INṬANNA 38
38
Juda le Tamar
1Chuong lai chun hieng hi a nih a, Juda chu a unauhai laia inthawk chu a fe thlah a, Adullam mi pakhat a hming Hira chu a zu bêl tah a.
2Juda chun chutaka chun Kanaan mi pakhat a hming Sua naunu a hmuh a, ama chu a neia a pâwl tah a.
3Chuongchun, ân rai a, naupasal a nei a; chun, Juda chun a hmingah Er a sak a.
4 #
Gen 46.12 Chun, ân rai nâwk a, naupasal a nei nâwk a; chun, a nuin a hmingah Onan a sak a.
5Chun, naupasal a nei nâwk a, a hmingah Selah a sak a: chu chu a nei lai chun Juda chu Chezib-ah a um a.
6Juda chun a nau lutîr Er chu nuhmei a neipêk a, a hming chu Tamar a nih.
7Nisienlakhawm, Juda nau lutîr Er chu LALPA mithmuah mi suol a nih a, LALPAIN ama chu a sukhlum tah a.
8Chun, Juda chun Onan kuomah, “I u nuhmei chu pâwl la, pasalhai unau thaw ding chu thawpêk la, i u ta ding chun chi thlapêk rawh,” a tih a.
9Nisienlakhawm, Onan chun chithla ding chu ama thla a ni naw ding a nih ti a hriet a; chuongchun, a u nuhmei a pâwl po leh a u ta dinga chi thlapêk lo dingin a chi chu hnuoiah a sukthlâk hlak a.
10A thilthaw chu LALPA mithmua chun suoltak a nih; chuleiin, ama khawm chu a sukhlum tah a.
11 #
Ruth 1.13; Lev 22.13 Juda chun a monu Tamar kuoma chun, “Ka naupa Selah hi a puitling hmakhat chu i pa in tieng pasal nei loin lo um phawt rawh,” a tih a. “Chuong naw chun ama khawm hi a uhai angin thi rawi a tih,” a ti a nih. Chuongchun, Tamar chu a pa in tieng chun a va um tah a.
12Chun, a nakie chun Sua naunu, Juda nuhmei chu, a thih a; chun, a ngai a hung bo a, Timnaa berâm hmul vawtuhai kuom tieng chun ama le a ruolpa Adullam mi Hira chu an hang feh a.
13Chun, Tamar chu, “I tarpupa chu a berâm hmul vaw dingin Timnaah a hang fe ding a nih,” ti hril a nih a.
14Ama chun a pasal sûnna silfênhai chu a hlîp a, inkhumna puonin ân khum a, ân tuom tlat a, Timna lampuia Enaim kul kawt- khâra chun a lo ṭhung a: Selah chu a puitling ta sih a, a pa chun a nuhmei dingin ân neitir naw zo a ni tah ti a hriet sih a.
15Chun, Judain ama chu a hmuin nawchizawr amanih a sâwn a, a hmai chu ân khum tlat sih a.
16Chuongchun, lampui sîra nu- hmei tieng chu a va pan a, “Hung ta, lunginsiettakin zâl hmunkhat ei tih,” a tih a; a mo kha a nih ti a hriet si nawh a. Ama chun, “I mi zâlpui chun iengam mi pêng i ta?” a tih a.
17Ama chun, “Ran ruol laia kêlte inphur ka ti che,” a tih a. Chun, ama chun, “Chu chu i mi hung inphur hmaa lo hrên ding iemani bêk i mi pêk ding?” a tih a.
18Ama chun, “Hrên ding ieng am pêng ka ti cheh a?” a tih a. Amanu chun, “I hming namna le i hrui, i hmawl chawi le khan,” a tih a. Chuongchun, a pêk a, a zâlpui tah a; chun, amaa inthawk chun nau a vawn tah a.
19Chun, a tho a, a inkhumna puon chu a hlîp a, a hmeithaina silfênhai chu ân bel nâwk tah a.
20Chun, Judain a thil hrên chu nuhmei kuta inthawk la dingin a ruolpa Adullam mi kutah kêlte chu ân phur a, nisienlakhawm, ama chun a va hmu zo nawh a.
21Chuongchun, nuhmei umna laia mihai kuoma chun, “Lampui sira Enaima nawchizawr um kha khaw lai am a um ta leh?” tiin ân dawn a. Anni chun, “Nawchizawr hrim hitaka hin an um nawh ie,” an tih a.
22Chuongchun, Juda kuoma chun a kîr nâwk a, “Ama chu ka hmu zo nawh, a hmuna mihai khawmin, ‘Nawchizawr hrim hitaka hin an um nawh,’ an lo ti bawk a,” a tih a.
23Juda chun, “Nei sawng el raw se, chuong naw chun muolpho rawi ei tih, en ta, hi kêlte hi kân phur a, ama i hmu zo si nawh a,” a tih a.
24Thla thum vêl amani hnunga chun Juda chu, “I monu Tamar chun tlangvâl a dit a, chunawa khawm, ngai ta, sâwn a pai nghe nghe annaw,” tiha hril a nih a. Juda chun, “Ṭhuoi suok unla, raw hlumin um raw se,” a tih a.
25Chun, an ṭhuoi suok chun Tamar chun, “Hi thil neitupaa inthawk hin a nih nau ka vawn chu,” tiin, a tarpupa kuoma chun mi a tir a; ama bawkin, “Lunginsiettakin hieng hming namna hai, hrui hai, hmawl hai hi tu ta am a nih en chieng ta khai,” a ti bawk a.
26Juda chun chuong thil chu ama ta a nih ti a hriet a, “Ama chu keia nêkin a fel lem a nih, ama chu ka naupa Selah chu kân neitir ta si nawh a,” a tih a. Chun, Juda chun ama chu a pâwl nâwk ta dêr nawh a.
27Chun, nauhain a se laiin, ngai ta, a sula chun inphîr an lo um a.
28A nau pakhat chun a kut a hung pur dawk a; chuongchun, nau dawm mi chun, “Hi hi a suok hmasa lem a ni hi,” tiin a chel a, a kuta chun pat sen ân buntir a.
29A kut chu a kei lût nâwk lai chun, ngai ta, a unau chu a hung suok tah a; chuongchun, nau dawmtu chun, “Iengdinga suokna ding insiem am i nih a?” a tih a, chuleiin, a hmingah Perez an sak a.
30Chu hnunga chun a unau pat sen bun kha a hung suok ve a, a hmingah Zera an sak a.
اکنون انتخاب شده:
INṬANNA 38: HMARCLBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.