西番雅書 2
2
喊人民悔改
1毋知見笑个國民啊，愛聚集共下，好醒了！ 2趕審判吂判決以前，就像礱糠吂掃掉以前，在上主大發譴个日仔吂臨到你等以前，遽遽醒過來！ 3世上所有謙卑聽從佢命令个人啊，愛尋上主！愛追求公義，在上主面前謙卑，恁樣在上主發譴个日仔，你等可能會得到庇佑。
以色列个鄰國愛受責罰
4 迦薩城會被人廢掉，亞實基倫會變荒涼。亞實突人會在當晝被人逐走；住在以革倫个人也會被人逐出城外。 5住在海滣个基利提族啊，你等慘了！迦南 — 非利士人个土地啊，上主已經向你宣判，佢愛消滅你，毋留半儕。 6你等海滣个地區愛變做草場，頂高有牧人个草寮㧯羊欄。 7還賸个猶大人會佔領你等个土地；佢等會在該位畜羊，暗晡頭在亞實基倫个屋肚睡目。上主 — 佢等个上帝愛看顧佢等，俾佢等倒轉來重整家園。
8上主 — 萬軍个元帥恁樣講：「𠊎聽到摩押人个嘲謔，㧯亞捫人个譭謗；佢等嘲謔𠊎个子民，誇口講愛霸佔佢等个土地。 9𠊎係以色列永生个上帝；𠊎發誓：摩押一定會像所多瑪，亞捫會像蛾摩拉，全部變做鹽窟，永遠荒廢，雜草滿地。𠊎該兜還賸个子民愛搶佢等，得到佢等个土地。」
10 摩押㧯亞捫个人會恁樣受責罰；因為佢等驕傲、自誇，又侮辱上主 — 萬軍元帥个子民。 11上主會使佢等驚到愊愊掣。佢愛除掉世上所有个神明，恁樣列國㧯海島个人逐儕就會在自家个地方敬拜佢。
12上主也愛㓾掉古實人。
13上主愛伸手攻打北方，消滅亞述；佢愛使尼尼微城變做荒涼，像當燥个曠野。 14尼尼微會成做牛羊㧯各種走獸歇睏个所在；貓頭鳥會在爛屋肚个柱頭做藪，在窗門口咕咕滾；烏鴉也在壞門段前亂吵；香柏樹樑柱露出來 #2:14 本節在希伯來文意思無清楚。。 15這一切會發生在這个城，因為姖誇口自家个能力，恅到自家最安全，對自家講：「𠊎係世上最偉大个城。」總係，姖愛變做荒涼，變做走獸歇睏个所在；逐個過路人指指點點嘲謔姖。
اکنون انتخاب شده:
西番雅書 2: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012