馬可 3
3
醫好手瘸掉个人
(馬太 12:9-14；路加 6:6-11)
1耶穌又入去會堂；在該位有一個人，佢个一支手瘸掉。 2有兜人想愛尋耶穌个把柄來告佢，就在塍頭掌等，愛看佢在安息日會為人醫病麼。 3耶穌㧯該手瘸掉个人講：「䟘起來，到頭前來。」 4然後，問大家講：「關係安息日，𠊎等个法律係樣般規定？愛做好事，抑係做壞事？愛救人，抑係㓾人？」
大家恬恬毋出聲。 5耶穌就發譴，用目珠䁯佢等，同時心中為到這兜人悲傷，因為佢等个心肝恁硬。佢㧯該人講：「手伸出來！」該人將手一伸出來，佢个手就好了。 6法利賽人出去，就㧯希律黨个人參詳愛樣般對付耶穌來殺害佢。
湖邊个一大群人
7耶穌㧯厥學生離開該位到加利利湖該片去，有一大群人跈等佢。這兜人係對加利利、猶太、 8耶路撒冷、以土買、約旦河東片，並泰爾㧯西頓附近个城市來个。佢等來尋耶穌係因為聽到耶穌所做个一切事情。 9因為人盡大群，耶穌就吩咐學生準備一隻船，免得大家尖等佢。 10因為佢醫好盡多病人，所有發病个人全部想愛尖到頭前來摸佢。 11該兜被邪靈附身个人一看到佢，就伏在佢个面前，喊講：「你係上帝个孻仔！」
12耶穌嚴嚴命令邪靈，做毋得將佢个名傳出去。
耶穌揀選十二個使徒
(馬太 10:1-4；路加 6:12-16)
13耶穌上一座山頂，召集佢所合意个人來跈佢。佢等來到佢个面前， 14耶穌就選出十二個人，喊佢等做使徒，愛佢等常常同佢共下，也愛派佢等去傳道， 15又給佢等逐鬼个權柄。
16耶穌所揀選个十二個人係：西門 (耶穌又同佢安名彼得)， 17西庇太个孻仔雅各㧯雅各个老弟約翰 (耶穌又同佢等安名半尼其，意思係「性情暴烈，像雷公个人」)， 18又有安德烈，腓力，巴多羅買，馬太，多馬，亞勒腓个孻仔雅各，達太，激進黨个西門， 19㧯出賣耶穌个加略人猶大。
耶穌㧯別西卜
(馬太 12:22-32；路加 11:14-23；12:10)
20耶穌倒轉去屋肚；又有一大群个人來聚集，害佢㧯學生連食飯个時間也無。 21耶穌屋下个人聽講這個情形，出來愛阻擋佢，因為有人講：「佢發癲了！」
22有兜對耶路撒冷來个經學教師講：「佢係被別西卜附身！佢係靠鬼王逐鬼！」
23耶穌喊這兜人來，用比喻對佢等講：「撒但樣會逐撒但呢？ 24一個國家自相紛爭，該國家一定會企毋住。 25一個家庭自相紛爭，該家庭定著會企毋住。 26恁樣，假使撒但自相紛爭，佢个國決定企毋住，會滅亡掉去。
27「無人能進入勇士个屋下去搶佢个財產；除了先將勇士捆起來，正有法度搶佢个東西。
28「𠊎實在㧯你等講，人所犯一切个罪，㧯所講一切譭謗个話 #3:28 「譭謗个話」抑係譯做「譭謗上帝个話」。，全部可以得到赦免； 29總係褻瀆聖靈个人永遠無可能得到赦免，因為佢所犯个係永遠个罪。」 30(耶穌講這個話係因為有人講：「佢係被邪靈附身。」)
耶穌个阿姆㧯兄弟
(馬太 12:46-50；路加 8:19-21)
31這時，耶穌个阿姆㧯老弟來到；佢等企在外背，喊人傳話給耶穌，講佢等愛見佢。 32有一大群人圍等，坐在耶穌个身邊；佢等㧯佢講：「看啊，若姆㧯若老弟在外背，愛見你！」
33耶穌講：「麼人係𠊎个阿姆？麼人係𠊎个兄弟？」 34佢看等坐在周圍个人，講：「看啊，𠊎个阿姆，𠊎个兄弟在這位！ 35凡實行上帝旨意个就係𠊎个兄弟、姊妹，㧯阿姆。」
اکنون انتخاب شده:
馬可 3: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
