哈巴谷書 2
2
上主又回答哈巴谷
1𠊎愛企在守望台，等等看上主愛對𠊎講麼介，看佢 #2:1 「佢」係根據一古譯本，希伯來文係「𠊎」。愛樣般回答𠊎个怪怨。
2上主恁樣應𠊎：「你愛將𠊎所啟示你个清清楚楚寫在石版上，俾報消息个人緊走緊讀出來 #2:2 「俾…出來」抑係譯做「俾人一看就讀得出來」。。 3𠊎喊你先寫下來，因為啟示實現个日期還吂到。總係時間就會到了，𠊎所指示給你个當遽就會實現。你可能會感覺忒慢，總係等等來看啊，事情一定會發生，毋會延纏。 4這係𠊎啟示你个信息：『自高自大个人，心肚無正直 #2:4 「自高…正直」抑係譯做「心肚無正直个人會滅亡」，希伯來文个意思無清楚。這個「人」可能指巴比倫人 (參考 1:12-13)。；總係義人會因為有信心 #2:4 「有信心」抑係譯做「對𠊎忠心」。來得到生命。』」
不義个人會承受災禍
5財富 #2:5 「財富」抑係譯做「酒」。使人奸詐、驕傲，得毋到安息。佢等个貪心像陰間恁大，像死个權勢恁樣，永遠毋會滿足。莫怪佢等愛佔領萬國、統一萬民。 6被佢等佔領个人民愛咒詛、嘲謔佢等講：「你等佔別人个東西變做自家个，你等會有災難了！你等收高利息、發橫財還愛到幾久呢？」
7在你無想到个時，你這佔領別人个人會變做揹債个人，會被人強迫還高利。仇敵會來㩢衰你；佢等會來搶你！ 8你識搶盡多國家个人民，這下該兜還生个人愛來搶你。這個事會發生；因為你㓾人，你侵犯佢等个土地㧯城市，並所有住在其中个人。
9你會有災難了！你用搶劫使自家好額。你在高高个所在做竇想愛逃避災難。 10總係你个詭計害你个家堵到見笑；你毀滅盡多國家个人民，反轉自家招來毀滅。 11連牆頭頂个石頭也盡喊愛攻擊你，棟樑也共下應聲。
12你會有災難了！你用罪惡起城，用兇殺建立都市。 13列國个打拚、萬民个勞碌做一下被火燒淨淨，全部變做空空。這係上主 — 萬軍元帥个作為。 14總係，就像大海充滿海水，大地會充滿對上主榮光个認識。
15你會有災難了！你發譴个時迫你个鄰舍食酒醉，愛看佢赤身露體。 16你也會盡見笑，光榮毋見掉。你自家愛醉到顛來顛去 #2:16 「顛來顛去」抑係譯做「顯出你係無受割禮个」。。上主愛使你啉你受責罰个杯；你个光榮會變做見笑。 17你斬掉黎巴嫩个樹林，這下你愛被人斬掉。你殺害樹林中个動物，這下你愛被動物害死 #2:17 「你斬掉…害死」，希伯來文个意思無清楚。。這個事會發生；因為你㓾人，你侵犯佢等个土地㧯城市，並所有住在其中个人。
18偶像有麼介用呢？它係人所刻个；引誘人講花撩定定。造它个人去相信它，到底有麼介好處呢？它連講話都毋會！ 19你會有災難了！你對一垤樹頭講：「好醒了！」對一垤啞仔石頭講：「䟘起來啊！」偶像能啟示你麼介呢？愛知，它雖然外表用金銀包等，底背卻無生命。
20總係上主在佢个聖殿當中；
地上萬民愛在佢面前恬靜！
اکنون انتخاب شده:
哈巴谷書 2: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012