馬可 2
2
耶穌醫好癱風病人
(馬太 9:1-8；路加 5:17-26)
1過無幾日，耶穌又轉到迦百農城；大家聽講佢在屋下个消息。 2盡多人就聚集來，連門前也無空位。耶穌對佢等講道个時節， 3有四個人扛一個癱風病人來見耶穌。 4總係因為人盡多，佢等無法度將佢扛到耶穌面前。所以佢等就在耶穌停留个所在，對屋頂拆一隻孔仔；然後，將病人連佢所睡个草蓆，縋下去。 5耶穌看到這兜人个信心，就對癱風病人講：「細子啊，你个罪得到赦免了。」
6有幾個經學教師坐在該位，心中議論講： 7「這個人講話樣敢恁過份！佢講侮辱上帝个話！除了上帝以外，麼人有赦罪个權柄呢？」
8耶穌即時知佢等心中想麼介，就對佢等講：「你等樣般恁樣想呢？ 9對這個癱風病人講：『你个罪得到赦免』容易呢？抑係講：『䟘起來，拿你个草蓆行轉去』較容易呢？ 10這下𠊎愛對你等證明，人子在地上有赦罪个權柄。」就對癱風病人講： 11「𠊎吩咐你䟘起來，拿你个草蓆轉去屋下！」
12該人就䟘起來，拿起草蓆，在大家面前行出去。眾人就非常著驚，頌讚上帝講：「𠊎等從來吂識看到恁樣个事！」
耶穌呼召利未
(馬太 9:9-13；路加 5:27-32)
13耶穌又倒轉加利利湖邊，一大群人去到佢該位，佢就教訓佢等。 14佢再向前行，看到一個稅務員，就係亞勒腓个孻仔利未，坐在稅關。耶穌對佢講：「來跈𠊎！」利未就䟘起來跈佢。
15後來耶穌在利未个屋下食飯，盡多稅務員㧯無守教規个人也跈等佢來，當中也有盡多同耶穌㧯厥學生共下食飯。 16有兜法利賽人中个經學教師看到耶穌同壞人㧯稅棍共下食飯，就質問厥學生講：「佢樣般同稅棍㧯壞人共下食飯呢？」
17耶穌聽到，就應講：「健康个人毋使醫生，有病个人正愛。𠊎來个目的毋係愛呼召義人，係愛呼召罪人。」
禁食个問題
(馬太 9:14-17；路加 5:33-39)
18有一擺，施洗約翰个學生㧯法利賽人當在該位禁食，有人來問耶穌講：「施洗約翰个學生㧯法利賽人个學生禁食，你个學生無禁食，係為到麼介呢？」
19耶穌應講：「新郎還在婚姻个筵席中，人客敢愛使禁食？新郎同佢等共下个時，佢等就毋使禁食。 20總係時間會到，新郎會被人對佢等當中帶走，該時佢等就愛禁食。
21「無人用新布補舊衫；若係恁樣，新補个布會扯裂舊衫，爛孔就還較大。 22也無人將新酒裝在舊皮袋肚；若係恁樣，新酒會脹裂皮袋，酒㧯皮袋全部會打喪掉。新酒愛裝在新皮袋肚正著！」
安息日个問題
(馬太 12:1-8；路加 6:1-5)
23有一個安息日，耶穌經過麥田，厥學生也同佢共下行；佢等一片行一片捋兜麥串。 24法利賽人對耶穌講：「你看，你个學生樣般做安息日禁止做个事？」
25耶穌應講：「大衛㧯跈佢个人欠缺又肚飢个時做麼介，你等無讀過係麼？ 26佢入去上帝个聖殿，食獻給上帝个餅。這個事發生在亞比亞他做大祭司个時節。照𠊎等个法律，只有祭司正做得食這個餅仔；總係大衛拿來食，又分給跈佢个人食。」
27耶穌結論講：「安息日係為到人設个；人毋係為到安息日來存在个。 28所以人子也係安息日个主。」
اکنون انتخاب شده:
馬可 2: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
