出埃及記 37
37
造約櫃
(出埃及記 25:10-22)
1 比撒列用金合歡木造約櫃，長一百一十公分，闊六十六公分，高六十六公分。 2佢用純金將櫃仔个內外全部包等，四面鑲齒形金邊。 3佢又造四隻穿槓仔用个金圈仔，安在櫃仔个四腳上，一片兩隻。 4佢用金合歡木造兩支槓仔，用金包等， 5拿來穿過櫃仔兩片个金圈仔。 6佢用純金造一隻櫃仔蓋，就係贖罪蓋，長一百一十公分，闊六十六公分， 7又用金仔捶出兩隻基路伯， 8黏在蓋仔頂，一頭一隻、成做蓋仔个一部份。 9兩隻基路伯面對面，打開翼胛，遮等櫃仔蓋。
造供桌
(出埃及記 25:23-30)
10 比撒列用金合歡木造一張桌仔，長八十八公分，闊四十四公分，高六十六公分。 11佢用純金來包等，並在四面鑲齒形金邊。 12桌仔个周圍有加七十五公釐闊个框仔，框仔有鑲齒形金邊。 13佢造四隻用來扛个金圈仔，安在桌仔四角个腳頂。 14金圈仔安較近框仔，俾扛桌仔个槓仔穿過去。 15佢用金合歡木造兩支槓仔，用金包等。 16佢又用純金造桌頂个用品，就係盤仔、碗、還有敬神用个酒壺㧯酒杯。
造燈臺
(出埃及記 25:31-40)
17佢用純金造一座燈臺。燈座㧯柱仔用金仔打造；裝飾个花蕊、花托、花瓣，全部打到連共下。
18燈臺兩片伸出六支枝仔，一片三支。 19逐支枝仔有三蕊花，形狀像杏花，有花托㧯花瓣。 20燈臺个柱仔有四蕊花，形狀像杏花，有花托㧯花瓣。 21三對枝仔个每一對下背有一個花托。 22花托、枝仔，㧯燈臺全部係用歸垤純金打出來个。 23佢為燈臺造七盞燈，又用純金造燈花剪刀㧯燈盤。 24佢用三十五公斤个純金造燈臺㧯所有用品。
造香壇
(出埃及記 30:1-5)
25佢用金合歡木造一座燒香个壇。壇係四方个，長四十五公分，闊四十五公分，高九十公分。這壇个四隻角㧯壇連做歸垤。 26佢用純金包等壇个頂高、四邊㧯四角，周圍鑲齒形金邊。 27佢又造兩隻用來扛壇个金圈仔，安在壇兩片金邊下背，俾扛壇个槓仔穿過去。 28佢用金合歡木造槓仔，用金包等。
造聖油㧯香
(出埃及記 30:22-38)
29佢也用造香水个方法來製造聖油㧯盡香个上等香。
اکنون انتخاب شده:
出埃及記 37: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012