馬可 12

壞佃農个比喻

(馬太 21:33-46；路加 20:9-19)

1耶穌又用比喻對佢等講：「有一個人開一垤葡萄園，周圍用籬笆圍等，又在園中挖一隻醡酒池，起一座守望台，然後將葡萄園租給佃農，自家出外去旅行。 2到收葡萄个時節，佢派一個僕人去對該兜佃農收佢應得个果子。 3該兜佃農將該僕人捉來打，逐佢空手轉去。 4園主又派另外一個僕人去；佢等卻將佢个頭那打爛孔，又侮辱佢。 5園主再過派一個僕人去，佢等就將佢㓾死。佢等又像恁樣對付盡多人，有兜被佢等打，有兜被佢等㓾死。 6園主只有賸佢所惜个孻仔好派。最後，佢就派佢去，心肝想：『最少，佢等乜會尊重𠊎个孻仔。』 7總係該兜佃農彼此參詳講：『這人係園主个繼承人；來啊，𠊎等來㓾死佢，佢个產業就變做𠊎等个了！』 8佢等就揪等佢，㓾死佢，將佢个身屍㧒到園外。」

9耶穌問講：「恁樣，葡萄園个主人會樣般做呢？佢一定會來㓾死該兜佃農，將葡萄園租給別人。 10你等無讀過這站聖經係麼？

泥水師傅所㧒掉个這垤石頭，

已經成做地基中最重要个 #12:10 「地基中最重要个」抑係譯做「屋棟个拱心石」。。

11這係主个作為，

係樣般奇妙个事啊！」

12因為猶太人个領袖知耶穌所講个比喻係責備佢等，就想愛捉佢。總係佢等驚眾人，高不將就離開佢。

納稅个問題

(馬太 22:15-22；路加 20:20-26)

13有兜法利賽人㧯希律黨个人奉命來見耶穌，想愛對佢个話尋把柄來害佢。 14佢等對佢講：「先生，𠊎等知你係誠實个人；毋管人樣般想，你也毋會看人个情面，總係忠實將上帝个道理教示人。納稅給羅馬皇帝係違背𠊎等个法律麼？ 15𠊎等愛納抑係毋使納？」

耶穌看出佢等个詭計，就應講：「你等樣般想愛害𠊎呢？拿一隻銀幣給𠊎看！」

16佢等拿一隻銀幣給佢。耶穌問佢等講：「這個像㧯名號係麼人个？」

佢等應講：「係皇帝个。」

17耶穌對佢等講：「既然係恁樣，將皇帝个東西歸給皇帝，將上帝个東西歸給上帝。」

佢等聽到這個話，就對佢盡希奇。

復活个問題

(馬太 22:23-33；路加 20:27-40)

18有兜毋相信復活這件事个撒都該人來見耶穌，問佢講： 19「先生，摩西為𠊎等立法講：『若係有一個人過身，留下佢个𡜵娘，總係無子女，佢个老弟一定愛討守寡个阿嫂做𡜵娘，代阿哥傳宗接代。』 20識有七個兄弟：大哥討𡜵娘後，無留下子女就過身； 21二哥討守寡个阿嫂後，也無留下子女就過身；第三個也係恁樣。 22七個兄弟全部討過該婦人家，攏總無留下子女就過身。最尾，該婦人家也過身。 23恁樣，在復活个時節，這個婦人家愛算係麼人个𡜵娘呢？因為七個兄弟全部識㧯姖結婚。」

24耶穌應佢等講：「你等毋著了，樣般講呢？因為你等無明白聖經，也無清楚上帝个權能。 25佢等對死復活个時，係㧯天頂个天使共樣，無討也無嫁。 26關係死人復活个事，你等無讀過摩西个書所寫竻樹𤏸火个故事係麼？上帝㧯摩西講：『𠊎係亞伯拉罕个上帝，以撒个上帝，雅各个上帝。』 27這意思係講，上帝毋係死人个上帝，係生人个上帝。你等完全毋著了！」

最大个誡命

(馬太 22:34-40；路加 10:25-28)

28有一個經學教師聽到佢等个辯論，感覺耶穌盡會回答問題，就進前來問耶穌講：「誡命中㖠條係第一重要个？」

29耶穌應講：「第一重要个就係：『以色列啊，你愛注意聽！主 — 𠊎等个上帝係惟一个主。 30你愛用全部个心志、情感、理智㧯力量敬愛主 — 你个上帝。』 31第二係：『你愛惜鄰舍，就像惜自家一樣。』無比這兩條還較重要个誡命了。」

32該經學教師對耶穌講：「先生，你所講个盡著！就像你所講，上帝係惟一个主，除了佢以外無別个上帝。 33愛用全部个心志、理智㧯力量敬愛上帝；也愛惜鄰舍，就像惜自家一樣。遵守這兩條誡命，比獻燒化祭㧯其他个祭物給上帝還較重要。」

34耶穌看出佢个回答滿有智慧，就對佢講：「你離上帝个國無幾遠了。」

對該時以後，無人敢再問耶穌麼介難題。

有關基督个問題

(馬太 22:41-46；路加 20:41-44)

35耶穌在聖殿肚教示人个時，提出一個問題，講：「經學教師樣般講基督係大衛个子孫呢？ 36大衛自家識受聖靈个感動講：

主對𠊎个主講：

『你坐在𠊎个右片，

等𠊎使你个仇敵伏在你个腳下。』

37 大衛自家稱佢做『主』，基督樣會又係大衛个子孫呢？」

愛提防經學教師

(馬太 23:1-36；路加 20:45-47)

眾人全部盡歡喜聽耶穌講論。 38在教示佢等个時，佢講：「愛提防經學教師；佢等好著長袍，招搖過街，愛別人在公共場所對佢等致敬請安， 39又盡愛坐會堂肚个特別座位㧯筵席中个大位。 40佢等吞食寡婦个產業，然後在人个面前表演長篇个祈禱。佢等一定會受到較重个責罰！」

寡婦个奉獻

(路加 21:1-4)

41耶穌坐在聖殿銀庫个對面，看大家樣般放錢落奉獻箱。當多有錢人放盡多錢落去； 42後來有一個窮苦个寡婦行過來，放兩隻細銅錢落去，差毋多係一文錢定定。 43耶穌喊厥學生過來，對佢等講：「𠊎實在㧯你等講，這窮苦个寡婦放落奉獻箱个比眾人所獻个較多。 44因為別人係奉獻佢等用賸个一部份；總係姖係在無罅用个當中，將全部个生活費獻出來。」

اکنون انتخاب شده:

馬可 12: THV12Hdb

های‌لایت

کپی

مقایسه

به اشتراک گذاشتن