馬太 26
26
殺害耶穌个陰謀
(馬可 14:1-2；路加 22:1-2；約翰 11:45-53)
1耶穌講了這兜話，就對學生講： 2「你等知，加兩日就係𨃟過節，人子會被人出賣，去釘十字架。」
3該時，祭司長㧯民間个長老在大祭司該亞法个官廳聚會， 4共下陰謀愛祕密捉耶穌，將佢㓾死。 5總係佢等講：「𠊎等毋好在節期中下手，免得惹起民眾个暴動。」
婦人家用香油膏耶穌
(馬可 14:3-9；約翰 12:1-8)
6耶穌在伯大尼發癩个西門屋下； 7有一個婦人家帶一隻玉罐仔來，底背裝盡珍貴个香油。耶穌食飯个時，該婦人家將香油倒在耶穌个頭那頂。 8學生看到，盡無歡喜，講：「樣般恁打喪呢？ 9這香油做得賣盡多錢來救濟窮苦人啊！」
10耶穌知佢等所講个，就對佢等講：「做麼介為難這婦人家哪？姖為𠊎做个係一件盡靚个事。 11因為常常有窮苦人同你等共下，總係𠊎毋係常常同你等共下。 12姖將這香油倒在𠊎个身上係為𠊎个埋葬做準備。 13𠊎實在㧯你等講，普天下，無論這福音傳到麼介所在，逐儕都愛講起姖所做个事，來紀念姖。」
猶大出賣耶穌
(馬可 14:10-11；路加 22:3-6)
14耶穌十二個學生當中，有一個加略人猶大；佢去見祭司長， 15講：「若係𠊎將耶穌交給你等，你等愛給𠊎麼介？」佢等就拿三十隻銀錢 #26:15 一隻「銀錢」係當時工人一日个工錢。給佢。 16對該時起，猶大就尋機會愛出賣耶穌。
耶穌同學生共下食𨃟過節个晚餐
(馬可 14:12-21；路加 22:7-14，21-23；約翰 13:21-30)
17除酵節个第一日，學生來問耶穌講：「你愛𠊎等在㖠位為你準備𨃟過節个晚餐？」
18耶穌應講：「你等入城去見某人，對佢講：『先生講：𠊎个時機已經近了；𠊎愛㧯𠊎个學生在若屋下守𨃟過節。』」
19學生就照耶穌所吩咐个去準備𨃟過節个晚餐。
20臨暗仔，耶穌㧯十二個學生圍等桌仔坐等。 21食个時節，耶穌講：「𠊎實在㧯你等講，你等當中有一個人愛出賣𠊎。」
22學生就盡憂愁，一個一個問佢講：「主啊，敢係𠊎？」
23耶穌應講：「㧯𠊎用共隻盤仔搵餅个，就係愛出賣𠊎个人。 24照聖經所講，人子會受害；總係出賣人子个人有災禍了！佢莫出世還較好！」
25出賣耶穌个猶大也開口講：「先生，敢係𠊎？」耶穌講：「你已經講了！」
主个晚餐
(馬可 14:22-26；路加 22:15-20；哥林多前書 11:23-25)
26佢等食个時節，耶穌拿起餅仔，感謝上帝後，就擘開，分給學生，講：「拿來食；這係𠊎个身體。」
27佢又拿起杯仔，感謝上帝後，交給佢等，講：「你等全部愛啉； 28這係𠊎个血，係證明上帝㧯人立約个血，為到使盡多人个罪得到赦免來流出个。 29𠊎㧯你等講，𠊎絕對毋會再啉這葡萄酒，直到𠊎㧯你等在吾爸个國啉新酒該日。」
30佢等唱一首詩，就出來，到橄欖山去。
耶穌預言彼得毋認佢
(馬可 14:27-31；路加 22:31-34；約翰 13:36-38)
31然後，耶穌對佢等講：「今暗晡，你等攏總會為𠊎个緣故離開𠊎；因為聖經記載：
上帝講：
『𠊎愛攻擊牧人，
羊群就分散掉去。』
32總係𠊎復活以後，愛比你等先去加利利。」
33 彼得對耶穌講：「就算別人因為你个緣故全部離開你，𠊎永遠毋會離開你！」
34耶穌對佢講：「𠊎實在㧯你講，今暗晡，雞仔啼以前，你會三擺毋認𠊎。」
35 彼得應講：「就算𠊎一定愛同你共下死，𠊎也絕對毋會毋認你！」
其他个學生也全部恁樣講。
在客西馬尼園祈禱
(馬可 14:32-42；路加 22:39-46)
36耶穌㧯學生來到一個所在，名安到客西馬尼；佢對佢等講：「你等在這位坐，𠊎愛去該片祈禱。」 37然後佢帶等彼得㧯西庇太个兩個孻仔共下去。佢開始感覺盡憂傷痛苦， 38對佢等講：「𠊎个心艱苦到會死。你等留在這位，愛同𠊎共下警醒噢！」
39佢行前兜仔，就伏在地上，祈禱講：「阿爸啊，若係做得，求你毋好俾𠊎啉這個苦杯！總係，毋好照𠊎个意思，愛照你个旨意。」
