出埃及記 17
17
磐石出水
(民數記 20:1-13)
1 以色列所有个人民遵照上主个指示離開汛个曠野，一位一位遷徙等去。佢等到利非訂安營，總係該位無水好食； 2所以人民㧯摩西計較講：「給𠊎等水食！」
摩西應講：「你等做麼介怪𠊎？做麼介愛試探上主？」
3總係人民非常嘴燥，就對摩西發怨言。佢等講：「你做麼介將𠊎等𢱋出埃及？你愛俾𠊎等㧯𠊎等个子女、連𠊎等个頭牲全部渴死係麼？」
4 摩西迫切在上主面前祈禱講：「𠊎愛樣般應付這兜人民正好呢？佢等強強會拿石頭將𠊎㧹死。」
5上主對摩西講：「你帶幾個以色列人个長老㧯你共下行到人民頭前，手愛拿等你打尼羅河壩水个柺棍仔。 6𠊎愛在何烈山个一垤磐石頂企在你面前。你打該磐石，就會有水流出來給人民食。」摩西就在以色列長老个面前恁樣做。
7佢將該地方安到瑪撒，又安到米利巴#17:7 「瑪撒…米利巴」希伯來話个意思係「試探…怪怨」。；因為以色列人在該位怪怨、試探上主。佢等問：「上主敢有㧯𠊎等共下？」
㧯亞瑪力人相㓾
8 亞瑪力人到利非訂攻打以色列人。 9摩西對約書亞講：「你去選兜人出來，準備㧯亞瑪力人相㓾。天光日𠊎愛企在山頂，手拿等上帝个柺棍仔。」 10約書亞照摩西所吩咐个，出去㧯亞瑪力人相㓾；摩西、亞倫㧯戶珥上到山頂。 11摩西手擎起來个時，以色列人就贏；佢手放下來，亞瑪力人就贏。 12摩西个手𤸁了，亞倫㧯戶珥搬一垤石頭來，俾佢坐在頂高；一個企左片，一個企右片，扶等佢个手，直到日頭落山。 13恁樣，約書亞就用刀劍贏過亞瑪力王㧯佢帶來个人。
14所以，上主對摩西講：「將這擺个勝利記錄下來，好講給後代聽。又愛㧯約書亞講，𠊎愛完全拭掉亞瑪力人个名號。」 15摩西起一座祭壇，安名做「上主係𠊎个軍旗 #17:15 「上主係𠊎个軍旗」希伯來話个發音係「耶和華尼西」。」。 16佢講：「手擎上主个軍旗！上主愛世世代代㧯亞瑪力人相㓾。」
اکنون انتخاب شده:
出埃及記 17: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012