MATTHAI 14
14
1Cu cân ah Herod siangpahrang nih Jesuh kong kha a rak theih i 2a sinum hna sinah, “Cupa cu Baptisma petu Johan a si cu ta, thih nâkin a thoṭhân a si cu ta, cucaah cubantuk khuaruahhar tuahkhawhnâk nih amah ah rian a ṭuan cang” tiah a ti. 3Zeitintiah Herod nih a nau philip nupi Herodi ruangah Johan kha a tlaih i ṭem buin thongah a thlak. 4Johan nih a sinah, “Nupi i na ngeih hi phungning a si lo, tiah a rak ti ruangah a si. 5Johan cu thah a duh nain mizapi nih profet i anruah caah mizapi kha a ṭih hna. 6Asinain Herod chuah ni a phâk tikah, Herodi fanu kha an hmaiah an lâmter i cu nih cun Herod lung a lawmhter. 7Cucaah a halmi pauh pe dingin a sinah chiatserh in bia â kam. 8Anu nih ruahnâk a cheuh bantukin hika ah Baptisma petu Johan lu khengin ka pe, tiah a ti. 9Siangpahrang cu a ngaih a chia, asinain, a biakam ciami le rawl a ei pimi hna ruangah pe dingin nawl a pêk hna. 10Mi a thlah hna i thong chung i Johan lu cu a tanter hna. 11A lu cu khengin an rak put i ngaknu kha an pêk i a nu sinah a kalpi. 12A zultu hna nih a ruak kha la in an phum. Jesuh zong an va chimh. 13Cu bia cu Jesuh nih a theih tikah, cu hmun in hnathiannâk hmunah tilawngin a kal. Asinain mizapi nih an theih tikah, khua chungin ke in a sinah an kal. 14Tikam a phâk tikah mibu tam nawn a hmuh hna, a zângfah ngai ngai hna i an zawtnâk kha a damter hna. 15Zanlei a si tikah a lamkaltu kha a sinah an ra i, “Hihi ramking a si, khua le a hnu tuk cang. Khua ah an kal i ei awk an i cawk nâkhnga mizapi hi ṭinter cang hna,” tiah an ti. 16Jesuh nih, “An kal a herh lai lo, nanmah nih ei awk pe hna u,” tiah a ti hna. 17Annih nih, “Hikâ ah changreu panga le nga pahnih lawng kan ngei,” tiah an ti. 18Anih nih, “Ka sinah ratpi u,” tiah a ti. 19Cuticun mizapi kha ram cungah ṭhu dingin nawl a pêk hna. Changreu panga le nga pahnih kha a lâk i vanlei zoh in thluachuah a pêk hnu ah, changreu kha a cheu i lamkaltu sinah a pêk. Cun lamkaltu hna nih mizapi sinah an pêk. 20An dih lakin khim tein an ei i a hleimi zong sei hleihnih tiangin an char. 21A eitu hna cu nu le ngakchia relchih lo in mi 5000 hrawng an si. 22Mizapi kha a ṭirter hna lio ah, Jesuh nih va ral i kal hmasa dingin a lamkaltu kha tilawng ah a citter cawlh hna. 23Mizapi an ṭin hnu ah, thlacam dingin tlangah a kai. Zanlei a si cang i Amah lawng in a um. 24Tilawng tu cu rili lai fangah a um i thli nih ralden in a nam lengmang i ti let zong nih a thenh lengmang hna. 25Khuadei laiah Jesuh cu anmah lei panh in ke in ti cungah a kal. 26Lamkaltu hna nih ti cungah ke i a kal kha an hmuh tikah an lau i, “Muithla a si” tiah thinphang ngaiin an ai. 27Asinain Jesuh nih a hun chawnh zau hna i, “Hnangam tein um u; Keimah dahkaw ka si; ṭih hlah u,” tiah a ti hna. 28Peter nih, “Bawipa, nangmah na si ahcun ti cungin na sinah ra dingin nawl ka pe,” tiah a ti. 29Anih nih, “Ra ngat,” tiah a ti. Peter cu tilawng in a chuak i Jesuh lei panh in ti cungin kein a kal. 30Asinain thlitu a hrang lenmi kha a hmuh tikah a ṭih i ti chungah pil hram â thawk, “Bawipa, ka khamh tuah,” tiah a au. 31Chikkhatteah Jesuh nih a kut in a tlaih i, “Aw zumhnâk tlawmpa, zeiruangahdah lungawṭawm in na um?” tiah a ti. 32Tilawng chung an phâk tikah thlitu zong a dai ṭhân. 33Cuticun tilawng chungah a ummi hna cu an ra i an biak; “Pathian Fapa na si taktak ko,” an ti. 34Varal an kai tikah, Genesaret ram kha an phân. 35Cuka mi hna nih Amah a si ti kha an hngalh tikah, kiangkap ram vialte ah mi an thlah i mizaw vialte kha an ratpi hna. 36A puanki an tongh khawhnâk tiangin an nawl i a tawngtu vialte cu tlamtling tein an dam dih.
اکنون انتخاب شده:
MATTHAI 14: HAKABSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
