EPHESITE 1
1
Chibaibuuhna
1Paul Pathian deihzawng a Jesu Khrist sawlleh in, Ephesa khua a um misiangthoute leh Khrist Jesu a mi ginumte kawmah; 2Pathian i Pa uleh Lalpa Jesu Khrist kawma kipan hehpihna leh hamuanna na kawmvah um hen.
Pathian phatna
3Vaanmunte a Khrist a hagaulam vangpiahna chinteng a vang hung pepa i Lalpa uh Jesu Khrist Pathian leh Pa chu phatin um hen: 4A ma a siangthou leh soiselbei a i um theihna diing a leilung pian ma a lungsiatna a Khrist a ahung na teel dungjuiin; 5Amah lungguat leh deihzawng bangin, Jesu Khrist jiaha amah a diinga ta a bawl diingin ahung na guatlawhta hi, 6A hehpihna loupidan paahtawi diingin, hu hehpihna a’chu a lungsiat mahmahpa ah deihtaah in ahung siamta hi. 7Amah ah a sisan jalin tatkhiahna i nei a, a hehpihna hauhdan dungjui a i sualnate ngaihdamna. 8Hu hehpihna ah ama’n pilna leh lemheetna zousiah in ahung vuh hi. 9Ama’n a lungdeihzawng a amah a bawl a tup bangin a lungguat thuguuh i kawma hung hesah in; 10Hunbi khenna kim ahung hun chiang a amah ngei a vaan a sil umte leh, leitung a sil umte a bawna Khrist a khata a suhtuahkhawmna diingin, 11Amah lunggel bang jel a sil zousiah bawlpa tup banga guatlawhsa hi in, amah ah gouluah diing a siam i hi uhi. 12Eiuh Khrist a na ging masate, a loupidan paahtawina i hihtheihna diingin. 13Amah ah nanguh zong thutah thu, na hutdamna tanchinpha uh na ngaihkhiah va, gin zong na gintaat nungun, amah ah chiamna Hagau siangthou a chiamchih in na um uhi, 14Huchu Pathian loupidan paahtawina diing a gou leisa tatkhiahna hun masiah diing a i gouluah diing uh khaamna ahi.
Pathian heetna diing leh silbawltheihna diinga haamteina
15Hujiahin ke’n zong Lalpa Jesu a na ginna uleh, misiangthoute zousiah tung a na lungsiatna uh ka na jah in, 16Ka haamteinate ah na min uh lou in, nanguh jiaha kipaahthu soi ka tawp sih hi; 17I Lalpa uh Jesu Khrist Pathian, loupina Pa in amah heetna lam thu a pilna leh kilaahna hagau nanguh ahung piah theihna diingin; 18Na lungsim mitte uh suhvaah a hung um a, a kouhna kinepna bang, misiangthoute a, a goutan diing loupina hauhzia bang, 19Huleh a silbawltheihna haatna natoh dungjui a ei a gingtate lama a silbawltheihna nasatdan bang na hung heettheihna diingun. 20Misi laha kipana a kaihthoh lai leh, vaan munte a, a jiatlam a, 21Lalnate leh silbawltheihnate leh, haatnate leh, vaihawmnate leh, hi khovel chauh hilou a khovel hung tung diing a zong min kiphuaah zousiah tunglam peha a tousah lai a Khrist a, a bawl chu. 22Huleh sil zousiah a keeng nuaiah a koihta a, amah chu sil zousiah tungah lutang hi diingin kouhtuam kawmah a pia hi, 23Huchu a tahsa ahi, a taangchinna a bangkim zousiah sudimpa ngei.
اکنون انتخاب شده:
EPHESITE 1: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.