40佢倒轉三個學生該位，發現佢等睡掉，就㧯彼得講：「實在噢，你等無法度同𠊎共下警醒一點鐘久嗎？ 41愛警醒祈禱，免得陷落迷惑。你等確實心靈甘願，總係肉體軟弱。」
42耶穌第二擺又去祈禱，講：「阿爸啊，若係這苦杯做毋得離開𠊎，定著愛𠊎啉，願你个旨意成全！」 43佢又倒轉學生該位，看到佢等又睡掉，因為佢等个目珠擘毋開。
44耶穌又離開佢等，第三擺去祈禱，還係講共樣个話。 45然後佢又倒轉學生該位，講：「你等還睡目，還在該位休息嗎？看啊，時間到了，人子已經被人出賣到罪人手中囉。 46䟘起來，𠊎等來去！看啊，出賣𠊎个人到了！」
耶穌被人捉去
(馬可 14:43-50；路加 22:47-53；約翰 18:2-12)
47耶穌還講等話个時，十二個學生中个猶大來到。有一大群人帶等刀仔、棍仔同佢共下來；佢等係祭司長㧯民間个長老派來个。 48出賣耶穌个人事前給佢等一隻暗號，講：「𠊎唚麼人，佢就係你等所想愛个人；你等就捉佢。」
49 猶大即時行到耶穌面前，喊講：「先生，平安！」又唚佢。
50耶穌講：「朋友，你所愛做个，就做！」#26:50 「你所愛做个，就做！」抑係譯做「你來做麼介？」
所以，該兜人就進前來，下手捉耶穌。 51同耶穌共下个人當中，有一儕挷出刀仔，對大祭司个僕人劈過去，將佢个耳公削掉一隻。 52耶穌㧯佢講：「刀仔收起來；因為凡動刀个，一定會死在刀下。 53敢講你毋知𠊎做得求吾爸，佢會黏時差超過十二營个天使來嗎？ 54𠊎若恁樣做，聖經所講、事情一定會恁樣發生个話愛樣般來實現哪？」
55當時，耶穌對該群人講：「你等帶等刀仔㧯棍仔出來捉𠊎，看𠊎做強盜係麼？𠊎逐日坐在聖殿肚教人，你等並無捉𠊎。 56總係，這一切事情个發生，攏總係愛實現先知在聖經所講个話。」
這時，所有个學生全部離開佢逃走。
耶穌在議會受審判
(馬可 14:53-65；路加 22:54-55，63-71；約翰 18:13-14，19-24)
57該兜捉耶穌个人帶耶穌到大祭司該亞法該位去；經學教師㧯長老已經聚集在該位。 58彼得遠遠跈等耶穌，直到大祭司个庭院。彼得入庭院肚去，同警衛坐共下，愛看這事情个結局到底會樣般。 59祭司長㧯全議會想盡辦法尋假證據愛告耶穌，來定佢死刑； 60雖然有好多假个見證人出來告耶穌，總係拿毋出麼介證據來。最尾，有兩個人進前來告佢，講： 61「這個人識講：『𠊎有辦法拆掉上帝个聖殿，三日內又將它重建起來。』」
62大祭司企起來，問耶穌講：「這兜人告你个，你無麼介話好應係麼？」 63耶穌恬恬毋出聲。大祭司又對佢講：「𠊎指等永生上帝个名命令你發誓㧯𠊎等講，你係基督、上帝个孻仔麼？」
64耶穌應講：「這係你講个。總係𠊎㧯你等講，日後，你等會看到人子坐在全能者个右片，坐等天頂个雲降臨！」
65大祭司就扯裂自家个衫，講：「佢侮辱上帝！𠊎等毋使別个證人了！你等已經聽到佢侮辱上帝个話； 66你等講愛樣般判佢？」
佢等應講：「佢該死！」
67佢等就呸口潾在佢个面項，又用拳頭乸打佢。有兜人用巴掌乸搧佢， 68講：「基督啊，你係先知，試揣看，係麼人打你？」
彼得毋認耶穌
(馬可 14:66-72；路加 22:56-62；約翰 18:15-18，25-27)
69 彼得坐在外背个庭院肚；有一個使女行過來，講：「你乜係同加利利个耶穌共下个。」
70 彼得當大家个面否認，講：「𠊎毋知你講麼介。」 71後來，佢出去，行到庭院門口，又有一個使女看到佢，對企在該位个人講：「這個人同拿撒勒个耶穌係共下个。」
72 彼得又否認一擺，發誓講：「𠊎根本毋識該人！」
73過一下仔，塍頭企等个人又來對彼得講：「你確實係佢等當中个一個，聽你个腔就知！」
74 彼得就發誓咒詛講：「𠊎毋識該儕人！」
即時，雞仔就啼。 75彼得正想起耶穌所講个話：「雞仔啼以前，你會三擺毋認𠊎。」佢就走出去，噭到非常傷心。
اکنون انتخاب شده:
馬太 26: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
