LUKA 7
7
1Cubangin mizapi theih i a chimmi vialte tlâng a komh dih in Kapernaum khua ah a lut. 2Ralbawipa sinum pakhat, apu nih a tlaihchan ngaimi kha, thi hnikin a zaw. 3Jesuh thawng a theih le cângkâ, a innah ra in a sinum damter awkah Judah upa kha a sinah a thlah hna. 4Jesuh sin an phâk tikah bomh awkah â tlakmi a si tiah an nawlpiak. 5Zeitintiah kan miphun a kan dawt i kan sinagog zong a kan sakpiak, zângfah ko tiah fak piin an nawl. 6Jesuh cu an sinah a kal. Inn an phâk lai te ah, ralbawipa nih a hawi le a sinah a thlah i “Bawipa, i buaiter duh hlah. Ka inn hi na ratnâk dingah â tlâk lo. 7Cun nasin i rat awk hmanh ah kâ tlâk hlei lo. Bia hei chim law, ka sinum a dam ko lai. 8Zeitintiah kei zong hotu kuttangah a ummi ka si. Ka tang zongah ralkap an um. Nawl ka pêk i, ‘Kal’ ka timi a kal. Midang sinah, ‘Ra’ ka ti ah an ra tawn. Ka sinum sin zongah, ‘Hihi tuah’ ka ti ahcun an tuah ko, tiah a ti. 9Jesuh nih cu bia cu a theih tikah, cupa cu mak a ti ngai ngai, a hun zoh hna i amah zultu mizapi sinah, “Kan chimh hna, Israel mi hna lak zongah hibantuk zumhnâk ngan ka hmu lo,” tiah a ti. 10Cun thlahmi hna inn i an va phâk tikah sinum cu ṭha te i dam in an va hmuh. 11A thaizingah khua pakhat Nain an timi ah a kal i a lamkaltu le mi tampi nih an zulh. 12Khua kulhnâk kutkâ pawng an phâk tikah, ngaihmanh mithi an rak zawnh, fapa ngeihchun a si i a nu cu nuhmei a si. Cuticun khuachungmi tampi nih an zulh. 13Bawipa nih nu cu a hmuh tikah a zângfah ngaingai i, “Ṭaphlah” tiah a ti. 14Cun a ra i onmi ruakkuang kha a tongh i a zawntu hna nih an dirpi. “Rawlthar, tho, kan ti,” tiah a ti. 15Mithi cu a tho i biachim a thawk. Cun anu sinah a pêk. 16Mi vialte cungah ṭihnâk a phân i Pathian an thangṭhat. “Kan lakah Profet lianngan a rak phân a si hih,” tiah an ti. “Pathian nih a mi hna a rak veh hna,” tiah an ti ṭhân. 17Cu thawng cu Judia le a pawngkam ram vialte ah a thang dih. 18Johan zultu hna nih cu thil vialte cu Johan kha an va chimh. 19Cun Johan nih a zultu pahnih a kawh i Jesuh sinah a thlah hna. “A ra dingmi cu na si maw, midang kan hngah rih lai dah? tiah a cah hna. 20A thlahmi hna a sin an phâk tikah, Baptisma petu Johan nih, “A ra dingmi cu nasi maw, midang kan hngah rih lai dah? tiah na sinah a kan thlah,” tiah an ti. 21Cu cân ah Jesuh nih zawtnâk phunkip le fahnâk phunkip le thlarau ṭhalo kha a damter hna i mitcaw zong khua a hmuhter hna. 22Jesuh nih an sinah, “Va kal ulaw, nan hmuhmi le nan theihmi thil hi Johan cu va chim u; mitcaw nih khua an hmuh i ke beimi ke in an kal, thinghmui mi an thiang i hnachetmi nih thawng an theih, mithi thawhter an si i sifak hna nih Thawngṭha an theih. 23Ka cung i lungsilonâk a ngei lomi cu mi thluachuak an si,” tiah a leh hna. 24Johan thlahmi an kir hnu ah Jesuh nih mizapi sinah Johan kong a chimh hna. “Zeizohahdah ramcar ah nan kal? Hluang kung thli nih a hninh mi zoh ah maw? 25Asiloah zei zoh set ahdah nan kal? Puan nem â aihmi zoh ah maw? Ngaihmanh u, puan man sungin â thuammi le, nuam ngai in a nungmi cu siangpahrang innah dah kaw an um cu. 26Asiah zei zoh set ahdah nan kal? Profet zoh ah maw? Asi, kan chimh hna profet nâk i profet a si deuhmi. 