SILBAWLTE 6
6
Deacon masate teelna
1Huleh, hulaia nungjuite a punpun laiun, a nichin sil hawm vah a meithaite uh a ngaihsah louh veu jiahun, Grik haam zang Judate chu Hebraite tungah a phunta va. 2Huin, sawmlehnihte’n nungjui mipite a kou va, Pathian thusoi tawpsan a dohkaan a neeh diing nna ka toh unchu a hoih sih diing hi. 3Hujiahin, unaute, na lahva Hagau Siangthou leh pilna a dim, mi min hoih ngen sagih teel un, amahuh chu hi sil ngaihtuahin i bawl diing uh. 4Keiuh chu haamtei leh thunatong in ka um zom zing zaw diing uh, a chi va. 5Huleh, hu thu in mi zousiah a kipaahsah a; huchi'n Stephen, ginna leh Hagau Siangthou a dim toh, Philip toh, Prokora toh, Nikanor toh, Timon toh, Parmena toh, Judate biahdan jui, Antiok khua a mi Nikola toh a teel va; 6Amahuh chu sawllehte ma ah a dingsah va, a haamtei zohun a tungvah a khut uh a nga uhi. 7Huleh, Pathian thu ahung dalh a; Jerusalem khua ah nungjuite a pungta mahmah uhi; huleh siampute lahah zong mi tamtah ginna lam ah a thumangta uhi.
Stephen vaihawmna ma a dinna
8Huleh, Stephen, ginna leh silbawltheihna a dim in mi lahah silmah leh chiamchihna loupitahte a bawl veu hi. 9Huin, Libertinete, Cyrenia khua ate, Alexandria khua a mite kikhopna a chih va mi khenkhat leh Silisia gam a leh Asia gam a te kikhopna a mi khenkhatte ahung kisa va, Stephen ahung kinialpih uhi. 10Hizongleh, a pilna leh a soipihtu Hagau chu a nialkhe theita sih uhi. 11Huin, mite a chiilgu va, hute’n chu, Mosi leh Pathian a soisiat ka ja uh, a chi va. 12Huleh, mite, upate, lehkhagialtute a chiilsia va, Stephen chu a sual va, a man va, vaihawmtute kawmah, a pui uhi. 13Huleh, heetpihtu dihloute a bawl va, hute’n chu, Hipa’n hi mun siangthou leh daan a soise zingzing hi. 14Ajiahchu hi Nazareth Jesu’n hi mun siangthou a suse diing a, Mosi in daan ahung piahte a sudanglam diing chi a, a soi ka ja uh, a chi va. 15Huin, vaihawmna a pute zousiah in Stephen a ensaal chiat va, a meel chu angel meel bangin a mu uhi.
اکنون انتخاب شده:
SILBAWLTE 6: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
