創世記 35
35
上帝在伯特利賜福雅各
1上帝對雅各講：「你愛到伯特利去，住在該位。你愛在該位為𠊎起一座祭壇。𠊎就係你逃避若哥以掃个時，向你顯現个上帝。」
2 雅各就對佢个家族㧯所有跈佢共下去个人講：「愛將你等帶來該兜外族神像㧹掉；愛潔淨自家，換淨浰个衫褲。 3𠊎等愛離開這位去伯特利；𠊎愛在該所在為上帝起一座祭壇，因為𠊎堵到困難个時，上帝幫助𠊎；𠊎流浪个時，佢㧯𠊎共下。」 4佢等就將所有个外族神像㧯自家所戴个耳環交給雅各；雅各將這兜東西埋在示劍附近个橡樹下。
5 雅各㧯佢該兜孻仔出發个時，上帝使四周圍城鎮个人非常著驚，毋敢追佢等。 6雅各㧯歸家人來到迦南地个路斯，就係伯特利个所在。 7佢在該位起一座祭壇，將該地方安到伊勒伯特利#35:7 「伊勒伯特利」意思係「伯特利个上帝」。，因為佢逃避厥哥个時，上帝在該位親自向佢顯現。
8 麗百加个乳𡟓底波拉死掉，埋在伯特利南部个橡樹下，所以該頭樹仔安到「哀傷个橡樹」。
9 雅各對美索不達米亞轉來以後，上帝再一擺向佢顯現，賜福給佢。 10上帝對佢講：「你个名係雅各，總係從今以後你愛安到以色列。」恁樣，上帝就㧯佢改名安到以色列。 11上帝對佢講：「𠊎係全能个上帝；𠊎愛俾你𫱔多多子女。當多國家愛對你个子孫興起；你愛做盡多君王个祖先。 12𠊎愛將𠊎賜給亞伯拉罕㧯以撒个土地賜給你㧯你个後代。」 13這兜話講煞，上帝就離開佢。 14雅各在上帝對佢講話个地方頓一隻石頭做紀念碑，在該頂高淋酒㧯橄欖油。 15雅各將該地方安到伯特利，因為上帝在該位㧯佢講話。
蕾潔難產死掉
16 雅各㧯佢个家族對伯特利出發。佢等來到離以法他還有一站路个地方，蕾潔產期到了，盡難產。 17痛到忍毋住个時，產婆㧯姖講：「毋使驚，你又𫱔一個孻仔。」 18當蕾潔會斷氣个時節，姖㧯孲𤘅仔安名便‧俄尼#35:18 「便‧俄尼」意思係「使𠊎艱苦个孻仔」。；總係雅各㧯佢安到便雅憫#35:18 「便雅憫」意思係「𠊎右手个孻仔」抑係「好運个孻仔」。。
19 蕾潔死掉，埋在愛去以法他个路堘；以法他就係伯利恆。 20雅各在姖个墳墓頓一垤碑石，直到今晡日蕾潔个墓碑還在。 21以色列繼續佢个路程，在以得塔个南片搭帳篷。
雅各个孻仔
(歷代志上 2:1-2)
22 以色列還住在該地區个時，佢个長子呂便㧯厥爸个細姐辟拉睡目。以色列也聽到這件事 #35:22 有兜古卷加「非常發譴」。。
雅各有十二個孻仔。
23 麗亞𫱔个孻仔有：
雅各个長子呂便，
還有西緬、利未、猶大、以薩迦、西布倫。
24 蕾潔𫱔个孻仔有：
約瑟、便雅憫。
25 蕾潔个使女辟拉𫱔个孻仔有：
但、拿弗他利。
26 麗亞个使女悉帕𫱔个孻仔有：
迦得、亞設。
雅各這兜孻仔全部係在美索不達米亞出世个。
以撒過身
27 雅各來到幔利，到厥爸以撒該位；幔利就係希伯崙，係亞伯拉罕㧯以撒住過个地方。 28以撒享壽一百八十歲。 29佢食到盡多歲、盡老，正斷氣死掉，轉到厥祖宗該位去。佢个孻仔以掃㧯雅各將佢埋葬。
اکنون انتخاب شده:
創世記 35: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012