羅馬書 3
3
1照恁樣來講，猶太人有麼介較贏外邦人呢？割禮又有麼介價值呢？ 2事實上，逐方面都有。第一，上帝將佢个真道交給猶太人。 3就算佢等中間有背信个，上帝敢會因為恁樣就無信實嗎？ 4當然毋會！就算人人攏總變做花撩，上帝還係真實个；就像聖經所講：
你講話个時，無包好捉，
被人告个時，定著會贏。
5若係𠊎等个不義會顯明上帝个公義，𠊎等愛樣般講呢？上帝責罰𠊎等，係佢个不義嗎？ (𠊎係照人个想法講个。) 6當然毋係！上帝若係不義，佢樣般做得審判世間呢？
7若係𠊎講花撩會使上帝个真實還較顯明，更加得榮光，𠊎愛樣般講呢？做麼介𠊎還被人定做罪人呢？ 8做麼介毋講：「𠊎等做得行惡來顯善」呢？有兜人譭謗𠊎，講𠊎識講這種个話；佢等受定罪係應該个。
無一個義人
9恁樣，𠊎等猶太人比外邦人較好係麼？當然毋係恁樣！𠊎已經指出，猶太人㧯外邦人共樣係在罪惡个權勢之下。 10像聖經所講：
無義人，
連一個乜無。
11無聰明人，
也無尋上帝个人。
12人人離開上帝，
全部行毋著路；
無行善个，
連一個乜無。
13佢等个喉嗹像打開个墳墓；
佢等个舌乸盡講詭詐个話；
對嘴唇出个像係蛇个毒氣；
14佢等个嘴充滿惡毒个咒罵。
15愛去害人抑係㓾人，
佢等走到像飛恁遽；
16無論佢等去到㖠位，
就會有破壞㧯悲慘。
17佢等毋知平安个路；
18也無學到敬畏上帝。
19𠊎等知，法律个命令係對在法律底下个人講个，愛給全世界个人伏在上帝个審判台前，無一儕有話好講。 20因為無人能靠行法律來被上帝定做義；法律个目的係愛使人知自家有罪。
上帝使人同佢有正確个關係
21總係這下，上帝樣般使人同佢有正確个關係已經啟示出來；同法律全無關係。摩西个法律㧯眾先知就係證據。 22上帝使人同佢有正確个關係，係因為佢等信耶穌基督 #3:22 「因為佢等信耶穌基督」抑係譯做「因為耶穌基督个信實」。。無論係麼人，只有信基督，上帝正會恁樣對待佢等： 23因為世間人全部犯了罪，虧欠上帝个榮光。 24這下，上帝白白施恩，通過基督耶穌來救贖佢等，使佢等同佢有正確个關係。 25上帝犧牲耶穌做贖罪祭，通過佢流血來死，使人因為信佢來得到赦罪。上帝恁樣做係愛顯明佢个公義。 26先前，因為佢个忍耐，佢寬容人个罪；總係這下，佢取消人个罪來顯明佢个公義。恁樣，上帝顯明佢自家係公義个，也稱一切信耶穌个人係義人。
27恁樣，𠊎等有麼介好誇口呢？一些仔乜無！樣般講呢？係對遵行法律嗎？毋係！係對信來个。 28𠊎等个結論係：人同上帝有正確个關係只有通過信，毋係通過遵行法律。 29敢講上帝單淨係猶太人个上帝嗎？佢也敢毋係外邦人个上帝嗎？當然係！ 30既然上帝只有一位，佢就愛使猶太人通過信同佢有正確个關係，對外邦人也係共樣。 31恁樣來講，𠊎等个信害摩西个法律失效係麼？當然毋係！顛倒，𠊎等使法律還較有效。
اکنون انتخاب شده:
羅馬書 3: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012