馬太 15
15
祖先个傳統
(馬可 7:1-13)
1有幾個法利賽人㧯經學教師對耶路撒冷來見耶穌，問佢講： 2「樣般你个學生違背𠊎等祖先个傳統？佢等食飯前無照規矩洗手！」
3耶穌應講：「你等樣般為到遵守傳統來違背上帝个命令呢？ 4上帝講：『愛孝敬爺𡟓』；又講：『咒罵爺𡟓个，愛判佢死刑。』 5你等偏偏講，無論麼人對爺𡟓講：『𠊎將奉養你等个東西準做禮物獻給上帝』， 6佢就毋使孝敬爺𡟓。像恁樣，你等拿傳統來廢掉上帝个話。 7假冒為善个人啊，以賽亞指你等所講个預言實在無毋著！佢講：
8上帝恁樣講：
『這兜人用嘴唇皮尊敬𠊎，
總係佢等个心遠遠離開𠊎。
9佢等將人个規定準做𠊎个命令來教人；
佢等敬拜𠊎也係空空。』」
使人無淨浰个東西
(馬可 7:14-23)
10耶穌召集眾人到佢面前，對佢等講：「你等愛聽𠊎个話，也愛明白！ 11對嘴入去个東西毋會使人無淨浰；對嘴出來个正會使人無淨浰。」
12後來，學生進前對耶穌講：「法利賽人聽了你个話盡毋服，你知麼？」
13耶穌應講：「毋係𠊎天頂个阿爸所種个植物，攏總愛連根挷掉。 14莫搭佢等！佢等係瞙目个，愛樣般為人帶路；瞙目个帶瞙目个，兩儕攏總會跌落窟肚去。」
15 彼得講：「請㧯𠊎等解釋這比喻个意思。」
16耶穌講：「到這下你等還係同別人共樣無明白嗎？ 17敢講你等毋知？一切對嘴入去个東西，係到肚笥底背去，然後又屙出來。 18總係對嘴出來个係對心出來；該兜正會使人無淨浰。 19因為對人心中出來个，有種種个惡念；這兜惡念會使佢犯兇殺、姦淫、通姦、偷拿、講花撩、譭謗等罪惡。 20這兜正正經會使人無淨浰。像無先照規矩洗手就食飯這兜事，毋會使人無淨浰。」
一個外邦婦人家个信心
(馬可 7:24-30)
21耶穌離開該所在，閃到泰爾㧯西頓附近个地方去。 22該位有一個迦南个婦人家來見佢，喊講：「主啊，大衛个子孫，可憐𠊎！吾妹仔被鬼附身，非常艱苦！」
23耶穌一句話也毋應姖。學生前來求佢講：「請喊姖走！姖跈等𠊎等，歸路緊喊！」
24耶穌應講：「𠊎只有受差派去以色列人當中尋迷路个羊。」
25該婦人家一聽到這個話，就來跪拜佢，講：「主啊，求你幫助𠊎！」
26耶穌應講：「拿子女食个餅仔㧒給狗仔食係毋著个。」
27該婦人家講：「主啊，無毋著，總係狗仔乜食主人桌頂跌下來个餅碎仔啊！」
28耶穌就應姖講：「婦人家，你个信心真大！照你所愛个成全你！」厥妹仔在該時就好了。
醫好各種个病人
(馬可 7:31-37)
29耶穌離開該地方，來到加利利湖附近；佢上山，坐在該位。 30眾人又來尋佢，也帶來跛腳个、瞙目个、殘障个、啞仔，㧯好多別樣个病人，擺在耶穌个腳前；耶穌一一醫好佢等。 31該群人看到啞仔講話，殘障个復原，跛腳个行路，瞙目个看得到，感覺非常奇怪，就頌讚以色列个上帝。
給四千人食飽
(馬可 8:1-10)
32耶穌喊學生來，對佢等講：「𠊎代這群人盡擔心，因為佢等同𠊎共下已經三日，這下無東西好食囉。𠊎無愛佢等餓肚笥轉去，驚怕佢等在路上會餓到半生死。」
33學生講：「在這偏僻个所在，𠊎等愛去㖠位尋恁多个食物給這一大群人食飽呢？」
34耶穌講：「你等有幾多餅？」
佢等應講：「七隻，還有幾尾細魚仔。」
35耶穌吩咐眾人坐在地上， 36拿起該七隻餅仔㧯幾尾魚仔，感謝上帝後，就擘開，交給學生；學生就分給眾人。 37大家全部食到飽。學生拈食賸个碎仔，裝滿七隻籃仔。 38食个人，婦人家㧯細人仔以外，有四千儕。
39耶穌就喊眾人散開，然後上船，去馬加丹个地方。
اکنون انتخاب شده:
馬太 15: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
