MARKA 2
2
Zeng sukdam thu
(Mt 9.1-8; Lk 5.17-26)
1Chun, ni ieng zât amani hnunga Kapernaum a hung lût nâwkin, inah ama a um ti thu ân thang tah a.
2Chuongchun, kawt bula khawm umna um naw khawp rakin, mi tamtak an hung khâwm a; an kuoma chun thu a hril tah a.
3Chun, mi zeng pakhat, mi palia zâwn a kuomah an hung ṭhuoi a.
4Chun, mipui leia Isu kâwl hnai an tlung thei naw leiin, a umna in chung chu an ṭhiek tah a; chuonga an ṭhiek zo phing chun mi zeng chu a puonpha pum chun an zuk thlâk tah a.
5Chuongchun, Isûn an ringzie chu a lo hmuh a, mi zeng kuoma chun, “Naupa, i suolhai ngaidam a ni tah,” a ta.
6Chun, Dân inchûktirtu ṭhenkhat chutaka chun an ṭhung a, an lungril chun hieng hin an ngaituoh a,
7“Hi mipa hin ieng dinga hieng thu hi hril am a ni leh? Pathien a hrilsiet a ni hi. Mi pakhat, Pathien chau naw chun tuin am suolhai a ngaidam thei a?” tiin.
8Chun, chuong thu chu an ngaituo a ni ti Isûn a lungrilin a hriet nghâl tah a, an kuomah, “Chuong thu chu iengdinga in lungrila in ngaituo am a na?
9Zeng kuoma chun, ‘I suol ngai- dam a ni tah,’ ti le, ‘I puonpha la la, kein fe ta rawh,’ ti hi a ieng am hril a awl lem a?
10Iengkhawm ni sienla, khawvêla hin, Mihriem Naupan suol ngaidam theina a nei ti in hrietna dingin,” (Zeng kuoma chun)
11“Tho la, i puonpha la la, i inah fe ta rawh, ka ti che,” a ta.
12Chuongchun, ama chu a tho a, a puonpha chu a lâk a, an rênga mithmu ngei chun a suok tah a; chuongchun, an rêngin mak an ti hle a, “Hieng ang hrim hrim hi ei la hmu ngai nawh,” tîn Pathien an inpâk tah a.
Levi koa a um
(Mt 9.9-13; Lk 5.27-32)
13Chun, a suok nâwk a, dîl panga chun a fe tah a; chun mipui po po chu a kuomah an va feh a, a lo inchûktir tah a.
14Chun, a fe malamin, Levi, Alphai naupa chu siechawina hmuna ṭhung a hmuh a, a kuomah, “Mi hung zui rawh,” a ta. Ama chu a tho a, a zui tah a.
15Chun, Isu chun Levi inah thlaithlêng a awt a; siedâwltuhai le mi suol tamtakin a închûktirhai chu an awtpui tâwl a, tamtak el an na, ama chu an zui ve bawk hlak.
16Chun, Pharisaihai laia Dân inchûktirtuhaiin Isûn mi suol le siedâwltuhai a awtpui an hmuin, a închûktirhai kuoma chun, “Iengtiziea siedâwltuhai lai a fâkin a dâwn am a na?” an ta.
17Chun, Isûn chu chu a lo hriet a, “Mi hrâthai chun dâktawr an ngai nawh a, mi hrivawisiehai lemin an ngai a nih; mi feltakhai indawn dinga hung ka ni nawh a, mi suolhai lem indawn dinga hung ka nih,” a ta.
Bu nghei thua indawnna
(Mt 9.14-17; Lk 5.33-39)
18Chun, Pharisai le Johan in- chûktirhai chun bu an nghei a; chun, “Ieng dinga Johan inchûktirhai le Pharisai inchûktir haiin bu an nghei hlak a, i închûktirhai hlakin an nghei ve ngai naw?” an ta.
19Isûn an kuomah, “Mo ṭhuoitu- hai kuoma a pasal ding chu a um sûng po chu mo ṭhuoituhai chun bu nghei thei naw ni hai,
20nisienlakhawm, a pasal ding chu an kuoma inthawka ṭhuoi hmang ni la hung tlung a ta, chu nia ruok chun la nghei an tih.
21Tukhawmin puon hlui puon la rin mar lo hlekin an phâwk ngai nawh; phâwk ang sienla, a phâwkna chun keiek lem a tih, a thar chun a hlui chu keiek a ta, inek nasa det lem a tih.
22Chun, tukhawmin uoin thar savun uoin peng hluiahai an thun ngai nawh; thun ang sienla, uoin chun savun peng chu mawrdar a ta, uoin le savun peng chu bo hmang ve vêng a tih, uoin thar chu savun uoin peng tharahai an thun lem hlak a nih,” a ta.
Châwlni inser thua indawnna
(Mt 12.1-8; Lk 6.1-5)
23Chun, Isu chu châwlniin bu bilahai a fe thleng a, chuongchun, a închûktirhai chun an fe malamin buvûihai chu an thliek tah a.
24Chun, Pharisaihai chun a kuomah, “En ta, iengdinga châwlnia thaw thieng naw chu an thaw am a na?” an ta.
25Chun, ama chun an kuomah, “David le a ruolhai an tlâksama, an phîng a ṭâm laia an thil thaw kha in tiem naw am a nih?
26Khânga Abiathar Thiempu Laltak a ni laia Pathien inah a lût a, Thiempuhai chau naw chun fâk thieng lo bei chu a fâk a, a ruolhai khawm a pêk ve thu kha?” a ta.
27Chun, ama bâwkin an kuoma chun, “Châwlni hi mihriem ta dinga siem a na, mihriem hi Châwlni ta dinga siem a ni nawh;
28chuongchun, Mihriem Naupa hi Châwlni chunga chen khawm Lal a nih,” a ta.
اکنون انتخاب شده:
MARKA 2: HMARCLBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
