SILBAWLTE 4
4
Peter leh John vaihawmtute ma ah
1Huleh, Peter leh John in mite kawma thu a soi laiun, siampute, biahinn houtute, huleh Sadukaite a hung va. 2Mi a hilh uleh Jesu jala misi laha kipana thohkiitna thu a hilh jiahun a lungkimta sih va. 3Huleh, a man va, nitaahlam ahih jiahin a jingni tanphain suangkul ah a khumta uhi. 4Hizongleh, thu ngaikhete laha tamtahin a tahsang va; a tamdan uh chu pasal ngen zong saang nga vel a pha uhi.
Juda vaihawmtute ma a Peter thusoi
5Huleh, hichi ahung hi a, a jingni in, a houtute uleh, upate leh lehkhagialtute, 6Huleh siampu lal Ana leh Kaiapha leh John leh Alexander leh siampu lal chipih zousiah chu Jerusalem khua ah a kikhawm va. 7Huleh, Peter leh John chu a lai vah a dingsah va, Bang thuneihna in ahiai, ahihlouhleh, kua min in ahiai hibang na bawl uh? chi in a dong uh. 8Huin, Peter chu Hagau Siangthou in a dim a, a kawmvah, Nanguh mipi houtute leh Israel upate haw, 9Keiuh, tunia mi haatlou khat suhhatna thu ah, amah bang chi-a hung dam ahitai, chi a na hung phuul uleh; 10Na bawnun he un, huleh, Israelmi zousiah in zong he un, Nazareth Jesu Khrist, na kilhlup uh, Pathian in misi lah apat a kaithou kiit a, Amah min ngei in hi pa chu na bawnva ma ah dam in a dingta ahi. 11Amah ahi nanguh inn bawlte’n na suang deih louh uh a ninga suang phatuampen hung hita chu. 12Midang kuamah kawmah hutdamna a um sih; vaan nuaia mihingte kawma kipia min lahah hung hundam diing min dang mawngmawng a um sih, a chi a.
Jesu min a thuhilh a khap uh
13Huleh, Peter leh John haansandan a muh va, huleh, lehkha siamlou leh mi mawltah ahi uh chih a heet un, thumah a sa mahmah va; Jesu kawmah ana umta uh chih a heta uhi. 14Huleh, a mi suhdam uh a kawmva ding a muhun, bangmah a soisel thei tuan sih uhi. 15Hizongleh, a vaihawmna apat va, chiahtuam diing a thu a piah nungun, a kihou va, 16Hi mite bang i lohta diai? Silmah kithang a bawl uh Jerusalem khua a um zousiah in kichiantahin a he va; ei un zong i nial thei tuam sih uhi. 17Hizongleh, mi kawma a kithan sem louhna diingin, tukalsiah hi mina kuamah kawma thu a soi nawn louhna diingun i vau diing uh, a chi va. 18Huchi in, amahuh a kou va, Jesu min a thu soi kiit hetlou diing leh hilh hetlou diingin thu a pia uhi, 19Hizongleh, Peter leh John in chu a kawmvah, Pathian mitmuh in, Pathian thu man sangin nanguh thu man a hoihzaw eimah? ngaihtuah un. 20Keiun zaw ka sil muh uleh, ka jahte uh soi louin ka um thei sih uh, a chi uhi. 21Huin, amahuh chu a vau naah sem va, a hahta uh, mipi jiahin gawtna lemtaang a mu sih uhi; a silbawl uh jiahin mi zousiah in Pathian a paahtawi ngal va. 22Silmah a, a suhdampa uh kum sawmli sanga tam zaw ahi ngal a.
Khristiante Hagau a, a dimkiit uh
23Huleh Peter leh John a pawt un a lawite uh kawmah a chiah va, siampu lalte leh upate’n a soi zousiah uh a hilh uhi. 24Huleh, amahun a jah tahun, kituaahtah leh aw ngaihtahin; Pathian kawmah, Lalpa, nang chu vaan leh lei huleh, tuipite leh a sunga um zousiahte siamtu Pathian na hi. 25Nang, na suahpa David ka min hi thu na soi hi. Bangchidana Jentelte lungthah ahi viai? huleh mite’n bangchidanin ahiai sil phatuamlou a ngaihtuah uh? 26Khovel kumpite a ding va, vaaihawmte zong a kikhawm uh, Lalpa leh Khrist kalh in, chi'n. 27Na Tapa siangthou, na thaunuh Jesu tungah, Herod leh Pontia Pilat toh, Jentelte leh Israelmite toh a kikhawm tahzet uhi. 28Na khut leh na lungsim a hung tung diing a na guatlawh taphot bawl diingin. 29Huleh, tuin, Lalpa, ahung vaudan uh en dih; huleh, na suahte’n haangsantah a na thu a soi theihna diing uh pia in, 30Mite sudam diing a na khut jah in; Na Ta siangthou Jesu min jala chiamchihna leh silmahte bawl in, a chi va. 31Huleh, a haamtei zohun a umkhawmna uh ahung kiliing a; huleh, a bawnun Hagau Siangthou in ahung dim vehta va, huchi'n, Pathian thu chu haangsantahin a soita uhi.
Jerusalem khua a kouhtuamte khosahdan
32Huleh, a gingta mipite chu, lungsim munkhat leh ngaihtuah munkhat in awm va; a lahva khat in zong a sil neih chu kei a tuam ahi, a chi sih a; sil zousiah a kikop jel zaw uhi. 33Huleh, sawllehte’n silbawltheitahin Lalpa Jesu thohkiitna thu chu a hilh zing va; a bawnva tung ah khotuahna nasatah a um hi. 34A lahva zong tasam kuamah a um sih uh; gamte, ahihlouhleh, innte neite’n a zuah va, a sil zuahte uh man ahung tawi va, 35Sawllehte keeng bul ah a koih jel uhi; huleh, michin kawmah deihdong ching hun chiat in a hawm jel uhi. 36Huleh, Jose, sawllehte’n Barnaba a chih uh (hu min umdan chu, Hamuanta, chihna ahi) Levi chi, Cyprus gam mi ahi a. 37A gam neih chu a zuah a, a man ahung tawi a, sawllehte keeng bul ah a koihta hi.
اکنون انتخاب شده:
SILBAWLTE 4: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
