Pathian nna leh sum nna na tong kop thei sih diing uh, a chi a.
Jesu’n Pharisaite a taina
14Huleh sum ngaina Pharisaite’n zong hi thu zousiah a ja va, amah a nuihsan va. 15Ama'n a kawmvah, Mite mitmuha siamtan tumte na hi uh; hizongleh Pathian in na lungtang uh a he hi; ajiahchu mihing laha paahtawia um chu Pathian mitmuh in sil kihdah huaitah ahi. 16Daan leh zawlneite thu John hung um tanchiang a um a; hu kalsiah chu Pathian gam tanchinpha a kisoi a, huleh mi chinin huah pawng luut haam a sawm uhi. 17Huleh daan thu neutakhat a man sangin vaan leh lei a bei a baihlamzaw hi. 18Koipouh a ji khul a, a dang kiteenpih chu aangkawm ahi; huleh koipouh a pasal in a khulsa kiteenpih chu aangkawm ahi.
Mi hausapa leh Lazar
19Mi hausa koiaha a um a, puan sandup leh puan malngaat a silh a, ni chinin nuamsatahin a um a. 20Huleh a min Lazar kichi a pumtanga meima a dim a kotkhaah bula a lupsah veu uh khutdoh khat a um a. 21Mi hausapa dohkaan apat khateneng kia pouh neeh vah a ut a; hulou zong uite a hung a, a meimate a liaahsah veu uhi. 22Huleh hichi ahung hi a, hu khutdohpa chu a si a, angelte’n Abraham aangsungah a pui va; huleh mi hausapa zong a si a, vui in a umta a. 23Huleh gawtmun ah gimthuaah in a um a, a daahtou a, gamlapi-a Abraham leh a aangsunga Lazar um chu a muta a. 24Huin a kikou a, Pa, Abraham hung khotuah inla, Lazar chu a khutzung muuh tuia diahkawta ka lei hung suvot diingin hung sawl in; ajiahchu hi mei kuang ah ka gim mahmah hi, a chi a. 25Hizongleh Abraham in, Tapa, nangma’n na dam laiin sil hoihte na kimuh a, huchibangin Lazar in sil hoihloute a mu chih geeldoh in; hizongleh tu’n chu amah hamuanin a um a, nang gimthuaahsah in na um ahi, 26Huleh hite lou zong, kei uleh nanguh kikalah guam nasatah siamin a um hi; hilama kipana na kawmva hung tumte ahung theih louhna diingun; huleh hulama kipana keiuh kawma hung tumte ahung theih louhna diingun, a chi a. 27Huin ama’n, Ahihleh, pa, amah chu ka pa inn a sawl diingin ka hung ngen hi. 28Ajiahchu unaupasal ngaa ka neia, amahuh va hilh leh; huchilou inchu amah u’zong hi gimthuaahna munah a hungkha diing uh, a chi a. 29Abraham in a kawmah, Amahun Mosi leh zawlneite a nei uh; hute thu ngaikhia u’heh, a chi a. 30Huin ama’n, Hilou e, pa Abraham, misi laha mi khat a kawmvah va chiah leh a kisiih diing uh, a chi a. 31Ama’n a kawmah, Mosi leh zawlneite thu a ngaihkhiah nuam louh uleh misi lah apat mi khat thou kiit mah zongleh a tahsang tuan sih diing uhi, a chi a.
اکنون انتخاب شده:
LUKE 16: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
