SILBAWLTE 8
8
Khristiante soihna leh a dalhna uh
1Huleh, Saul in zong Stephen sih chu lem a sa hi. Hu hun laiin Jerusalem khua a kouhtuam umte chu nasatahin a sawi panta va; huchi'n sawllehte chauh loungal chu Judia leh Samaria gam khochinah a dalhjah vehta uhi. 2Huleh, Pathian ngaihsah kuate aha in Stephen chu a vui va, nasatahin a suun uhi. 3Saul in ahihleh, kouhtuam pawlte a suduhdah mahmah a, inn chinah a luut a, numei pasal a kaidoh a, suangkul ah a khum hi.
Samaria gam a Philip natoh
4Huleh a dalhjahte chu khochin ah a chiah va thu a soita uhi. 5Huin, Philip chu Samaria khopi ah a chiahsuh a, a kawmvah Khrist thu a soi hi. 6Huleh, a silmah bawlte a jah va, a muh un mipite’n Philip thusoi chu lungsim munkhat in a ngaihsah uhi. 7Dawiniinte, aw ngaihtaha kikou a, mi tampi a matte uh sunga kipat ahung pawt va; huleh zeng leh keengbaai tamtahte zong ahung damtaah jiahun; 8Huleh, hu khopi ah kipaahna nasatah a umta hi. 9Hizongleh, a min Simon kichi mi khat a um a, ama’n chu, milian ka hi chi'n, tum a la min hu khopi ah mitphialdawi zang in Samarimite limdangsatahin a koih veu a. 10Mi zousiah in, a neupen apat a lianpen tanphain, Hi mi hi Pathian silbawltheihna loupi a chih uh ahi, chi'n a thu a ngaihsah veu uh. 11Huleh, mitphialdawi a hun sawttah limdangsataha ana koih taah jiahin a thu a ngaihsah uhi. 12Hizongleh, amahun chu Pathian gam leh Jesu Khrist Tanchinpha, Philip soi a gintaat un, a numei a pasal in baptisma a tangta uhi. 13Huin, Simon nasanin zong ahung gingta a; huleh, baptisma a tan nungin, Philip kawmah a um zing a, chiamchihna leh silmah nasatah kibawlte muin, limdang a sa thei mahmah hi.
Peter leh John Samaria gam ah
14Huin, sawlleh Jerusalem khua a umte’n, Samarite’n Pathian thu a awita uh chih a heet un, a kawmvah Peter leh John a sawl va. 15Hu mite chu a va tunsuh un Hagau Siangthou a tan theihna diingun a haamteisah va; 16Hu ma in chu a lahva kuamah tungah a tung nai sih hi; Lalpa Jesu min a baptisma tang chauh ahi nalai uhi. 17Huin, sawllehte’n a tungvah a khut uh a nga va, Hagau Siangthou a tangta uhi. 18Huleh, Simon in sawllehte khut ngah jiaha, Hagau Siangthou piah ahi chih a muh in. 19Hitobang thuneihna hung pe ve un, kua tungah hizongleh khut ka ngahna phot in Hagau Siangthou a muh vena diingun, chi'n sum piah a tum a. 20Hizongleh, Peter in a kawmah, Na sum nangmah toh mangkhawm heh, Pathian silpiah dangka sum a lei na tup jiahin. 21Hi thu ah tellah na tel sih a, tan zong na nei ngal sih hi, na lungtang Pathian muh a, a dih louh jiahin. 22Hujiahin na mohna kisiih inla, Pathian kawmah haamtei in, huchi'n na lungtang a na ngaihtuah hi ahung ngaidamkhamoh sih diing. 23Ajiahchu sil khaatna sinkha ah leh, bohsiatna kaan gawmna ah na um hi, chih ka he hi, a chi a. 24Huin, Simon in a dawng a, Na sil soite uh bangmah ka tunga a tun louhna diingin nangun Lalpa kawmah hung haamteisah un, a chi a. 25Huin, amahun Lalpa thu chu a heetsah leh a soi zoh nungun, Jerusalem khua ah a chiah kiitta va, Samarite kho tamtah ah Tanchinpha a soita uhi.
Philip leh michilgeh
26Huleh, Lalpa angel in Philip a houpih a, Thou inla, simlama Jerusalem khua akipan a Gaza kho sunsuh lampi, hu gamdai ah chiah in, a chi a. 27Huleh, amah chu thou in a chiahta a; huleh, ngaidih, Ethiopia gam a mi khat, Ethiopia kumpinu Kandake nuaia michilgeh lal tah, a gou zousiah koltu chu Jerusalem khua ah Pathian be diingin a va chiah a. 28Ahung pai kiit lam in a kaangtalai a toukawm in zawlnei Isaiah lehkhabu a sim hi. 29Huin, Hagau in Philip kawmah, Hu kaangtalai va naih inla, va kithuahpih in, a chi a. 30Huin, Philip chu a kawmah a va tai a, zawlnei Isaiah lehkhabu a sim a ja a, Na sim chu na theisiam nai? a chi a. 31Huleh, ama’n chu, Kuamah hung hilhchet louhin bang ka chi theihsiam diai? a chi a. Huleh, Philip chu kaldohtou a, a kawma tou diingin a zawn a. 32Pathian lehkhabu a simna mun chu hih ahi, Thah diing belaam bangin Amah chu a pui va; huleh belaamnou a mulmeettu ma a, a sip khiinkhian bangin, Ama’n zong a kam a keeh sih; 33A thunuaigolh laiin a tunga thudih soina laahmang ahi a; a haahte tanchin kuan ahiai hung soi diing? Leitung akipanin a hinna laahsah ahi ngal a, chih. 34Huleh, michilgeh in Philip a houpih a, a kawmah, Ka hung ngen hi, hi thu hi zawlnei in kua thu a soina ahiai? amah thu ahiai, mi dang thu? a chi a. 35Huin, Philip in a kam a kaah a, hu Pathian lehkhathu ngei apanin a kawmah Jesu thu a soita hi. 36Huleh, lampi a, a pai laiun tui umna mun khat ahung tungva; huleh michilgeh in, Endua, hi ah tui um, baptisma ka tanna diing bangin ahung daal ei? a chi a. 37Huin, Philip in, Na lungtang zousiaha na gintaat leh, na tang thei hi, a chi a. Huleh, ama’n a dawng a, Jesu Khrist chu Pathian Tapa ahi chih ka gingta hi, a chi a. 38Huin, kaangtalai chu a khawlsah a; a nih un, Philip leh michilgeh chu tui lahah a chiahsuhkhawm va; huin, Philip in amah chu a baptista hi. 39Huleh, tui apat a paidohtouh phet un, Lalpa Hagau in Philip chu a la mangta a, michilgeh in chu a mu kiitta sih hi; huleh, a lampi ah nuamtahin a pai jelta hi. 40Hizongleh, Philip chu Azota khua ah a mu kiitta va; huleh, paisuaah pehin Caesarea khua a tun masiah khochin ah Tanchinpha chu a soita hi.
اکنون انتخاب شده:
SILBAWLTE 8: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
