羅馬書 7
7
用婚姻个關係做比喻
1兄弟姊妹啊，你等係了解法律个人，一定會明白𠊎所愛講个：法律對人个約束，係在人還生个時正有效。 2比論來講，一個結婚个婦人家，厥老公還生，姖就在法律个約束之下，做毋得離開老公；老公若過身，姖就毋使再受這法律个限制。 3所以，老公還生个時，姖若同別个男人同居，就愛看姖做淫婦。若係厥老公過身掉去，在法律上姖就係一個自由人，若係同別个男人結婚，也毋算犯姦淫。 4兄弟姊妹啊，你等个情形也係恁樣。照法律來講，你等係已經死掉个人，因為你等係基督身體个一部份；你等這下已經歸屬對死復活个主，使𠊎等做得好好為上帝工作。 5𠊎等還照肉體生活个時，摩西个法律激起𠊎等个邪念，在𠊎等个肢體中發作，結果就係死。 6總係，對管轄𠊎等个法律來講，𠊎等係已經死掉个人；這下，法律已經無法度約束𠊎等了。𠊎等事奉上帝係照聖靈个新指示，毋係再照法律條文个舊樣式。
法律㧯罪
7恁樣，𠊎等做得講法律本身係罪麼？當然做毋得！顛倒，通過法律，𠊎正知罪係麼介。若毋係法律講「做毋得貪心」，𠊎就毋知貪心係麼介。 8罪通過法律个命令尋到機會，在𠊎底背激起各種个貪念。無法律，罪就無效力。 9𠊎本來生活在法律之外；後來法律个命令來到，罪就發生效力，結果𠊎就在罪中死掉。 10法律个命令原來係愛使人得到生命个；總係，對𠊎來講，它反轉卻帶來滅亡。 11因為罪通過法律个命令尋到機會誘惑𠊎，也通過法律个命令害死𠊎。
12 摩西个法律本身係神聖个；法律个命令係神聖、公平㧯良善个。 13恁樣講，係該良善个害死𠊎嗎？當然毋係！係罪！總係，罪係通過該良善个正顯出原形，結果就帶來死。通過法律个命令，罪个惡質就越來越明顯。
人性个矛盾
14𠊎等知，摩西个法律係屬靈个；總係，𠊎係屬肉體个，已經賣給罪做奴隸。 15𠊎所做个，𠊎自家無明白：因為𠊎所願意个，偏偏毋去行；𠊎所惱个，反轉去做。 16𠊎若係做𠊎毋願意做个事，𠊎就係承認法律係著个。 17既然恁樣，𠊎所做个，並毋係正經𠊎做个，係在𠊎底背个罪做个。 18𠊎也知，在𠊎底背，就係在𠊎肉體个底背，無良善。因為，𠊎有行善个心，總係無行善个能力。 19𠊎所願意个善，𠊎偏偏毋行；𠊎所毋願意个罪惡，𠊎偏偏去做。 20既然𠊎做𠊎所毋願意个，就表示這毋係𠊎做个，係在𠊎底背个罪所做个。
21因為恁樣，𠊎發現有一個法則在作怪：在𠊎愛行善个時，邪惡總係纏等𠊎。 22𠊎个內心係合意上帝个規則； 23總係，𠊎看出𠊎个肢體被另外一個法則控制等；這法則同𠊎內心所合意个規則交戰，害𠊎無辦法脫離在𠊎底背作怪个罪个法則。 24𠊎還艱苦噢！麼人能救𠊎脫離這害死𠊎个身體呢？ 25感謝上帝，通過𠊎等个主耶穌基督，佢就能救𠊎。
𠊎个情形係恁樣：𠊎自家只能用心靈順從上帝个規則；總係，𠊎个肉體卻降服罪个法則。
اکنون انتخاب شده:
羅馬書 7: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012