MARKA 8
8
1Cu cân i mibu cu an tamtuk hringhran, eiawk le zeihmanh an ngei lo, Jesuh nih lamkaltu kha a kawh hna i an sinah, 2“Mibu hna hi atu nithum ka sinah an um cang, eiawk zeihmanh an ngeih lo caah ka zâng an fak tuk hringhran. 3Rawl`âm i an inn leiah kan tlunter ahcun, lampi ah a buhri lai, zeitintiah a cheu cu lam hla in a rami an si,” tiah a ti. 4A lamkaltu hna nih, “Ahonihdah hi bantuk ramking ah hi tluk a tammi minung hi rawl a pêk khawh lai?” tiah an ti. 5“Changreu zeizatdah nan ngeih?” tiah a hal hna. Annih nih, “Pasarih” tiah an ti. 6Mibu kha lei ah ṭhu dingin nawl a pêk hna. Changreu pasarih cu a lak i lawmhnâk bia a chim, a cheu hnuah, mibupi sin i phaw dingin a lamkaltu kha a pêk hna i mibu kha an phawt hna. 7Nga tlawmpal an ngeihmi zong thluachuah a pêk i an sinah phawt dingin a chimh hna. 8Cuticun khim tein an ei, an ei hlei zong a puam ngaimi sei sarih khat in an ruh. 9A eitu hna cu mi thongli hrawng an si. Cun a tlunter hna. 10Chikkhatteah tilawng ah a lamkaltu hna he an i cit i Dalmanutha ram an phân. 11Cun Farasih kha Amah el awkah an ra, Amah hneksaknâk caah van lei in hmelchunhnâk tuah kha an fial. 12Asinain anih cu a thlarau in a hrum ai i “Zeiruangahdah tuchan mi hna nih hmelchunhnâk thil lawng an kawl? Biataktein kan chimh hna, tuchan mi hna sinah hin hmelchunhnâk pêk an si hrimhrim lai lo,” tiah a ti. 13A kaltâk hna i tilawng ah â cit ṭhân i va ralah a kal. 14Lamkaltu hna nih changreu ken an rak philh i tilawng ah khan changreu pakhat dah ti lo cu zeihmanh an ngei lo. 15Cun an sinah, “Farasih hna thilnu le Herod thilnu chungin ṭha tein i ralring u,” tiah a ti. 16Annih nih, “Changreu kan ngeih lo ruang i a chimmi a si men lai,” tiah an ruah. 17Jesuh nih a hngalh tikah, “Zeiruangahdah changreu nan ngeih lo ruang i cubantukin khua nan ruah? Atu tiangah nan theithiam lo i nan hngal kho hrim lo maw, nan lung a hak ko rih maw? 18Mit nan ngei ko nain nan hmu kho lo maw? Hna nan ngei ko nain nan thei lo maw? Zeihmanh nan i cinken kho hrim lo maw? 19Mi thongnga ca i changreu ka cheu lioah khan a hleimi sei zeizatdah nan ruh kha” tiah a ti. Annih nih, “Sei hleihnih,” tiah an ti. 20A si ah mi thongli ca i changreu pasarih ka cheu lioah khan a hleimi a nganmi sei zeizatdah nan ruh? A ti ṭhân hna i annih nih, “Sei sarih,” tiah an ti. 21Cuticun an sinah, “Cutiasiah zeitindah nan lung a pem khawh lo?” tiah a ti. 22Cuhnuah Bethsaida khua a phân i mitcaw pakhat a sinah an ratpi, amah cu tawng dingin an nawl. 23Anih nih mitcaw kut kha a tlaih i khua chungin a chuahpi. A mit ah cil a châk i a cungah a kut a chuan i khua a hmuhkhawh le hmuhkhawh lo kha a hal. 24Khua a hun chuan i, “Minung hna hi thingkung a kalmi bantukin ka hmuh hna,” tiah a ti. 25Cuticun a mit kha a tonghpiak ṭhân, a hun zohter ṭhân i zeizong vialte fiang te i hmu kho lakin a dam. 26Cun a in leiah a tlunter i, “Khua chungah lut hlah, khuachung mi hna zong ahohmanh chim hna hlah,” tiah a ti. 27Jesuh le a lamkaltu hna cu Sisaria ram Filipi khua ah an tlawng, lam i an kal lioah, lamkaltu kha, “Mi nih mizei anka ti dah?” tiah a hal hna. 28Annih nih, “Baptisma petu Johan, a si an in ti, midang nih Elijah, a si an in ti, cheukhat nih profet hna lakah pakhat khat a si, an in ti,” tiah an ti. 29Anih nih, “A si ah nannih nih mizei nan ka ti dah?” tiah a hal hna. Peter nih, “Krih na si,” tiah a leh. 30Anih nih a konglam kha ahohmanh chim lo dingin fak piin ralrin a pêk hna. 31Cun anih nih, Mi Fapa nih harnâk tampi a teminnâk ding le, upa hna le, tlângbawi hna le, nawlbiacawnpiaktu hna nih an hlawt lainâk le, an thah lainâk le, nithum hnu i a thawhṭan lainâk kha cawnpiak a thawk hna. 32Cu bia cu fanghlang tein a chim i Peter nih ka dangah a kalpi i sîk hram a thawk. 33Asinain anih cu â mer i a lamkaltu kha a zoh hna, Peter kha sîk pahin, “Satan, ka hnulei ah kal! Pathian thil ruat loin minung thil lawng na ruah caah a si,” tiah a ti. 34Mizapi kha a lamkaltu hna he a sinah a kawh hna i “Zulh a ka duhmi pauh cu, amah i hlaw sehlaw, a vailam put in ka zul seh. 35Zeitintiah a nunnâk himter a duhmi pauh nih a hloh lai i keimah le thawngṭha ruangah a nunnâk a hlohmi pauh nih a himter lai. 36Zeitintiah mi nih vawlei hi a dihlak in ngeiin, a nunnâk lo sehlaw a caah zeidah san atlaih hnga? 37Asiloah mi nih a thlarau thlennâk ah zeidah a pêk khawh lai? 38Zeitintiah tuchan ṭhangthar ṭangdang kai a hmangmi le misual hna lakah keimah le ka bia a zahpimi pauh, Mi Fapa nih, van mithiang hna he a Pa sunparnâk thuamin a rat tikah cu minung cu a zahpi ve lai,” tiah a ti.
اکنون انتخاب شده:
MARKA 8: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
