西番雅書 3
3
耶路撒冷个罪惡㧯救贖
1這悖逆、腐敗、欺負人个城慘了！ 2姖毋聽從上主个命令，也毋接受佢个管教。姖毋倚靠上主，也毋親近姖个上帝。 3姖該兜做官个像吼吼滾个獅仔；姖該兜審判官貪心到像暗晡時當枵个豺狼，連一枝骨頭乜無留到天光。 4姖該兜先知無負責任，又詭詐；姖該兜祭司打垃圾聖物，曲解上帝个法律。 5總係上主還係在這城肚；佢行公義，絕對毋會做不義个事。逐朝晨，佢向佢个子民顯明公義，從來毋識停止；總係不義个人民繼續犯罪，毋知見笑。
6上主講：「𠊎消滅列國，蹂踏佢等个城市，將佢等个城樓變做石堆，路項無人上下。𠊎使佢等个城市荒涼，街路空空，無留半儕。 7𠊎恅到該時𠊎个子民一定會尊敬𠊎，接受管教，永遠記得𠊎給佢等个教訓！總係過無幾久，佢等又還較厲害做壞事了！」
8上主講：「你等定著愛等，等𠊎䟘起來告列國該日。𠊎已經決定召集列國萬邦前來，將𠊎个大發譴全部倒在佢等身上。𠊎熱情个火愛燒滅全世界。
9「該時，𠊎愛改變萬民，俾佢等全部用淨浰个話來祈求𠊎，同心合意事奉𠊎。 10𠊎所分散个子民，連在遠遠个古實河壩該位个，也愛倒轉來向𠊎獻祭。 11到該時，𠊎个子民啊，你等毋使因為悖逆𠊎个事感覺到見笑；因為𠊎愛對你等中間除掉所有驕傲个人。在𠊎个聖山，你等毋會再自高自大。 12𠊎愛在你等當中留下謙卑、困苦个人；佢等會到𠊎面前來求𠊎保護。 13所賸个該兜以色列人，毋會再做壞事，毋會講花撩，乜無詭詐。佢等會安居樂業，毋會再驚麼人。」
快樂个歌
14 錫安个子民啊，應當唱歌！
以色列人啊，應當大聲喊！
耶路撒冷个百姓啊，
應當滿心歡喜快樂。
15上主已經解除你个責罰，
已經逐走你所有个仇敵。
上主 — 以色列个王㧯你共下，
你毋使再驚會有麼介災禍。
16在該日會有人對耶路撒冷講：
錫安啊，毋使驚！
毋使驚到手軟腳攋！
17上主 — 你个上帝㧯你共下；
佢个大能使你得勝。
佢愛在你當中歡喜快樂；
佢个痛惜愛賜你新个生命 #3:17 「愛賜你新个生命」係根據一兜古譯本；希伯來文也有現代譯本翻做「愛使你安靜」。。
佢愛因你歡喜唱歌，
18像人在過節个時恁歡喜 #3:18 「像人…歡喜」係根據一兜古譯本，希伯來文个意思無清楚。。
上主講：𠊎已經停掉災禍个威脅，
除掉你个見笑 #3:18 「𠊎已經停掉…見笑」：希伯來文个意思無清楚。。
19時節到了！
𠊎愛責罰一切欺負你个人；
𠊎愛拯救軟弱、失散个人，
使流亡个人倒轉自家个家園。
𠊎愛使佢等个見笑變做榮耀；
佢等在全世界會有好名聲。
20時節到了！
𠊎愛將你等四散个子民𢱋轉來；
𠊎愛在你等眼前恢復你等个產業，
使你等个名聲傳到天下萬民。
上主恁樣宣佈了。
اکنون انتخاب شده:
西番雅書 3: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012