SILBAWLTE 17
17
Thessalonika khua a kouhtuam a phuh uh
1Huleh Amphipoli khua leh Apollonia khua a paipeel va, Thessalonika khua a tungta va, huah chu Judate kikhopna inn a um a; 2Huleh Paul chu amah ngeina in, a kawmvah a luutta, khawlni thumvei Pathian lehkhathute apat suituahpihin, 3Khrist chu gimthuaah diing mawng a hihdan bang, huleh misi lah apat thou kiit ngei diing a hihdan leh, hi na kawmva ka soi Jesu chu Khrist ahi chih a hilhchian a, a sulang hi. 4Huchi'n a lahva mi khenkhat in a gingta va, Paul leh Silas chu a pawlta uh; Pathian ngaihsah Grik mipi nasatah leh numei lamkai tamtahte toh. 5Hizongleh ginglou Judate’n a huphulh va, dawlmun a migilou thasia kuate aha a kawmvah a pui va, mipi a koukhawm va, khopi sung teng a hihbuaita uhi, huleh Jason inn a luh va, amahuh chu vantaang laha puikhiah a tum uhi. 6Huleh amahuh a muh louh phetun, Jason leh unau dang kuate aha khopi sung houtute kawmah a kailuut va, a kikou va, Hi khovel hihbuaitute hi ah zong a hung va; 7Jason in ana zintungsah a; hite zousiah in A min Jesu, kumpi dang a um hi, chi'n Kaisar thu kalhin a um uhi, a chi va. 8Huleh mipite leh khopi sung hoututein hu thu a jah un, a buaita va. 9Huleh amahun Jason leh midangte kawm apatin a luang va heen diing bang aha a la va, amahuh a hahta uhi.
Paul leh Silas Beria khua ah
10Huleh unaute’n ajan ajan in Paul leh Silas chu Beria khua ah a sawlkhepah va; hutah a va tun un Judate kikhopna inn ah a luut uhi. 11Hu mite chu Thessalonika khua a mite sangin ana hoihzaw va, lungsim kipaahtahin thu chu a pom va, a thusoi uh chu a dih leh dihlouh heetna diingin, nichinin Pathian lehkhathu ah a hawl veu uhi. 12Hujiahin amahuh laha tamtahin a gingta va; Grik numei zahumte leh pasalte zong tawmtham louin a gingtata uhi. 13Hizongleh Thessalonika khua a Judate’n, Paul in Beria khua ah Pathian thu a soita chih a heet tahun, hu ah zong a hung va, mipite ahung subuaita uhi. 14Huin kintahin unaute’n Paul chu tui khang lian tana chiah diingin a sawlkhepah va, hizongleh, Silas leh Timothi chu huah a umdenta uhi. 15Huleh Paul puitute’n chu Athen khua tanin a pui va; huleh, Silas leh Timothi chu a kintheitawpa a kawma hung diing a thuhaah chu puain a chiahta uhi.
Athen khua ah Paul
16Huleh Paul in Athen khua a amahuh ana ngaah laiin, hu khua chu pathian lima dimin a mu a, a lung a thahta hi. 17Hujiahin kikhopna inn ah Judate leh Pathian ngaihsahte a nial veu a, dawl munah zong ana um photmahte chu ni chinin a nial jel hi. 18Huin Epikuria mite leh Stoikmite laha mipil kuate aha in zong amah ahung nial va. Huleh, khenkhat in, Hi mi kamta min bang ahiai a soi tup? a chi va. A khen dangte’n, (Jesu thu leh thohkiitna thu a soi jiahin) gam dang pathiante thu soitu ahih tuaah hi, a chi uhi. 19Huleh amah chu a pui va, Areopaga ah a tut va, a kawmah, Hi thuhilhna thah na soi hi na hung hesah thei diai? 20Silmah bang aha ka bil vah na hung tut ahi; hujiahin, Hi sil umzia ka he ut uhi, a chi uh. 21Ajiahchu Athenmi haw zousiah leh a khua va zin umte zong, a kiman kal phot un thuthah taphot soi in aha, a ngaikhe beehin aha a um veu uhi.
Areopaga a Paul thusoi
22Huin Paul chu Mars taang laitah ah a ding a, a soi a, Nanguh Athen khua a mite haw, bangkimah sahkho ngaihsahtah mi na hi uh chih ka he hi. 23Ajiahchu ka vaah kawma, na biahte uh ka et leh, maitaam khat, a tunga, heetlouh Pathian a diing, chi a kigial ka mu hi. Hujiahin, he loupi a na biah uh, hu, Amah chu ka hung hilh ahi. 24Pathian khovel leh a sunga sil zousiah siamtu chu, vaan leh lei Lalpa ahihjiahin, khut a bawl inn bangah a um ngei sih hi; 25Sil tasam bangin mihing khuta natohsah in zong a um ngei sih hi, Amah ngei chu bangkim kawma hinnate, haihna leh sil zousiah petu ahi zaw hi. 26Huleh leitung zousiah luahsuaah a um diingin sisan bul munkhat vehin namchin mi a siam a, amahuh diingin hunbite a guat a, a umna gii uh zong a khamsah hi; 27Amahun Lalpa a hawl va, amai amai va, a muh teiteina diingun, hizongleh, Ama’n chu eite ahung gamlat chiat sih ngal a; 28Ajiahchu Amah ah i hing va, i taang va, i um uh ahi ngal a; nanguh, laphuahsiam kuate aha in zong, Ei zong a haahte i hi ngal va, chi a a soi bangun. 29Huchi'n Pathian haahte i hih jiahun, Pathian chu sana pouh, dangka pouh, suang pouh, mihing khutsiam leh suhtuah a kheen milim tobang ahi, chih, i gingta diing uh ahi sih hi. 30Huleh Pathian in i heet louh laite uh a kitheihmohbawl a, hizongleh, tuin chu gamchin a mi zousiah kisiih diingin thu a peta hi. 31Ni a chiam jiahin, hu ni chiangin a mi guat chu, lei a mite dihtattahin a ngaihtuahsah diing; huchu Pathian in Amah misi lah akipata kaithouin, mi zousiah kawmah a hesahta hi, chi in, 32Huleh, amahun misi lah akipata thohkiitna thu a jah tahun, kimkhat in a nuihsan va; huleh a dangin, Hi thu na kawmah ka ngaikhe kiit diing uhi, a chi va. 33Huchi'n Paul chu a lahva kipat a pawtta hi. 34Hizongleh mi kuate aha a kawmah a belh tinten va, a gingta va; huleh a khenkhat chu Areopagami Dionisia leh numei khat a min Damari leh a kawmva midangte toh ahi uhi.
اکنون انتخاب شده:
SILBAWLTE 17: SIMTBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
