MATTHAI 22
22
1Cun Jesuh nih tahchunh nâkin an sinah bia a chim ṭhân. 2“Vanbawi pennâk cu siangpahrang pakhat nih a fapa caah nupi ṭhit rawldanghnâk a tuahpiakmi bantuk a si, 3ṭhitumhnâk rawl ei awkah a sawmmi hna va au dingin sinum kha a thlah hna; a sinain an ra duh lo. 4Sinum dang a thlah ṭhan i an sinah, ka sawmmi hna sinah, rawl ei awk ka timh dih cang ka cawpa le satil thau thau ka thah hna i timh cia tein a um dih cang, ṭhit umhnâk rawl ei awkah ra cang u, tiah nan ti hna lai,” tiah a ti hna. 5Asinain zei rel lo in an kaltâk hna, pakhat lo ah, pakhat a chawlehnâk ah an kal. 6Midang nih sinum kha an tlaih hna i fak piin an hrem i an thah hna. 7Cu thil cu siangpahrang nih a theih tikah a thin a hung ngaingai. Ralkap a thlah hna i lainawngmi kha hrawkin an khua zong mei in a khanghter dih hna. 8Cun sinum hna sinah, rawl cu timh cia a si, asinnain ka sawmmi hna kha ei awkah an i tlâk lo. 9Cucaah zatlâng lamah kal ulaw, nan hmuhmi pauh rawl ei awkah va sawm hna u,’ tiah a ti. 10Cuticun sinum hna cu zatlâng lamah an kal, an hmuhmi pauh misual he miṭha he an rak hruai hna i ṭhitumhnâk in kha an khat. 11Siangpahrang cu a sawmmi hna zoh awk i a rat tikah an lakah ṭhitumhnâk puan â aih lomi pakhat a hmuh i 12a sinah, ‘Ka kawi zeiruangahdah ṭhitumhnâk puan aih loin hika ah na rat? tiah a ti. Anih nih zeihmanh a chim lo. 13Siangpahrang nih sinum hna sinah, ‘A kut le ke ṭem ulaw, khualeng mui lakah hlawnh u, cukâ ah cun ṭah le hacang rialnâk a um lai, ’tiah a ti. 14Zeitintiah sawmmi cu tampi an si i thimmi cu tlawm te an si, tiah a ti. 15Cuticun Farasih hna cu an i tong i a chimmi bia in Amah an tlaihkhawh nâkhnga khua an khâng. 16Anmah zultu le Herod zultu hna he a sinah an thlah i, “Cawnpiaktu, midik na si i Pathian kong biatak in na cawnpiak tawn, minung mithmai na zoh ballo ti kha kan theih, ahohmanh na thleidang hna lo. 17Cucaah zeitindah na ruah? Sizar sin i ngunkhuai pêk hi phungning a si maw?” tiah an ti. 18Jesuh nih an suahsualning kha a hngalh i, “Mi depde hna, zeicadah nan ka hnek sak? 19Ngunkhuai phaisa kha ka hmuhsak tuah u,” tiah a ti hna. Cuticun nga-mu kha an pêk. 20Anih nih, “Hihi aho hmânthlâk le min dah a si?” tiah a ti hna. 21Annih nih, “Sizar” tiah an ti. Anih nih, “Sizar thil cu Sizar pe ulaw, Pathian thil cu Pathian pe u,” tiah a ti hna. 22Cubia cu an theih tikah an khuaruah a har tuk i lo koin an zâm. 23Cuni ṭhiamṭhiam ah Sadusih, thawhṭhânnâk a um lo, titu kha a sinah an ra i bia an hal. 24“Cawnpiaktu, Moses nih, fa ngei loin mi a thih ahcun, a nau nih fa a ngeihpiak lai tiah,” a ti. 25Asi, kan lakah unau pasarih an um, upa bik nih nupi a ngei i a thi, fa a ngeih manh lo caah a nau pa nih a ngeih ṭhân. 26Pahnihnâk zong fa ngei loin a thi, pathumnâk le pasarihnâk tiangin fa ngei loin an thih tâk. 27Andih lak an thih hnu ah minu zong a thi ve. 28Cuticun thawhṭan niah aho nupi bik dah a si hnga? An dih lakin an ṭhit dih fawn, tiah an ti. 29Jesuh nih, “Cathiang le Pathian thiltikhawhnâk nan hngalh lo caah nan palh tawn. 30Zeitintiah thawhṭhannâkah cun nupi le pasal an i ngei ti lai lo, van i Pathian vanmi hna bantuk an si lai. 31Asinain mithi thawhṭhannâk kongah Pathian nih nan sin i a chimmi, 32“Kei, Abraham Pathian, Isak Pathian, Jokob Pathian ka si, a timi kha nan rel bal lo maw? Pathian cu a thimi Pathian a si lo i a nungmi Pathian a si,” tiah a leh hna. 33Cu bia cu zapi nih an theih tikah a cawnpiakmi ah an khuaruah a har ngai ngai. 34Farasih hna nih, Sadusih hna holh kho loin a tuah hna ti an theih tikah hmun khatah an i pum. 35Cuticun an lak i phungthiam pakhat nih Amah hneksak nâkah, 36“Cawnpiaktu, nawlpek miah a zeihidah a nganbik hnga?” tiah a hal. 37Jesuh nih, “Bawipa, na Pathian cu na lungthin dihlak, na thlarau dihlak na ruahnâk dih lakin na dawt lai,” tiah a ti. 38Hihi nawlpêk nganbik le hmasa bik a si. 39A changtu cu, “Nangmah nâ dawt bangin na innpa na dawt lai” timi hi a si. 40Hi nawlpêk pahnih ah hin nawlbia le Profet hna bia vialte an i fun dih,” tiah a ti. 41Farasih hna an i ton lio ah Jesuh nih bia a hal hna, 42“Krih kong hi zeitindah nan ruah” Aho fapa dah a si? tiah a ti. Annih nih, “David Fapa,” tiah an ti. 43Anih nih, “Asiahcun David nih Thlarau thawngin zeitindah ‘Bawipa’ tiah a auh kun? 44David nih, ‘BAWIPA nih, ka Bawipa sinah, na ral hna na ke tangah ka chiah hlan lo cu, ka orh leiah ṭhu’ a timi kha. 45David nih ‘Bawipa’ a timi kha zeitindah a fapa cu a si khawh kun? tiah a ti. 46Kâ khat hmanh in an let kho lo, cuni thawk cun ahohmanh nih bia kâ khat hmanh an hal ngam ti lo.
اکنون انتخاب شده:
MATTHAI 22: HAKABSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
