羅馬書 6
6
對罪來死，在基督底背來生
1恁樣，𠊎等愛樣般講呢？𠊎等做得繼續生活在罪个底背，來俾上帝个恩典增加嗎？ 2當然做毋得！對罪來講，𠊎等已經死掉。𠊎等樣般做得繼續生活在罪个底背呢？ 3你等敢毋知，𠊎等領洗禮來同基督耶穌結連，就係領洗禮來加入佢个死嗎？ 4通過洗禮，𠊎等已經同佢共下死，共下埋葬了！這係為到愛使𠊎等過新个生活；像天頂个阿爸用佢榮耀个大能，使基督對死復活共樣。
5若係𠊎等㧯基督合而為一，經歷佢个死，𠊎等定著也會㧯佢合而為一，經歷佢个復活。 6𠊎等知，𠊎等个舊人已經同基督共下釘十字架，係愛毀滅𠊎等有罪个身體，使𠊎等毋會再做罪个奴隸； 7因為人一死，就脫離罪个權勢。 8𠊎等若係同基督共下死，𠊎等確信，𠊎等也會同基督共下生。 9因為𠊎等知，基督已經對死復活，佢毋會再死了；死不能再控制佢了。 10佢个死，係同罪切斷關係，一擺就圓滿；佢這下生等，係為上帝來生。 11共樣，對罪這方面來講，你等愛看自家係死掉个，總係在基督耶穌个生命底背，你等係為上帝來生。
12所以，你等會死个身體毋好再俾罪管轄，去順從身體个情慾。 13你等身體个每一部份也毋好向罪投降，去做邪惡个器皿。顛倒，你等愛將自家獻給上帝，像對死復活个人，將歸個人奉獻給佢，做公義个器皿。 14罪定著毋會管轄你等；因為你等已經毋係在法律底下，係在上帝个恩典之下。
義个奴僕
15恁樣來講，因為𠊎等無在法律底下，係在上帝个恩典之下，𠊎等就做得犯罪嗎？絕對做毋得！ 16你等敢毋知，你等做人个奴僕就愛服從主人；服從麼人，你等就係佢个奴僕。這就係講，你等做罪个奴僕，結果就係死；你等順從上帝，就成做義人。 17感謝上帝！雖然你等識做罪个奴僕，總係這下，你等一心順從所傳給你等个教訓。 18你等已經對罪中釋放出來，成做義个奴僕。 19𠊎驚你等毋了解𠊎个意思，正用普通个例仔來對你等講。頭擺你等放縱情慾，違悖法律，做罪个奴僕；這下，你等愛將自家歸個人獻做義个奴僕，使你等成做聖潔。
20你等做罪个奴僕个時，你等毋接受義个約束。 21你等這下看做見笑个事，該時做了，結果得到麼介好處呢？不過係死定定！ 22這下，你等已經對罪中釋放出來，成做上帝个奴僕；結果你等將生命完全獻給佢，所收成个就係永生。 23因為罪个代價就係死；總係上帝所賜个恩典就係俾𠊎等同𠊎等个主基督耶穌合而為一，來得到永生。
اکنون انتخاب شده:
羅馬書 6: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012