JOHN 20
20
Jesu thohkiitna
1Hapta ni masapenin, jingkal khua mial nalaiin, Mari Magdalene haanah a hung a, huleh haana kipat suang kiladohin a muta a. 2Huin a tai a, Simon Peter leh nungjui khatpen, Jesu’n a lungsiatpa kawmah a hung a, a kawmvah, Ha an apat in ka Lalpa a la mangta va, khoitah a a koih uh ka he sih uh, a chi a. 3Hujiahin Peter chu a pawtdoh a, nungjui dangpen zong, huleh haanlam zuanin a hung va. 4Huchi'n a nihun a taikhawm va; nungjui khatpenin Peter a makhelh a, haan ahung tung masa a. 5Ama’n kuunin a en a, puan malngaat um a mu a, ahihvangin a sungah a luut sih. 6Huin Simon Peter in a nungah ahung jui a, haan sungah a luut a, puan malngaat umte a mu a. 7Huleh a lu tuamna kisiaahna puan chu puan malngaat toh umkhawm loua a tuam a mun khata kijial a um a mu a. 8Huin haana tung masa nungjui dangpen zong a sungah a luut a, huleh a mu a, a gingtata hi. 9Ajiahchu amahun misi laha kipan a thohkiit diing ahi chih Pathian lehkhathu a he nai sih uhi. 10Huin nungjuite chu a inn lam vah a chiah kiitta uhi.
Mari Magdalene kawma Jesu kilaahna
11Hizongleh Mari chu haan pua ah kapin a ding a; huleh a kahpum in a kuun a, haan sunga en a. 12Huleh Jesu luang kisialna munah puan vaam silh angel nih, khat a lu lamah, khat a keeng lamah tou in a mu a. 13Amahun a kawmah, Numei, bang diing a kip na hiai? a chi va Amahnu’n a kawmah, Ka Lalpa a la mangta va, huleh a koihna uh ka heet louh jiahin, a chi a. 14Huchia a soi zohin a kinunghei a, Jesu diing a mu a, hizongleh Jesu ahi chih a he sih hi. 15Jesu’n a kawmah, Numei, bang diing a kap na hiai? koi ahiai na hawl? a chi a. Amahnu’n hu an veengpa sain a kawmah, Pu, hitah apat amah na puaahmang ahihleh na koihna hung hilhin, huchi'n ka la mang diing, a chi a. 16Jesu’n a kawmah, Mari, a chi a. Amahnu chu a kihei a, a kawmah, Rabboni, a chi a; huchu, Houtupa chihna ahi. 17Jesu’n a kawmah, Hung khoih sin; ajiah chu ka Pa kawmah ka chiahtou nai sih hi. Ahihvangin ka unaute kawmah chiah inla, a kawmvah, Ka Pa, na Pa uh, huleh ka Pathian, na Pathian uh kawmah chiahtou diing ka hi chi in, a chi a. 18Mari Magdalene chu a hung a, nungjuite kawmah Lalpa a muh thu leh hi silte ama’n a kawmah a soi hi chih a hilhta hi.
Nungjuite kawma Jesu kilaahna
19Huni mah hapta ni masapen nitaahin, Judate lau jiaha nungjuite umna kotte a kikhaah nungin Jesu a hung a, a lai vah a ding a, a kawmvah, Na tungvah hamuanna um heh, a chi a. 20Huchia a chih zohin a khutte leh a naah a kawmvah a lah a. Huin nungjuite’n Lalpa a muh phetun a kipaahta uhi. 21Huin Jesu’n a kawmvah, Na tungvah hamuanna um heh; ka Pa’n ahung sawl bangmahin nanguh ka hung sawl hi, a chi kiit a. 22Hikhu a soi zohin a tungvah hu a haihkhum a, a kawmvah, Hagau Siangthou tangta un; 23Kua sualna zong na ngaihdam phot uh ngaihdam ahi diing a, kua sualna zong na ngaihdam louh phot uh ngaihdam louh ahi diing, a chi a. 24Hizongleh Thoma, Didum a kichi, sawmlenihte laha khat, Jesu hung lai in a kawmvah a um sih a; 25Hujiahin nungjui dangte’n a kawmah, Lalpa ka muta uh, a chi va. Hizongleh ama’n a kawmvah, A khuta siihkilhna pawnte ka muh a, siihkilhna pawn sunga ka khutzung ka gu an a, huleh a naah a ka khut ka thun louhleh ka gingta sih diing, a chi a. 26Huleh ni giat nungin nungjuite inn sungah a um kiit va, Thoma zong a kawmvah a um a; huin kot kikhaah ngalin Jesu a hung a, a lai vah a ding a, Na tungvah hamuanna um heh, a chi a. 27Huin ama’n Thoma kawmah, Na khutzungin hung sawh inla, ka khutte en in; huleh na khut in hung baan inla, ka naah sawh in; gingta lou in um sinla, gingta mai in, a chi a. 28Thoma’n a dawng a, a kawmah, Ka Lalpa leh ka Pathian, a chi a. 29Jesu’n a kawmah, Thoma, nang chu na hung muh jiahin na gingta ahi a; mulou a gingtate a hampha uhi, a chi hi.
John tanchinpha kigelhna san
30Huleh hi lehkhabua kigial lou chiamchihna dang tampi Jesu’n a nungjuite ma-ah a bawl hi. 31Hizongleh hite chu nangun Jesu chu Khrist, Pathian Tapa ahi chih na gintaat na diing uleh, na gintaat jiah va a mina hinna na neihna neihna diing va kigial ahi.
اکنون انتخاب شده:
JOHN 20: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
