SILBAWLTE 27
27
Paul Rome khua a, a sawl uh
1Huleh Italy gam a kuang a ka chiah diing uh thu suhpuuh ahih phetin, Paul leh mitaang dang kuate aha chu Augusta pawla mi sepaih zahoutu a min Julia kichi a kemsah va. 2Huleh, Asia gam tuipi geia khua umte tawn diing Adramitim kuang ah ka tuang va, ka kitawlta uhi; Thessalonika khua a um Makedonia gammi, Aristarkha ka tonpih uhi. 3A jingni in Sidon ka tung uhi, Huleh, Julia in Paul a hoih bawl a, kisuhalh diingin a lawite kawmah a chiahsah hi. 4Hu apatin kuang in ka chiah kiit va, huih a lehnun jiahin Cyprus gam liah lamah ka kitawl uhi. 5Huleh Silisia gam leh Pamphilia gamzuul tuilianpi ka khen nungun, Lisia gam a Mira khopi ka tungva. 6Hu ah sepaih zahoutu in Italy gam zu an diing Alexandria kuang a mu a; hu ah ahung tuangsah hi. 7Huleh awl-awl in ni tampi ka kitawl va, hahsatahin Knida zawn ka gei haamhaam va, huihin ahung n an jiahin Salmoni zuanin Krit gam liah ah ka kitawl uhi; 8Huleh, hahsataha paisuaahin, Kuangkhawlna kilawm a chih mun uh ka tungta va; hu kawmah La sia khua a um hi. 9Huin ni tampi a bei taah jiah leh, kuang a pai a lauhuai jiahin, an ngawlni a beita ngal a, Paul in amahuh a thuhilh a, 10A kawmvah, Pute, tua kuang a paina ah siatna leh manna nasatah tung diing ahi chih ka he a, thuampua leh kuang tung chauh ah hilouin, i hinna uh nasanin lauhuai ahi, a chi a. 11Ahihvangin sepaih zahoutu in Paul soi sangin kuang pu leh kuang neitu thu a gingta zaw hi. 12Huleh phalbi huna umna diing a kuang khawlna mun a kizen louh jiahin a tamzaw in, hu a kipana kitawldoh a, Phoenicia tun teitei a, hutaha phalbi sung um a sawmta va; Phoenicia chu Krit gam a kuang khawlmun khat ahi a, sim tumlam leh maal tumlam ngat tuaah ahi. 13Huleh simlam huih awl-awl a ahung nun tahin, a deihzawng uh mu kisain kuang chu a suut va, Krit gam ning zuulzuul ah a kitawl uhi.
Huihpi leh guahpi a tuaah uh
14Hizongleh tomkhat zohin hu apatin Euroklidon a chih uh huihpi haattah ahung nungsuhta hi. 15Huleh, kuang ahung phukhata a, huih lam a nawt theih taah louh jiahin ka mawh hahta va, ahung laam lehlehta hi. 16Huleh, Klauda a chih uh tuikual gam khat zuul ah ka tai va, hahsatahin kuang neu chu ka bitsah thei hamham uhi. 17A kaihdoh zohun a panpihna khaute a zang va, kuang nuai lamah a vial va; huin azawleh sehneel lahah kileengluutkha inteh chih lauin, puanjahna bangkim a puuhsah va, huchi'n ahung mawh toh lehlehta hi. 18Huleh tuikinawh in ahung vawh na sat jiahin, a jingni in kuang a thuampuate tui ah a paikhia uh; 19Huleh a ni thumni in ka khut ngei un kuang van ka paikhia uhi. 20Huleh ni tampi, ni leh aahsi a kilang sih a, huleh huihpi nameiin ahung nuai sih a, hin diing mawngmawng ka kinem nawnta sih uhi. 21Hizongleh sawttah an ne loua a um nungin, Paul a lahvah a ding a, Pute, Krit tuikual a ka thu man a, kuang suut louh a, hibang siatna leh manna tuaah louh diing hijen a. 22Huleh tuin lungmuangtaha um diingin ka hung hasot