出埃及記 5
5
摩西㧯亞倫去見埃及王
1後來摩西㧯亞倫去見埃及王，講：「上主 — 以色列个上帝恁樣講：『放𠊎个子民走，俾佢等到曠野過節來敬拜𠊎。』」
2 埃及王講：「上主係麼人？𠊎樣使聽佢个話？𠊎做麼介愛放以色列人走？𠊎毋認識上主；𠊎也毋放以色列人走。」
3 摩西㧯亞倫應講：「希伯來人个上帝已經對𠊎等顯現。這下請你准𠊎等行三日个路，到曠野去向上主 — 𠊎等个上帝獻祭。若無恁樣做，佢愛用發瘟抑係戰爭來攻擊𠊎等。」
4 埃及王對佢等講：「摩西，亞倫！你等係麼介意思？愛俾該兜人荒廢工作係麼？喊該兜奴才遽遽去做事！ 5以色列人已經比埃及人較多，你等還想愛佢等毋做苦工係麼？」
6該日，國王命令埃及監工㧯以色列人个工頭，講： 7「不准再給以色列人做磚仔个草料！喊佢等自家去尋， 8總係愛佢等完成㧯以前共樣个數量，一垤也做毋得少。佢等懶尸正會要求𠊎俾佢等去向佢等个上帝獻祭！ 9喊佢等做較重个工作，較無閒兜仔，佢等正毋會有時間聽這兜無影無跡个話。」
10 埃及監工㧯以色列人个工頭就去㧯以色列人講：「國王命令無再給你等草料。 11佢講：無論行幾遠，你等一定愛自家去尋草料，磚仔个數量一垤也做毋得少。」 12因為恁樣，以色列人到埃及逐所在去尋草料。 13監工迫佢等，對佢等講：「逐日交出个磚仔，愛㧯以前給你等草料个時平多！」 14國王派个監工鞭打佢等所指派以色列人个工頭，責備佢等講：「做麼介工人昨晡日今晡日無交出㧯以前平多个磚仔呢？」
15 以色列人个工頭就去懇求國王，講：「國王，做麼介恁樣對待你个僕人？ 16監工毋給你个僕人草料，總係愛𠊎等交出㧯以前平多个磚仔！你看！你个僕人全部被人打，其實係若百姓毋著。」
17 埃及王講：「你等恁懶尸！你等就係因為恁懶尸，所以正會求𠊎俾你等去向上主獻祭。 18遽遽轉去做事！𠊎等毋會給你等草料，你等還係愛交出㧯以前平多个磚仔。」
19 以色列人个工頭一聽到佢等逐日還係愛交出㧯以前平多个磚仔，就知慘了。 20佢等離開王宮，正看到摩西㧯亞倫兩儕在外背等佢等。 21佢等就對摩西㧯亞倫講：「上主一定知你等做个係麼介事；你等害𠊎等在國王㧯佢个官員面前有臭名，俾佢等有㓾𠊎等个理由。上主一定會責罰你等！」
摩西對上主埋怨
22 摩西轉到上主面前，講：「上主啊，你做麼介害你个子民？做麼介派𠊎來？ 23自從𠊎到國王面前為你傳話，佢反轉還較厲害對付你个子民，你一些也無救佢等！」
اکنون انتخاب شده:
出埃及記 5: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012