出埃及記 29
29
設立亞倫㧯佢个子孫做祭司个條例
(利未記 8:1-36)
1「你授聖職給亞倫㧯佢該兜孻仔，設立佢等做祭司事奉𠊎，愛恁樣做：愛捉一隻細牛牯㧯兩隻無缺點个綿羊牯； 2用最好个麵粉去做無酵餅，有兜攪油做，有兜無攪油做，有兜膏油做無酵个薄餅。 3將這兜餅裝在籃仔肚，在你獻細牛牯㧯兩隻綿羊牯个時帶來獻給𠊎。
4「你愛將亞倫㧯佢該兜孻仔帶到聖帳篷門口來，吩咐佢等洗身。 5然後愛俾亞倫著祭司个聖服 — 內衫、掛等以弗得个長衫、胸牌、㧯手工刺个帶仔。 6將帽仔戴在佢个頭那頂，將刻等『歸上主為聖』个聖牌繫在帽仔頂高， 7最後拿聖油倒在佢頭那頂來設立佢。
8「你愛將佢該兜孻仔帶來，㧯佢等著內衫、 9繫腰帶、戴帽仔。這就係授聖職給亞倫㧯佢該兜孻仔个條例。佢等㧯佢等个後代愛永遠做祭司事奉𠊎。
10「你愛將牛牯牽到聖帳篷前，吩咐亞倫㧯佢該兜孻仔按手在牛个頭那頂。 11就在聖帳篷門口，在𠊎 — 上主面前，將牛牯㓾掉。 12愛拿兜牛血，用手指膏在祭壇四隻角頂；將賸到个血倒在壇腳。 13然後將該包等腹內个油、肝个最好部份、㧯帶油个兩隻腰仔，在祭壇頂高燒，來獻給𠊎。 14總係牛牯个肉、皮、㧯腸愛在營外燒。這係祭司个贖罪祭。
15「你愛牽一隻綿羊牯來，吩咐亞倫㧯佢該兜孻仔按手在羊个頭那頂。 16將綿羊牯㓾掉，又愛拿羊血洒在祭壇个四周圍。 17你愛將綿羊牯切做一垤一垤；洗淨腹內㧯後腿，放在頭那㧯其他碎肉頂高。 18愛將歸隻綿羊牯放在祭壇頂燒，做燒化祭獻給𠊎 — 上主。這火祭个香味係𠊎歡喜个。
19「你愛牽另外一隻綿羊牯來，吩咐亞倫㧯佢該兜孻仔按手在羊个頭那頂。 20愛將綿羊牯㓾掉，然後拿兜羊血膏在亞倫㧯佢該兜孻仔个右耳鉈，也膏在佢等右手指公㧯右腳指公。其他个血愛洒在祭壇个四周圍。 21愛拿一些仔祭壇頂高个血㧯一些仔聖油拂在亞倫㧯佢个衫褲，也拂在亞倫該兜孻仔㧯佢等个衫褲。恁樣，佢、佢該兜孻仔、㧯佢等个衫褲就全部分別為聖。
22「你愛割下綿羊牯个油、尾、包等腹內个油、肝个最好部份、兩隻帶油个腰仔、㧯右腿。 (這係授聖職給祭司所獻个綿羊牯。) 23對奉獻給𠊎該放無酵餅个籃肚拿一垤餅，一垤攪油做个餅，㧯一垤薄餅。 24將這兜食物全部放在亞倫㧯佢該兜孻仔手項，搖幾下做搖祭獻給𠊎。 25然後你愛對佢等手中將食物接過來，放在祭壇頂高燒，做燒化祭獻給𠊎 — 上主。這火祭个香味係𠊎歡喜个。
26「你愛拿亞倫承接聖職所獻綿羊牯个胸脯肉搖幾下，做搖祭獻給𠊎。這份祭肉就係你个。
27「授聖職給祭司个時，該兜用過个綿羊牯个胸脯肉㧯右腿，全部愛分別為聖，做搖祭歸給𠊎，然後交給該兜祭司。 28這係𠊎毋會改變个定例：以色列人獻平安祭个時，頭牲个胸脯肉㧯右腿愛給該兜祭司；該係𠊎个子民獻給𠊎 — 上主个特別祭物。
29「亞倫死後，佢个聖服愛傳給佢个子孫，俾佢等接受聖職个時好著。 30該承接亞倫做祭司个子孫，佢來到聖帳篷肚、在聖所事奉𠊎个時，愛著這聖服七日。
31「亞倫㧯佢該兜孻仔接受聖職个時，用過个綿羊牯个肉，你愛拿到一個聖潔个所在去煮。 32佢等愛在聖帳篷門口食這羊肉㧯籃仔肚个餅。 33接受聖職个赦罪禮用過个食物，佢等也愛食。只有祭司正做得食，因為這食物係聖个。 34若係有肉抑係餅到第二日朝晨還吂食掉，就愛燒掉，毋好再食，因為這食物係聖个。
35「你愛照𠊎所吩咐个一切，為亞倫㧯佢該兜孻仔舉行接受聖職个典禮七日。 36逐日你一定愛獻上一隻牛牯做贖罪祭，使祭壇潔淨，也愛用橄欖油膏祭壇，使它分別為聖。 37你愛逐日恁樣做，連等七日，使祭壇完全分別為聖。所有憑到祭壇个人抑係東西全部會分別為聖 #29:37 「分別為聖」抑係譯做「被神聖个力量傷到」。。
逐日愛獻个祭
(民數記 28:1-8)
38「你逐日愛獻兩隻一歲大个細羊在祭壇頂，做毋得停； 39朝晨獻一隻，臨暗仔獻另外一隻。 40獻第一隻羊个時愛同時獻一公斤幼麵粉，攪一公升純个橄欖油，另外獻一公升个祭酒。 41臨暗仔獻第二隻羊个時，你愛照朝晨恁樣將素祭㧯祭酒獻給𠊎 — 上主。這火祭个香味係𠊎歡喜个。 42世世代代，這燒化祭愛在𠊎面前、在聖帳篷門口獻；該聖帳篷就係𠊎愛㧯你等相會、㧯你講話个地方。 43𠊎愛㧯以色列人民在該位相會。𠊎个榮耀會將該地分別為聖。 44𠊎愛使聖帳篷㧯祭壇成聖，愛將亞倫㧯佢該兜孻仔分別出來，做祭司事奉𠊎。 45𠊎愛住在以色列人民當中，愛做佢等个上帝。 46佢等會知𠊎係上主 — 佢等个上帝；𠊎對埃及將佢等𢱋出來，係為到愛住在佢等當中。𠊎係上主 — 佢等个上帝。」
اکنون انتخاب شده:
出埃及記 29: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012