羅馬書 4
4
亞伯拉罕个榜樣
1論到𠊎等血統个祖先亞伯拉罕，關係佢个經驗，𠊎等愛樣般講呢？ 2若係佢被上帝稱做義人係因為佢个行為，佢就有好誇口；總係，在上帝个面前，佢無麼介好誇口。 3聖經講：「亞伯拉罕信上帝，因為佢个信，上帝就算佢做義人。」 4做事个人得到工錢，毋算恩典，係佢應該得个。 5總係，有權好判罪人做無罪个係上帝；信佢个人有好同佢有正確个關係，毋係因為行為，係因為信。 6大衛所講，該毋係靠行為被上帝算做義个人有福氣，就係這個意思。佢講：
7過犯得到原諒、
罪惡得到赦免个人，
佢係樣般有福氣啊！
8無被主定罪个人，
這人實在有福氣噢！
9 大衛所講个福氣單淨屬受割禮个人嗎？毋係！它也係屬無受割禮个人；因為𠊎等已經引用聖經个話，講：「亞伯拉罕信上帝，因為佢个信，上帝就算佢做義人。」 10這係在麼介情形之下發生个呢？係在亞伯拉罕受割禮以前，抑係以後呢？係在以前，毋係以後。 11佢後來正接受割禮；這係一種記號，證明佢在接受割禮以前已經因為信被上帝算做義人了。所以，對所有無受割禮、總係因為信被上帝算做義个人來講，亞伯拉罕係屬靈个阿爸。 12佢也係已經受割禮个人个阿爸，毋單淨係因為佢等領受割禮，最重要个係因為佢等跈等𠊎等个祖先亞伯拉罕，過佢在吂受割禮以前該種信心个生活。
上帝應許个實現
13上帝應許亞伯拉罕並佢个子孫，講佢會承受這世界。這應許毋係因為亞伯拉罕遵行法律，係因為佢信，就被上帝稱做義人。 14若係上帝个應許係給遵行摩西法律个人，人个信就無意思，上帝个應許也無價值。 15上帝个發譴係對法律來个；無法律，就無違犯法律个事。
16所以，應許係用信做根據个；這係上帝應許个保證：佢會白白施恩給亞伯拉罕所有个子孫，毋單淨係遵行法律个，也包含該兜像亞伯拉罕恁樣信上帝个人。因為亞伯拉罕係𠊎等大家屬靈个阿爸。 17像聖經所講：「𠊎立你做盡多國个阿爸。」在上帝面前，這應許係有效个；亞伯拉罕所信个就係使死人復活、對無創造萬有个上帝。 18在無盼望个時，亞伯拉罕還係盼望，還係信，所以正成做「盡多國个阿爸」。像聖經所講：「你定著會有盡多子孫。」 19該時，亞伯拉罕會一百歲了。佢自家个身體像係死人，莎拉生育个機能也已經喪失，總係，佢个信心並無因為恁樣就減少。 20佢無喪失信心，也無懷疑上帝个應許；佢个信心反轉還較堅固，將榮光歸給上帝。 21佢確信上帝定著會成就佢所應許个。 22這就係亞伯拉罕樣般因為信「被上帝算做義人」个原因。 23總係，「算做義人」這句話，毋單淨係講論佢， 24也係為𠊎等來講个。因為𠊎等信使𠊎等个主耶穌對死復活个上帝，所以佢算𠊎等做義人。 25主耶穌被人交在人个手中，為到𠊎等个罪來死；上帝使佢復活，為到使𠊎等同上帝有正確个關係。
اکنون انتخاب شده:
羅馬書 4: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012