MARKA 16
16
1Sabbath ni a dih tikah, Mary Magdalin le Jeim nu Mary le Salom an rat i a ruak thuh awkah zihmui kha an cawk. 2Zarhkhat chung ni hmasatbik zingka ni a chuah hnu ah thlân cu an va phân. 3Anmah le anmah an i caih i, “Ahonihdah thlân kharnâk lung a kan thawnpiak lai” tiah an ti. 4Asinain an va zoh tikah, lung cu thawn cia in an va hmuh, a ngan ngai ngaimi lung a si. 5Thlân chungah an lut i tlangval pakhat, puanrang aih in thlân orhlei kam i a ṭhumi kha an va hmuh i an lau ngai ngai. 6Asinain anih nih, “Lau hlah u, an khenhchihmi Nazaret Jesuh kha nan kawl si kaw, A tho ṭhân cang! Hika ah a um ti lo. Zohhmanh u an chiahnâk hi. 7Va kal ulaw, a lamkaltu hna le Peter kha va chim hna u, Galili ramah nan hmaiah a kal lai, nan sinah a rak chim cang bangin cuka ah nan hmuh lai, tiah nan chimh hna lai,” tiah a ti. 8Annih cu thinphâng in an ther i thinlau ngaiin thlân in an tlung. An thin a phântukah ahosin hmanh ah an chim lo. 9Cun zarhkhat chung ni hmasa bik zingka te i a thawhṭan ah khan Mary Magdalin a chung i khuachia pasarih a `hawlpiakmi sinah â langh hmasa bik, 10Amah he a rak umṭi cangmi hna sinah a va kal i mithi ngai i an ṭah lioah a va chimh hna. 11A nung cang ti le nu nih a hmuhnâk kong an theih nain an zum lo. 12Cuhnuah an lakah mi pahnih kâ dang i a kalmi hna mit hmuh ah phun dangin â langh ṭhân. 13Annih nih lamkaltu dang kha an va chimh hna, asinain an chimmi zong cu an zum hlei lo. 14Cuhnuah rawl an dûm lioah hleikhat hna sinah â langh i a thawhṭhân hnu i amah hmutu hna chimmi an zumh duh lo ruangah, an zumhlonâk le an lungthin hahnâk kha a sîk hna. 15An sinah, “Vawlei vialte ah kal u law sermi vialte sinah thawngṭha hi chim u. 16A zum i baptisma a ingmi cu khamh an si lai, asinain a zumlotu cu thiamlo a co lai. 17Cun hi hmelchunhnâk hna nih zumtu hna cu a zulh hna lai: Ka min in khuachia an ṭhawl lai I holhthar in an holh lai, 18rul kha kut in an lâk lai i thihnâk sivai zei pauh ding hna hmanhsehlaw an zei a poi lai lo. Mizaw cungah an kut an chuan lai i an dam lai. 19Cubangin Bawipa nih an sinah bia a chim dih in vanah lâk in a um i Pathian orhlei kutah a ṭhu. 20Cun annih cu an kal i kakip ah phung an chim, Bawipa nih anmah a ṭuanpi hna i bia kha fehter dingin hmelchunhnâk in a zulh peng hna. Amen.
اکنون انتخاب شده:
MARKA 16: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
