出埃及記 34
34
十條誡命个新石版
(申命記 10:1-5)
1上主對摩西講：「你愛再打兩垤石版，㧯以前該兩垤共樣；𠊎愛將你抨碎掉个該石版頂个話寫在這兩垤石版頂。 2天光朝晨，你愛準備好，上西奈山去，在山頂高企在𠊎面前。 3毋好俾人㧯你共下上來；歸隻山做毋得有人，也做毋得有牛羊在山腳下食草。」 4所以摩西再打兩垤石版，㧯以前該兩垤共樣；第二日打早，佢照上主个吩咐將石版拿等上西奈山去。
5上主在雲中降臨，㧯摩西企在該位，宣告佢个聖名 — 上主。 6上主對摩西面前經過，宣告講：「𠊎係上主 #34:6 「上主」看出埃及記 3:14 。，𠊎係慈悲㧯憐憫个上帝。𠊎毋會隨便發譴，有豐盛个慈愛㧯信實。 7𠊎堅守不變个慈愛直到千萬代，並赦免罪惡㧯過犯。總係，𠊎毋會將有罪个準做無罪，𠊎一定會因為爺𡟓个罪來責罰佢等个子女，直到三四代。」
8 摩西遽遽伏在地上敬拜。 9佢講：「主啊，若係𠊎在你面前蒙恩，求你㧯𠊎等共下行。雖然這群人當硬頸，總係求你赦免𠊎等个罪惡㧯過犯，接納𠊎等做你个子民。」
重新立約
(出埃及記 23:14-19；申命記 7:1-5；16:1-17)
10上主對摩西講：「這下𠊎㧯以色列人民立約。𠊎愛在你面前行大事，係世上所有个地方、所有个民族毋識看過个。你四周圍个民族會看到𠊎 — 上主个作為，因為𠊎愛向你行得人驚个事。 11𠊎今晡日吩咐給你个法律，你愛遵守。在你前進个時，𠊎愛逐走亞摩利人、迦南人、赫人、比利洗人、希未人㧯耶布斯人。 12你愛謹慎，做毋得㧯你愛去該地方个人民立約，因為該會成做你致命个羅網。 13你等反轉愛拆掉佢等个祭壇，打碎佢等个神柱，斬橫佢等个亞舍拉女神像。
14「做毋得敬拜別个神明，因為𠊎 — 上主係專情个上帝，𠊎个名安到『專情者』#34:14 「專情者」抑係譯做「嫉妒者」抑係「忌邪者」，看出埃及記 20:5 。。 15做毋得㧯當地个人民立約，驚怕佢等拜自家个神明、行姦淫、獻祭个時，會邀請你去參加，你會被人引誘去食佢等獻給神明个祭物。 16驚怕你个孻仔㧯別族个細妹仔通婚，該兜細妹仔拜自家个神明、行姦淫，你个孻仔就會跈等去拜別个神明、行姦淫。
17「做毋得鑄造抑係敬拜神像。」
18「愛守除酵節。你愛遵照𠊎个吩咐，在亞筆月食無酵餅七日，因為你係在亞筆月離開埃及个。
19「所有頭胎个孻仔㧯所有頭胎牯个頭牲，無論係牛係羊，全部屬𠊎； 20總係你愛用細羊贖轉所有頭胎个驢，若毋贖轉去，就愛打斷牠个頸筋。你子孫中所有頭胎个孻仔全部愛贖轉去。
「做毋得空手來敬拜𠊎。
21「你六日愛工作，總係第七日，你一定愛歇睏；就算耕種抑係收割期間，也愛歇睏。
22「在開始收割新出个麥仔个時愛守七七收割節；秋季收藏農產物个時，愛守收藏節。
23「一年三擺，所有男人全部愛來朝拜𠊎 — 至高个上主、以色列个上帝。 24𠊎愛對你面前逐出各民族，擴展你个境界；你一年三擺上去朝拜𠊎 — 上主、你上帝个時，毋會有人侵略你个國土。
25「你獻牲祭个時，做毋得拿牲祭个血㧯有酵个餅共下獻。𨃟過節㓾个頭牲做毋得留到隔日朝晨。
26「逐年愛將你所收成最好个新出農產物帶到上主 — 你上帝个聖殿。
「做毋得用羊乸个乳來煮細羊仔。」
27上主對摩西講：「將這兜話寫下來；因為𠊎愛用這兜話做根據，同你㧯以色列人立約。」 28摩西在上主該位停留四十日夜，無食無啉。佢將這約个話，就係十條誡命，寫在兩垤石版頂。
摩西對山頂下來
29 摩西帶等十條誡个兩垤石版對西奈山下來个時，面貌皓光，因為佢㧯上主講過話；總係佢自家毋知。 30亞倫㧯以色列人民看到摩西面上个榮光，毋敢偎近佢。 31摩西喊佢等過來；亞倫㧯該兜會眾个領袖攏總行前來，摩西就㧯佢等講話。 32隨後以色列人民全部來到摩西面前，摩西就將上主在西奈山交帶給佢个法律全部㧯人民講。 33摩西㧯佢等講煞，拿帕仔揞自家个面。 34逐擺摩西進入聖帳篷㧯上主講話，一定將帕仔掀起來，出來个時就將上主所吩咐个話㧯以色列人民講。 35佢等看到佢个面皓光；然後摩西再用帕仔揞面，等到再入去㧯上主講話正掀開來。
اکنون انتخاب شده:
出埃及記 34: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012