馬可 13

預言聖殿个毀滅

(馬太 24:1-2；路加 21:5-6)

1耶穌對聖殿出來个時，佢一個學生對佢講：「先生，你看，這兜石頭實在盡大，這兜建築樣會恁靚！」

2耶穌對佢講：「你緊看這兜偉大个建築係麼？這所在个每一垤石頭全部會被人拆下來，無一垤石頭會疊在另外一垤个頂高。」

災難㧯迫害

(馬太 24:3-14；路加 21:7-19)

3耶穌在橄欖山頂，面對聖殿坐等。彼得、雅各、約翰㧯安德烈暗中來問佢講： 4「請㧯𠊎等講，這個事幾時會發生呢？這一切發生个時節會有麼介兆頭？」 5耶穌㧯佢等講：「你等愛細膩，毋好被人迷惑。 6有盡多人會假冒𠊎个名來，講：『𠊎就係基督！』對恁樣迷惑盡多人。 7你等聽到附近相㓾个風聲㧯遠方戰爭个消息，該時，毋使驚。這兜事定著會發生；總係這毋係講末日已經到了。 8民族會㧯民族相㓾；國家會㧯國家戰爭；逐所在會有地動㧯飢荒。這兜事个發生就像產婦生產前个陣痛一樣。

9「你等自家愛細膩，因為有人會捉你等，送你等上法院；你等也會在會堂肚被人鞭打。為到𠊎个緣故，你等會企在統治者㧯君王个面前受審判，來對佢等做見證。 10總講，福音一定愛先傳給萬民。 11你等被人捉到，送去法院个時，毋使先愁愛講麼介話；到該時上帝指示麼介，你等就講麼介；因為你等所愛講个，毋係自家个話，係聖靈愛通過你等講个。 12該時，兄弟會出賣兄弟來害死佢等；阿爸也會恁樣對待子女；子女也會同爺𡟓作對來害死佢等。 13為到𠊎个名，大家會怨恨你等；總係忍耐到底个人定著會得救。

大災難

(馬太 24:15-28；路加 21:20-24)

14「你等看到該『毀滅性、邪惡个東西』企在它無應該企个所在个時 (讀个人愛了解這句話个意思)，住在猶太地區个，愛走去山頂避難； 15在屋頂个，毋好下來，也毋好入去屋肚拿麼介東西； 16在田項个，毋好轉去拿外衫。 17在該兜日仔，懷胎个婦人家㧯給孲𤘅仔食乳个阿姆就慘了！ 18你等愛祈求上帝，毋好俾這兜事在寒天發生！ 19因為該兜日仔个災難係對上帝創造世界以來毋識有个，將來也毋會再有。 20若係主無減少該兜災難个日仔，無人能生存下去。總係，為到佢所揀選个子民，主已經減少該兜日仔。

21「若係有人㧯你等講：『你看，基督在這位！』抑係『基督在該位！』毋好相信。 22因為假基督㧯假先知會出現；佢等會行神蹟奇事，盡佢所能來迷惑上帝所揀選个子民。 23你等愛細膩！𠊎已經先將這一切个事攏總㧯你等講過了。

人子个再臨

(馬太 24:29-31；路加 21:25-28)

24「該兜災難个日仔過掉以後，日頭會變烏，月光毋會再光， 25星仔會對天頂跌下來，太空个系統也會搖動。 26該時，佢等會看到人子大有能力㧯榮耀坐雲降臨。 27佢愛差天使到天涯海角去，對世界這片到世界該片，召集佢所揀選个子民。

無花果樹个教訓

(馬太 24:32-35；路加 21:29-33)

28「你等愛對無花果樹學教訓。當樹枝轉青，生出新葉个時，你等就知熱天會到了。 29共樣，你等看到這一切个現象，就愛知時間會到 #13:29 「時間會到」抑係譯做「佢就會來」。，已經在門口了。 30𠊎實在㧯你等講，這代人還吂攏總過身以前，這一切个事就會發生。 31天㧯地會無掉，總係𠊎个話永遠毋會無掉。

愛警醒

(馬太 24:36-44)

32「總係該愛來个日仔㧯時間，無人知；天頂个天使也毋知，孻仔也毋知，只有阿爸知。 33你等愛細膩，愛警醒，因為你等毋知該時間幾時會到。 34這個事親像一個人出外旅行，將家務交給僕人管理，分配每一個人个工作，又吩咐掌門个愛注意。 35所以，你等愛警醒，因為你等毋知主人幾時會轉來，係臨暗仔抑係半夜，係天曚光抑係日頭出來以後。 36若係佢忽然轉來，毋好俾佢看到你等在睡目！ 37𠊎㧯你等講个話，也係㧯大家講个：你等愛警醒！」

اکنون انتخاب شده:

馬可 13: THV12Hdb

های‌لایت

کپی

مقایسه

به اشتراک گذاشتن