27“Ngaihhmanh ka lamkaltu na hmai ah ka thlah i anih nih na hmai ah na lam a ser lai, tiah a kong an ṭialmi kha amah hi a si. 28Zeitintiah, nu hrinmi lakah Johan nâk in profet ngan deuh an um lo, asinain Pathian pennâk i mi hme bik zong amah nâkin a ngan deuh,” tiah a ti. 29Mi vialte nih an theih i ngunkhuai khawltu hna tiangin Pathian kha thiam an coh, Johan Baptisma a rak ing cangmi an si. 30Asinain farasih le nawlbia thammi hna tu cu a sin i baptisma a ingmi an si ve lo, cu caah an ca i Pathian remruat mi kha an al. 31Bawipa nih, “Atu chanthar mi hna hi zeihedah kan tahchunh hna lai? zeibantuk set dah an si? 32Chawdawr hmun i a ṭhumi ngakchia, an hawi le he an i chawn i thanglawi kan in tum piak hna i nan lâm duh lo. Kan in tuarpi hna i nan ṭap duh fawn lo, timi bantuk hi a si. 33Zeitintiah Baptisma petu Johan cu a ra, rawl a ei lo i misur zong a ding lo, ‘khuachia nih a tuah,’ nan ti. 34Mi Fapa a ra, a ei i a din, nan i thawh i, ‘Pawkau pa, misur hang rit hmang, ngunkhuai khawltu le misual hna hawikawm!’ tiah nan ti ṭhân. 35Asinain fimnâk cu a fale hna nih thiam an coh ko,” tiah a ti. 36Cuhnuah farasih hna lakah pakhat nih rawl ei a sawm. Cuticun Farasih innah a lut i rawl a dûm. 37Cun zohhmanh, cu khua i a sual ngaimi minu pakhat nih, Farasih innah rawl ei in a um kha a theih le cângkâ thungrâng dur in a rimhmui mi sathau â rak put, 38Ake hramah ṭahpah in a dir, a mitthli in a ke a cinter i a sam in a hnawh. Ake cu a hnawh i rimhmui sathau kha a thuh. 39Cucu a sawmtu Farasih nih a hmuh i hi pa hi profet a si ahcun, amah tawngtu nu hi mizei bantukdah a si kha hngalh awk a si lo maw? zeicatiah a mah hi misual a si,” tiah a lung in a ti. 40Jesuh nih, “Simon na sinah chim awk ka ngei,” tiah a ti. Anih nih, “Cawnpiaktu, chim tuah,” tiah a ti. 41Phaisa coihtu nih leibatu pahnih a ngei, pakhat nih zanga, a bat i pakhat nih sawmnga. 42Chamnâk ding an ngeih lo caah an pahnihin a ngaihthiam hna. Cuticun aho deuh nih dah an dawtdeuh lai,? ka chim tuah, tiah a ti. 43Simon nih, “Tamdeuh a ngaihthiammi nih a dawtdeuh lai, tiah ka ruah,” tiah a ti. Anih nih, na dik bak ko, tiah a ti. 44Cuticun minu lei zohbu in Simon sinah, “Hi minu hi na hmu maw? na innah ka lut i ke `awlnâk ti zong naka pe lo, anih nih a mitthli in a cinter i a sam in a hnawh. 45Na ka hnam lo, asinain hi minu hi na in ka luh ri in ka ke hnamh a ngol lo. 46Ka lu ah sathau naka thuh lo, anih nih kake ah rimhmui mi sathau a thuh. 47Cucaah kan chimh, hi tluk tiangin a dawt, cucaah a sualnâk tampi kha ngaihthiam a si. Tlawm deuh ngaihthiam nih cun tlawm deuh in a dawt ve, tiah a ti. 48Cuticun minu sinah, “Na sualnâk ngaihthiam a si cang,” tiah a ti. 49Rawl a ei pimi hna nih, “Sualnâk tiang ngaithiamtu hi mizei dah a si hnga?” tiah an ti. 50Cun minu sinah, “Na zumhnâk nih an khamh, hnangam tein va kal cang,” tiah a ti.
اکنون انتخاب شده:
LUKA 7: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