ahi; ajiahchu na lahva kuamahin hinna a taan sih diing uh, kuang chu se diing ahi. 23Ajiahchu Amah a ka hih a, a na zong ka toh Pathian angel tujanin ka kawmah ahung tung a, 24Lau sin Paul; Kaisar ma ah na ding ngei diing ahi; huleh, ngai in, kuang a na tuanpihte zousiah zong Pathian in ahung piah na hita, ahung chi hi. 25Hujiahin pute, lungmuangtahin um un; Pathian ka gingta a, ahung hilh bangin a um diing hi. 26Hizongleh tuikual gam khat ah ahung sepdoh ngei diing hi, a chi a. 27Hizongleh Adria tui khang lian a huihin a dung a vaai a ahung muutleeng uh a jan sawmleli jan in, jankim lai diingin kuang mite in gam khat tung diing bangin a kiheta va; 28Huleh tui thuuhdan a teh va, laam sawmnih hiin a he va, huleh, themkhat kitawl gamla deuhin a teh kiit va, laam sawmlehngaa hiin a he uh. 29Huin suang lahah leengluutkha inteh chih a lau va, kuang meilam ah siihka li a khia va, khovaah a ngaahta uhi. 30Huleh kuang mite in chu kuang malama siihkate khia kipangin, kuang neu chu tui khang lian ah a khaikhia va, kuang chu taihsan a tum uhi. 31Paul in sepaih zahoutu leh sepaihte kawmah, Hite kuang a a um zing louh uleh na bit sih diing uh, a chi a. 32Huin, sepaihte in kuang neu khaute a saattan va a hahta uhi. 33Huleh, khovaah kuanin, Paul in a bawnun an ne diingin a sawl a, Tuni, an ngawl a na ngaah va, bangmah ne loua na umna uh ni sawmleli ni ahita. 34Hujiahin an ne diingin ka hung sawl ahi; hi chu na damna diing uh ahi; na lahva kuamah a samzang khat zong a mang sih diing, a chi a. 35Huleh hu thu a soizohin, tanghou a la a, a ma vah Pathian kawmah kipaahthu a soi a; huleh, a balkeeh zohin a nepanta hi. 36Huin amahuh zousiah lungmuangtahin a um va, huleh, an zong a neta uhi. 37Huleh kuang sunga um mi chu ka bawnun za nih leh sawmsagih leh guup ka hi uhi. 38Huleh an a neeh kham zohun, buh chu tui lahah a paai va, kuang a suzaangta uhi.
Kuang a kiseta: mituangteng a suaahta
39Huleh kho vaah phetin a gam chin a heta sih va; hizongleh, kuang khawlna piautaah nei khat a mu va huah chu ahihtheih leh kuang tawlluut a tum uhi. 40Huleh siihka haw chu a hahkhia va, tui khang lian ah a nusia va, kuangkhe kaanna a phel uh a, huleh, kuang puanjah chu huih seh zawngin a kaitou va, piau taah a zuanta uhi. 41Huleh tuilianpi nih kisuhtuahna mun ah ka luutkha va, kuang chu lei a susahta uh; huin kuang malam chu a kiphutdetta a, hihliing zoh louhin a um a, a meilam chu tuikinawh a haat jiahin a keehta hi. 42Huleh sepaihte in mitaangte chu tui liau gaalkai a taimang khat umkha unte a chi va thah a tumta uhi. 43Hizongleh sepaih zahoutu in Paul huhing a ut a, a siltup uh a khaam a; tuiliau siam photmah tui khang lian a tawmkhia a khomuala kai masa diing leh; 44Midang khenkhat kuang dang tungah, khenkhat kuang keehphel tung banga gaalkai diing thu a pia hi; Huchi'n, a bawnun khomualah bittahin a gaalkai vehta uhi.
اکنون انتخاب شده:
SILBAWLTE 27: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
